Pachantinpin askha runakuna baleanakuspa wañushanku | ¿Imanishanmi Biblia chaymanta?

2022 wata julio killapin askha llaqtakunapi baleanakuy karqan:

• “Japón nacionpin Shinzo Abe nisqa sutiyoq allin reqsisqa político runata wañuchirqanku. Chay nacionpiqa manas nishu runa wañuchiyqa kanchu, armakunata jap’iqkunatapas allintas controlanku, chhayna kaqtinpas kay político runatan wañuchirqanku. Chaywanmi pachantinpi runakunaqa admirasqa kashanku” (10 de julio de 2022, The Japan Times).

• “Dinamarca nacionpin Copenhague llaqtapi juj runa kinsa runakunata wañuchirqan, chay runaqa allin armasqas kashasqa” (4 de julio de 2022, Reuters).

• “Sudáfrica nacionpin Soweto llaqtapi allin armasqa runakuna may munasqankuman baleaspa chunka pisqayoq runakunata wañuchirqanku” (10 de julio de 2022, The Guardian).

• “Estados Unidos nacionpin 4 de julio fiestapi semana tukuyta 220 más runakuna baleasqa wañurqanku” (5 de julio de 2022, CBS News).

¿Jayk’aqllapas tukunmanchu chhayna millay ruwaykuna? ¿Imanishanmi Biblia chaymanta?

Millay ruwaykunaqa tukupunqan

Bibliaq nisqanman jinaqa “tukukuy p’unchaykunapin” tiyashanchis, chaymi runakunaqa sinchi k’araq sonqokuna kanku, sinchi millay ruwaykunatataqmi ruwashankupas (2 Timoteo 3:1, 3). Chhayna millay ruwasqankuwantaq runakunata manchachinku (Lucas 21:11). Biblian ichaqa prometewanchis millay ruwaykuna chinkapunanta. Isaías 32:18 texton nin: “Runakunaqa thaj llaqtapin tiyanqaku, mana piqpa imanasqanmi allin waqaychasqa wasikunapi tiyanqaku”, nispa. ¿Imaynatan chay promesa junt’akunqa?

Diosmi millay runakunatapas armakunatapas chinkachipunqa.

• Proverbios 2:22 texton nin: “Millay runakunan ichaqa kay jallp’amanta chinkachisqa kanqaku”, nispa.

• Salmos 46:9 texton nin: “[Diosmi] kay pachapi guerrata tukuchiqqa. Arcokunatan p’akin, lanzakunatan ñut’un, guerraman rina carretakunatapas ninapin kanan”, nispa.

Diosmi runakunata yachachinqa thajpi kausayta, chhaynapin mana pipas millay ruwaykunataqa ruwanqañachu.

• Isaías 11:9 texton nin: “Ch’uya orqoypiqa manan kanqachu ima mana allinpas ni thuniypas; jallp’a pachaqa Jehová Diospa yachayninwanmi junt’a kanqa, imaynan lamar-qochapas unuwan junt’a kashan chhaynan kanqa”, nispa.

• Kunan p’unchaykunapas Jehová Diosmi runakunata yachachishan millay ruwaykunatapas, armakunatapas saqepunankupaq. Miqueas 4:3 texton nin: “Espadankumantan yapuna rejakunata ruwakapunqaku, lanzankumantan ichhunakunata ruwakapunqaku”, nispa.

Kay pachapi mana imata manchakuspa kausananchismanta astawan yachanaykipaq qhaway “¿Es posible librarse del miedo?” nisqa yachachikuyta.

Jujpaqkama millay ruwaykuna chinkapunanmanta astawan yachanaykipaq qhaway “¡Por fin paz en la Tierra!” nisqa yachachikuyta.