¿Imaynatan Biblia yanapawanman? Iskay parte: Bibliata leespa kusikuymanta

Will waynan nin: “Wakinpaqqa Biblia leeyqa aburrikunapaq jinan. Ichaqa Bibliata imayna leeyta mana yachasqanchisraykun chayqa kanman”, nispa.

¿Munawaqchu yachayta imaynatas Biblia leey gustasunkiman chayta? Chaypaqmi kay yachachikuy yanapasunki.

• Bibliata leespaqa chaypipas kashawaq jinata piensay

• Astawan chay willakuymanta t’aqwiriy

• Juj wayna-sipaskunaq nisqanku

Bibliata leespaqa chaypipas kashawaq jinata piensay

Chaypaqqa kaykunata ruwawaq:

1. Ima willakuymantachus yachayta munanki chayta ajllakuy. Leewaqmi juj willakuyta imachus ñaupa tiempopi pasasqanmanta, Jesuspa vidanmanta juj willakuytapas otaq jw.org nisqapi sonqoman chayaq juj grabaciontapas uyariwaqmi.

2. Leey chay willakuyta. Leewaqmi sapallaykipi otaq alto kunkawan familiaykiwan otaq amigoykikunawanpas. Chaypaqqa jujniykichismi chay willakuyta paypas willashanman jinata leenman, wakinniykichistaq chay willakuypi kaq runakunaq rimasqankuta paykunapas kankuman jina leenkuman.

3. Kaykunatawanmi ruwawaq:

   • Bibliapi leesqaykimantan dibujawaq otaq imakuna chay willakuypi pasasqanmanta dibujokunata ruwawaq. Chay sapanka dibujopitaq qelqawaq imachus chaypi pasasqanta.

   • Ñaupa tiempomanta juj junt’aq sonqo Diospa siervonmanta leespayki sutinta qelqawaq ladonpitaq qelqawaq imakuna ruwasqanta, imayna runa kasqanta, ima bendicionkuna chaskisqanmantawan.

   • Bibliapi juj willakuymanta leespaqa jujniraymanta ruway. Chay willakuypi pikunamantachus rimashan chay runakunata tapushawaqpas jinata ruway, chaymantapas pikunachus chaykunata rikurqanku paykunatapas tapushawaq jinata ruwallaytaq.

   • Sichus ñaupa tiempomanta Diospa juj siervonmanta mana allin ruwasqanmanta leeshanki chayqa. Piensay, ¿imataq pasanman karqan sichus allinta decidinman karqan chayri? Ejemplopaq, piensay Jesusta negaq Pedropi (Marcos 14:66-72). ¿Imatan ruwanman karqan Jesusta ama negananpaq?

   • Bibliapi juj willakuymanta leespaqa qelqawaqmi imaynan chay willakuy kananta munawaq karqan chayta. Chaymantapas imakunatachus chay willakuymanta yachanki chaytapas qelqawaqmi (Romanos 15:4).

     

Astawan chay willakuymanta t’aqwiriy

Sichus Bibliapi juj willakuymanta leespayki astawan t’aqwirinki chayqa, pakasqa qorita jinan ancha valorniyoq yachachikuykunatan tarinki. Mayninpiqa juj otaq iskay palabrakunallata t’aqwispan importante yachachikuykunata tariwaq.

Ejemplopaq, tupanachiy Mateo 28:7 textota Marcos 16:7 textowan.

• Marcosqa qelqarqan Jesús qatikuqninkunaman rijurinanta, ¿imaraykutaq yapaykurqan “Pedromanwan” rijurinantari?

• Yanapay: Marcosqa manan chaypichu karqan chaykunata rikunanpaq, yaqapaschá Pedro kikin willanman karqan.

• Qori jina yachachikuy: Jesusqa Pedrotan jujmanta rikuyta munarqan, ¿imaynatan Pedrota sonqochanman karqan chayta yachay? (Marcos 14:66-72). ¿Imaynatan Jesús Pedroman rikuchirqan cheqaq amigo kasqanta? Sichus allin amigo kayta munanki chayqa, ¿imaynatan Jesuspa ejemplonta qatikuwaq?

Bibliapi kaq willakuykunata leespayki sichus chaypipas kashawaq jinata piensanki jinaspapas astawan chay willakuymanta t’aqwirinki chayqa, anchatan gustasunki Bibliata leey.