Bautizakuspapas Cristoq “qhepallantapuni” puriy

1, 2. ¿Imaraykun nisunman “pipas bautizakun chayqa astawanraqmi allinyan kausaynin” nispa?

PIPAS bautizakun chayqa Jehová Diospa familianmantan kapun. ¡May munaypunin chayqa ¿riki?! Pipas Diospa familianmanta kaqqa David jinachá piensan, paymi nirqan: “May kusisqan ajllakusqayki runaqa, may kusisqan patioykipi tiyananpaq pusamusqayki runaqa”, nispa (Sal. 65:4).

² Jehová Diosqa manan comuntachu pitapas wasinmanqa pusamun. Ñaupaq yachachikuypi yachamusqanchis jina Jehová Diosqa qayllaykun pichus payman qayllaykamushan chay runamanmi (Sant. 4:8). Chay runa bautizakuqtintaq paywan allin amigontin kapunku. Paykunatan Jehová Diosqa nin: “Janaq pacha punkukunata kicharispan bendicionniyta askhatapuni jich’aykamusaykichis”, nispa (Mal. 3:10; Jer. 17:​7, 8).

3. ¿Imatan junt’ananchispuni llapa bautizasqakuna? (Eclesiastés 5:​4, 5).

³ Bautizakuspan Diospaq jina kausayta qallarishanchis. Pipas bautizakuqqa promesa ruwasqanman jinan kausanan, ima tentacionpiña ima llakipiña tarikunqa chaypas junt’ananmi chayta (leey Eclesiastés 5:​4, 5). Chaymantapas Jesuspa ejemplontan qatikuna, paypa kamachisqanman jinataqmi kausanapas (Mat. 28:​19, 20; 1 Ped. 2:21). ¿Imaynatan chayta ruwasunman? Chaytan kaypi yachasunchis.

TENTACIONKUNAÑA KAQTINPAS IMA LLAKIÑA KAQTINPAS QATIKUSHALLAY JESUSTAQA

4. ¿Imaninantan Jesús nisharqan “ñak’arina k’aspinta apachun” nisqanwan? (Lucas 9:23).

⁴ Bautizakusqayki qhepamanqa manan llapa imapas munaychu kanqa. Jesuspunin willarqan imaynas sapanka qatikuqnin “sapa punch’ay ñak’arina k’aspinta apanan” karqan chayta (leey Lucas 9:23). Ichaqa, “qatikamuwaq runakunaqa tukuy tiempon ñak’arinqa”, ¿nishanmanchu karqan Jesús chaywan? Manan. Payqa willasharqan imaynas bendicionkunataña chaskisun chaypas, sasachakuykunaqa kananpuni karqan chayta. Mayninqa sinchi nanaypin tarikunanchis karqan (2 Tim. 3:12).

5. Jesuspa nisqanman jinaqa, ¿imakunatan chaskinqa Diospa gobiernonrayku imatapas saqeqqa?

⁵ Bibliata estudiasqaykiman jinaqa yaqapaschá familiaykiqa imaymanapi jark’akurqasunki, chaymantapas imakunatapaschá saqenayki karqan Diospa gobiernonta ñaupaqman churanaykipaq (Mat. 6:33). Chaykunatachus pasashanki chayqa, Jehová Diosqa yachanmi payrayku tukuy ima ruwasqaykita (Heb. 6:10). Yaqapaschá kausayniykipi rikushankiña Jesuspa simin junt’akusqanta, paymi nirqan: “Pipas wasintapas, wayqenkunatapas, panankunatapas, mamantapas, taytantapas, wawankunatapas, chajrankunatapas, noqarayku allin willakuykunarayku ima saqeqqa qatikachasqan kanqa; ichaqa pachaj kutitawanraqmi kay tiempopi chaskinqa wasikunata, wayqekunata, panakunata, mamakunata, wawakunata, chajrakunata ima; jamuq tiempopitaq wiñay kausayta chaskinqa”, nispa (Mar. 10:​29, 30). Bendicionkuna chaskisqaykiqa manan igualakunmanchu imapas saqesqaykiwanqa (Sal. 37:4).

6. ¿Imaraykun bautizakusqanchis qhepamanpas kallpachakushanallanchis aychaq munapayaynin contra qaqata sayananchispaq?

⁶ Bautizakusqayki qhepamanpas kallpachakushanallaykin kanqa “aychaq munapayaynin” contra qaqata sayanaykipaqqa (1 Juan 2:16). ¿Imarayku? Bautizakunchisña chaypas juchasapa runallan kashanchis. Mayninqa yaqapaschá apóstol Pablo jina ninki: “Noqaqa maytapunin sonqoypi kusikuni Diospa kamachikuyninwan; cuerpoypin ichaqa waj kamachikuyta reparani, chay kamachikuyqa juchaq kamachikuyninmi, chay kamachikuymi yuyayniypi kaq kamachikuy contra kashan, ima munasqantataq noqawan ruwan”, nispa (Rom. 7:​22, 23). Mayninqa yaqapaschá chay mana allinkuna contra sayasqaykipi sayk’usqa jina kanki. Ichaqa Diosman promesa ruwasqaykipichus piensanki chayqa, kallpachakunkin chay tentacionkunaman ama urmanaykipaq. Chaymantapas Diosman entregasqa kasqaykin yanapasunki ama faciltachu ima juchamanpas urmanaykipaq. ¿Imaraykun chayta ninchis? Chayta qhawarisun.

7. ¿Imaraykun nisunman “Diosman entregasqa kasun chayqa atisunmi pay sonqollapuni kayta” nispa?

⁷ Pipas Jehová Diosman entregakuqqa pay kikintan negakushan, ¿imaninantaq chayri? Chaywanmi ima munaynintapas “mana” nishan, Diospa cheqnisqan tukuy imatan “mana” nishan (Mat. 16:24). Chhaynataq chayqa ima pruebapipas tarikuspaqa manan tapukusunraqchu “¿imatan ruwasaq?” nispaqa. Noqanchispaqqa juj ruwayllan imapas kanqa. Arí, Jehová Diospa sonqonta kusichiyllan imamantapas ñaupaqpi kanqa. Payman entregakuspan “mana” niranchisña llapa juj ruwaykunataqa. Mana iskayaspan Diospa sonqollantapuni kusichisunchis, Job jinataqmi kasunchispas, paymi imaymana sinchi llakipi tarikushaspa nirqan: “¡Wañupunaykaman noqaqa Dios sonqollapuni kasaq!”, nispa (Job 27:5).

8. ¿Imaraykun nisunman “Diosman promesa ruwasqanchispi yuyaymanasun chayqa manan faciltachu ima tentacionmanpas urmasun” nispa?

⁸ Diospa munayninta ruwananchispaq promesa ruwasqanchispi yuyaymanasun chayqa, manan faciltachu ima tentacionmanpas urmasunchis. Chaypaq kaypi piensasun, Diosman entregasqa kasqanchispi piensasun chayqa, ¿asipayasunmanchu pujllapayasunmanchu mayqen casarasqatapas? Manan ¿riki? Diosman entregakushaspan chaykuna ruwaytaqa “mana” niranchisña. Ima mana allinpas mana sonqonchispi saphichakunqachu chayqa manan sasataraqchu chayta t’irashasunchis. Faciltan karunchakusun “millay runakunaq purinan” ñanmantapas (Prov. 4:​14, 15).

9. ¿Imaraykun nisunman “Diosman entregakusqanchispi piensasun chayqa, yanapawasunmi paypa munayninta ñaupaqman churananchispaq” nispa?

⁹ Llank’anata maskhashaspa juñunakuyman rinanchista jark’aq jina llank’anata tarisunman ¿chayri? ¿Imatan ruwasunman? Chhaynapi tarikuspaqa manan ni piensanaraqchu ni “imatan ruwasaq” ninaraqchu. Manaraq ima llank’anatapas tarishaspan ñaupaqmantaña piensananchis karqan chhayna llank’anakunataqa ama chaskinanchispaq. Wakinqa ima llank’anamanpas jaykuruspañan ninku: “¿Imatan ruwasaq juñunakuyman rinaypaq?”, nispa. Manan chay ruwayqa allinchu kanman, chaykunapipas Jesuspa ejemplonqa yanapawasunmanmi. Payqa tukuy ima ruwasqanpin munarqan Diospa sonqon kusichiyta, pay jinan noqanchispas kananchis. Manapunin munasunmanchu Diospa cheqnisqan ruwaykuna ruwaytaqa (Mat. 4:10; Juan 8:29).

10. ¿Imaraykuy nisunman “Jehová Diosqa yanapawasunpunin Jesuspa qhepallanta purinanchispaq” nispa?

¹⁰ Sasachakuykuna tentacionkuna iman yanapawasun imaña kaqtinpas Jesuspa “qhepallantapuni purisqanchista” rikuchinanchispaq. Jehová Diosqa yanapawasunpunin chaypaq. Bibliapipunin nin: “Diosqa junt’aqpunin, chaymi mana dejanqachu mana aguantanaykichiskama tentasqa kanaykichistaqa; aswanpas tentasqa kashaqtiykichismi payqa yanapayta qosunkichis, chhaynapi aguantanaykichispaq”, nispa (1 Cor. 10:13).

¿IMATAN RUWANA JESUSPA QHEPALLANTAPUNI PURINAPAQ?

11. ¿Imakunatan ruwawaq Jesusta qatikushanallaykipaq? (Qhaway kay parrafopaq fotokunata).

¹¹ Jesusqa tukuy sonqon Jehová Diosta serviq, chaymantapas tukuy tiempon paypa yanapayninta mañakuq (Luc. 6:12). Pay jinan noqanchispas ruwananchis. Bautizakusqanchis qhepamanqa imakunachá Diosman qayllaykachiwasunman chaykunatan ruwananchis. Bibliapin nishan: “Maykamachus iñiyninchispi wiñarqanchis chayman jinapuni allinta purisun”, nispa (Filip. 3:16). Mayninqa yaqapaschá imakunatas wakin hermanokuna Diosta astawan servinankupaq ruwarqanku chaymanta willakuykunata uyarinki. Wakinqa yaqapaschá Diospa Gobiernonmanta Willanapaq Escuelaman rirqanku, wakintaq maypichus yanapanata munashanku chay llaqtakunaman astakurqanku. Qanpas, ¿atiwaqchu chay ruwayta? ¡Atinki chayqa ruway! Jesusta qatikuqkunaqa imaymanatan ruwashanku Diosta astawan servinankupaq (Hech. 16:9). Ichaqa, ¿manachus atiwaqraq chayri? Manan chayraykuchu pisipaq qhawarikunayki, Diospaqqa tukukuykama aguantaymi imamantapas aswan allinqa (Mat. 10:22). Jehová Diosqa munan atisqaykiman jina imatapas ruwanaykitan, chaywanmi payqa kusikunqa. Chaykunatachus ruwanki chayqa bautizakusqayki qhepamanpas qatikushallankin Jesustaqa (Sal. 26:1).

12, 13. ¿Imatan ruwawaq ganasniyki pisiyaqtin? (1 Corintios 9:​16, 17; qhaway “¿Imatan ruwana carrerata phawashanallapaq?” nisqa willakuyta).

¹² Diosmanta ima mañakusqaykipas yanqa-yanqalla kaq simikunalla kapushan ¿chayrí? Diosmanta willaypas manaña gustapushasunkichu ¿chayrí? Bibliata leeypas manaña ñaupaqpi jinachu gustapusunki ¿chayrí? ¿Imatan ruwawaq chhaynakunapi tarikuspa? Bautizakusqayki qhepaman chhaynakunapi tarikushanki chayqa, manan Diospas espiritunta qechupusunkiman karqan jinataqa qhawarikunaykichu. Juchasapa kasqanchisraykun mayninpiqa chaykuna pasan. Ganasniykichus pisiyapushan chayqa apóstol Pabloq ejemplonpi piensay. Payqa tukuy atisqantan kallpachakuq Jesusta qatikunanpaq, chaywanpas yacharqanmi mayninpiqa ganasnin pisiyananta (leey 1 Corintios 9:​16, 17). Paymi nirqan: “Manaña noqachu chay ruwayta ajllakurqani chaypas, ruwanaypunin chaytaqa, chaypaq churasqa kasqayrayku”, nispa. ¿Imatan chaywan nisharqan apóstol Pablo? Mayninpi ganasnin pisiyaqña chaypas kallpachakuqpunin Diospa munayninta ruwananpaq.

¹³ Pablo jina ama sonqoykiq pisikallpayasqanwanchu pusachikuy. Aswanpas tukuy atisqaykita kallpachakuy manaña ganasniyki kanchu chaypas allin kaqllatapuni ruwanaykipaq. Chayta ruwanki chayqa, tiempowanqa manañan nishutachu sonqoyki pisipanqa. Chaymantapas Dios servisqaykipi imaymana ruwaykunapi participanki chayqa bautizakusqayki qhepamanpas qatikushallankin Jesustaqa. Qanta rikuspan hermanokunapas kallpachakunqaku chayta ruwanankupaq (1 Tes. 5:11).

“QHAWARIKUSHALLAY IMAYNAS KASHANKI CHAYTA”

14. ¿Imatan sapa kutilla qhawarinayki, imaraykun chayta ruwanayki? (2 Corintios 13:5).

¹⁴ Bautizakunkiña chaypas allintan t’aqwikunayki otaq qhawarikunayki imaynas vidayki kashan, ima ruwaykunamansi qokushanki chayta (leey 2 Corintios 13:5.) Qhawarikuy, ¿sapa p’unchaychu mañakunki? ¿Sapa p’unchaychu Bibliatapas leenki, estudianki ima? ¿Sapa juñunakuymanchu rishanki? ¿Lloqsishallankichu Diosmanta willaqpas? Kallpachakuy kusisqa chaykunata ruwanaykipaq. Yaqapaschá tapukuwaq: “¿Atiymanchu jujkunaman Bibliamanta yachachiyta? ¿Imatan ruwayman Diosmanta kusisqa willanaypaq? ¿Sut’intachu Dioswan imatapas rimani? ¿Confianichu paypi? ¿Kallpachakunichu juj juñunakuymanpas ama faltakunaypaq? ¿Imatan ruwayman juñunakuyta tukuy yuyaywan uyarinaypaq chaypi participanaypaqpas?”, nispa.

15, 16. ¿Imatan yachasunman Robert hermanoq willakusqanmanta?

¹⁵ Chaymantapas qhawarikunanchismi imapis facilta urmasunman chayta. Chayta ruwayqa ancha importanten, chaypaq qhawasun juj experienciata. Robert sutiyoq hermanon willakun: “Iskay chunka wataypi kashaqtiymi maynin horakunalla llank’aq kani. Juj p’unchaymi llank’asqay qhepaman llank’anapi juj compañera wasinman invitawarqan, “manan wasiypi pipas kanchu, jakuchu juj rato chaypi kusirikamusun” nispan niwarqan. Qallariypiqa iskayaspan imaymana cuentokunata nisharqani, chaymantan ichaqa “mana” nirqani. Willarqanitaqmi imaraykus mana riymanchu chayta”, nispa. Chay hermanoqa manan urmarqanchu chay tentacionman, chayqa allinpunin karqan. Chaymantas ichaqa piensaykuspa nikusqa: “Jujniraymantachus jina kaytaqa ruwayman karqan”, nispa. Paymi nillantaq: “Manan José jinachu usqhaylla “manan” nirqani. Joseqa Potifarpa esposantan jujllapi “manan” nirqan (Gén. 39:​7-9). Qallariypiqa sasan noqapaqqa karqan “manan” niy, chaypin repararqani imaynas astawanraq Jehová Diosman jujllachakunay karqan chayta”, nispa.

¹⁶ Kaypi piensasun, tentacionsi qanman chayamusunkiman, qantaq ichaqa mana chayman urmawaqchu, chaywanpas yaqapaschá Robert jina ruwawaq. Yaqapaschá tapukuwaq: “¿Unaymantachu “manan” nirqani, icha apuraychu “manan” nirqani?”, nispa. Chaypi allinyanayki kashan chayqa ama chaywanqa pisipaychu, aswanpas kusikuy imakunapichus allinyanayki kashan chayta reparakusqaykimanta. Jehová Dioswan parlariy, kallpachakuytaq mana iskayaspa paypa siminta kasukunaykipaq (Sal. 139:​23, 24).

17. Robertpa willakusqan jina Dios sonqo kasun chayqa, ¿imaynatan payta qhawarichisunchis?

¹⁷ Robertpa willakusqanqa manan chayllapichu tukun. Paymi nillantaq: “Chay compañerayqa “mana” niqtiymi niwarqan: Kunanqa yachaniñan imaynas kankichis, nispa. Jinan noqaqa nirqani: ¿Imaniytataq munawashankiri?, nispa. Paypaqa juj amigonsi Testigo kasqa, paysi nisqa: Llapa Testigo wayna-sipaskunan iskay vidata apanku. Ima mana allin ruwaypas paykunaman presentakunman chayqa, mana iskayaspan ruwallankuman, nispa. Jinas compañerayqa noqawan juj pruebata ruwayta munasqa. ¡Maytan kusikuni Jehová Diospa sutinta mana qhellichasqaymanta!”, nispa.

18. ¿Imatan ruwashanallaykipuni bautizakusqayki qhepamanpas? (Qhaway “Iskay allin yachachikuykuna” nisqa willakuyta).

¹⁸ Jehová Diosman entregakuspa bautizakunki chayqa, imaña kaqtinpas sutinta ch’uyanchay munasqaykitan rikuchishanki. Jehová Diosqa rikushanpunin ima llakikunapis tarikushanki chayta, ima tentacionkunatas aguantashanki chaytapas. Payqa rikushanmi maytas kallpachakushanki pay sonqollapuni kanaykipaq chayta, chayman jinan bendiciontapas churamusunki. Kaytaqa amapunin qonqankichu: Payqa qosunkin “espiritunta” allin kaqta ruwanaykipaq (Luc. 11:​11-13). Jehová Diospa yanapayninwanqa bautizakusqayki qhepamanpas qatikushallankin Jesustaqa.