Imaymana runakunan qespichisqa kanqa
1. ¿Imamantan dependen Dioswan allinpi kanapaq?
1 Ancha munakuyninpin Jehová Diosqa, qespichiq ñanta kicharin, Payqa munanmi “llapa runa qespichisqa kananta, cheqaq-kayta reqsinankutapas” (1 Tim. 2:3, 4). Dioswan allinpi kayqa manan yuraq, yana, q’ello kaymantachu, nitaq allin reqsisqa kaymantachu, imaymana ruway atiq kaymantachu, otaq allin rikchayniyoq kaymantapaschu, aswanmi Jesuspa wañusqanpi iñisqanchismanta (Juan 3:16, 36). Jehová Diosta yanapaqkuna hina, manan sonqonchispi cheqnipakunachu Diospa chaskiy munasqan runakunataqa.
2, 3. ¿Iman yanapawasun runakunaq hawallanta qhawaspa mana juzgananchispaq?
2 Ama juzgasunchu. Jehová Diosqa runakunaq sonqonpi allin kaqtan rikun mana sayapakuspa (1 Sam. 16:7). Jehová Diosqa yachanmi imayna kanantapas. Chayrayku Payta kusichiy munaqkunataqa askhata munakun (Ageo 2:7). ¿Dios hinachu huk runakunata rikunchis?
3 Serviciopi tarisunmanmi millakunapaq hina runakunata. Thanta p’achayoqpaschá kanku, otaq mana allin p’achasqapas, qhelli sunkhayoqpas, otaq senqankupi siminkupipas anilloyoq. Wakinqa mana wasiyoqpaschá. Wakinqa millaytapaschá tratawanchis. Manan ninanchischu, kay runakunaqa manan hayk’aqpas Jehová Diosta yupaychanqakuchu nispaqa, aswanmi rikuna Diosta yupaychanankupaq hina, “ñoqanchispas manaraq iñishaspaqa mana yuyayniyoqmi karqanchis, mana kasukuq, pantachisqa” (Tito 3:3). Chayrayku llapa runakunaman willananchis, ama hawallanta qhawaspachu ninanchis kay runaqa manan Diospaq hinachu nispaqa.
4, 5. ¿Imatan yachachiwanchis Jesuspa ruwasqan, Pabloq ruwasqanpas?
4 Qallariy siglopi ejemplokuna. Jesucristoqa tiempotan qokuran huchasapa runakunata yanapananpaq (Luc. 8:26-39). Cheqnikuranña millay ruwaykunata chaypas, yacharanmi millay ñanman runakunaq urmayunanta (Luc. 7:37, 38, 44-48). Chayrayku comprensivo karan “paykunata khuyapayaykurqan, mana michiqniyoq ovejakuna hina kaqtinku” (Mar. 6:34). ¿Ñoqanchispas pay hina kasunmanchu?
5 Pablotapas rumiwanmi ch’aqeranku, p’anayuranku, carcelmanpas wisq’aranku (Hech. 14:19; 16:22, 23). ¿Phiñakuranchu khayna ñak’arisqanmanta, wakin nacionkunawan ayllukunawanpas tiempoyta usuchishani nispa? Manan. Payqa yacharanmi llapa ayllukunapi allin sonqoyoq runakuna kasqanta, paykunatan tariytapuni munaran. ¿Chhaynatachu rikunchis llaqtanchispi llapa runakunata, maymantaña kaqtapas, imayna kawsayniyoqña kaqtinkupas?
6. Congregacionpi huñunakuyman chayllaraq hamuqkuna, ¿imaynatan qhawarinqaku sumaq chaskisqanchista?
6 Runakunata sumaqta chaskisun. Askhan Diospa llaqtanpi kaqkunaqa kusikunku, congregacionpi wayqe panakuna sumaq chaskisqankumanta, manan paykunaq trasantachu qhawasqaku. Alemaniapin millay sunkhayoq, rikrankama chukchayoq, qhelli p’achayoq runa Salón del Reinoman haykusqa. Millay runa hinaña reqsisqa karan chaypas, huñunakuypin sumaqta chaskisqaku. Chaywan anchata admirakuspan, hukkaq semanapi kutimusqa. Pisi tiempollapi imayna kasqanta tiqrapusqa, manaña pitasqachu, tiyasqan warmiwanpas casarakapusqa. Chay qhepamantaq warmi qhari wawakunantin huk nisqalla Jehová Diospa munayninta ruwasqaku.
7. ¿Imaynatan noqanchispas, Diosninchis hina mana pimanpas sayapakuq kananchis?
7 Mana pimanpas sayapakuq Diosninchis hina, ñoqanchispas llapa runakunata invitasun Diospa ancha munakuyninta chaskikunankupaq.
[3 paginapi willakuy]
“Diosqa manan mayqen runamanpas sayapakunchu, aswanpas may suyupipas payta yupaychaspa chanin-kayta ruwaqtaqa chaskinmi” (Hech. 10:34, 35).