Milagrokunata ruwan; Nazaretpitaq mana iñinkuchu

Decápolis ladomanta kutimusqan qhepaman, yawar apaywan onqosqa warmita qhaliyachisqan qhepaman, juj sipaschatapas kausarichisqan qhepamanmi Jesusqa Jairoq wasinmanta ripusharan. Chayllamanmi iskay ñausakuna qhepanta rispa qapariranku: “¡Davidpa Churin, khuyapayaykuwayku!”, nispa (Mateo 9:27).

“Davidpa Churin” nisqankuwanmi chay ñausakunaqa rikuchisharanku Jesuspi iñisqankuta. Paymi ichaqa manapas uyarishanmanchu jina purishallaran, yaqapaschá rikuyta munasharan maytukuytachus paypi iñiranku chayta. Jesús juj wasiman jaykuqtinmi chay ñausakunapas qhepanta jaykullarankutaq, jinan Jesusqa tapuran: “¿Iñinkichischu ñawiykichis kicharinaypaq atiyniyoq kasqayta?”, nispa. Paykunataq: “Arí, Señor”, niranku. Chaymi Jesusqa ñawinkuta llamiykuspa niran: “Iñisqaykichisman jina ruwasqa kachun”, nispa (Mateo 9:28, 29).

Jinan ñausakunaqa qhawaripuranku. Jesustaq paykunata kamachiran ama pimanpas chayta willanankupaq. Paykunan ichaqa ancha kusikuymanta lliuman willaranku.

Paykuna ripushaqtinmi Jesusman apamuranku supaypa junt’aykusqan mana rimay atiq runata. Jesús chay supayta qarqoqtintaq chay runaqa kaq rato rimaripuran. Chayta rikuspan runakunaqa admirasqa ninakuranku: “Israelpiqa manan jayk’aqpas rikukuranchu khayna ruwaykunaqa”, nispa. Fariseokunataq ichaqa ñaupaqpi nisqanku jina niranku: “Kay runaqa supaykunata kamachiqpa atiyninwanmi supaykunata qarqon”, nispa (Mateo 9:33, 34).

Chay qhepallatan Jesusqa wiñasqan Nazaret llaqtata discipulonkunawan riran. Juj wata jinañan pasaran chay llaqtaman risqanmanta. Chay kutipin runakunaqa juj ratolla admirakuranku Jesuspa yachachisqanmanta, chaymantan ichaqa payta wañuchiyta munaranku. Chay llaqtamanmi Jesusqa wajmanta kutisharan.

Chaypin payqa sinagogapi yachachiyta qallariran, jinan runakunaqa niranku: “¿Maypitaq kay runari khayna yachayta tariramun? ¿Imaynapin yachan milagrokuna ruwaytapas? ¿Manachu kay runaqa carpinteroq wawan kashan? ¿Manachu mamanpas María kashan? ¿Manachu wayqenkunapas Santiago, José, Simón, Judas ima kashan? ¿Manachu panankunapas llapanku kaypi tiyanku? Chhaynaqa, ¿maypitaq kay runari llapa kaykunata yacharamun?”, nispa (Mateo 13:54-56).

Paykunapaqqa común llaqtamasillankun Jesusqa karan. Chaymi niranku: ‘Kaypimá riki payqa wiñaran, ¿imaynapitaq Mesiasri kanman?’, nispa. Chayraykun mana iñirankuchu yachachisqanpi milagrokuna ruwasqanpipas. Kikin familiankunapas manan paypi iñirankuchu. Chaymi Jesusqa niran: “Profetaqa maypipas allin respetasqan, kikin llaqtanpi kikin wasinpi imallan manaqa”, nispa (Mateo 13:57).

Jesusqa anchatan admirakuran chhayna mana iñiq kasqankumanta, chaymi ‘iskay kinsa onqosqakunallata chaypi qhaliyachiran’ (Marcos 6:5, 6).