¿Yanapakunkuchu ima desgraciapas kaqtin?

Arí, Jehová Diospa testigonkunaqa yanapaykun terremotopi, lloqllapi otaq imapipas tarikuqkunata. Testigoña mana Testigoña kaqtinkupas, Bibliaq nisqanman jinan yanapayku. Gálatas 6:10 texton nin: ‘Atishaspanchisqa lliupaq allinkaqta ruwasunchis, aswantaqa ruwasun iñiqmasinchiskunapaq’, nispa. Jinaspapas chhayna llakikunapi tarikuqkunatan kallpachayku (2 Corintios 1:3, 4).

Imaynata yanapasqayku

Ima desgraciapas pasasqan qhepamanmi, umallikuna llapa iñiqkunata maskhanku imayna kashasqankuta, imakuna necesitasqankuta yachanankupaq. Chay qhepamanmi umallikuna sucursalman willanku imaynapi tarikusqankuta imakuna ruwasqankutapas.

Sichus yanapay qosqanku mana aypanchu chayqa, Jehová Diospa testigonkunamanta Umalliq T’aqan qhawarin imayna yanapanata. Sucursalmi encargadokunata churan yanapayta apachinanpaq, juj llaqtakunapi Testigokunataq ofrecekunku yanapaq rinankupaq (Proverbios 17:17). Apostolkunaq tiemponpi yarqay kaqtinpas chhaynatan cristianokuna yanapanakuranku (1 Corintios 16:1-4).

Gastokuna

Sucursalkunaman apachikusqan donacionkunatan t’aqakun chhayna desgraciakunapi tarikuqkunata yanapanapaq (Hechos 11:27-30; 2 Corintios 8:13-15). Yanapakuq Testigokunaqa gratisllan yanapakunku, chaymi donación apachikusqanta llakipi tarikuqkunallaman qonku. Jinaspapas donacionkuna apachikusqantaqa allin yuyaywanmi gastakun (2 Corintios 8:20).