Allinkaqta ruwasun kaqninchiswantaq yanapasun
1 Dorcasqa “ancha allinkunata ruwaq, wakchakunatapas yanapaq” (Hech. 9:36, 39). Yanapakuq sonqoyoq kasqanmantan Jehová Diospas, reqsiq masinkunapas munakuran. Hebreos 13:16 nisqan hina: “Amataq allinkaqta ruwaytapas yanapakuytapas qonqaychischu, chay hina sacrificiokunawanmi Diosqa kusikun”. ¿Imaynatan kunan allinkaqta ruwasunman, kaqninchiswanpas hukkunata yanapasunman?
2 Kaytaqa ruwasunmanmi ‘qhapaq-kayninchiskunawan’ runamasinchista yanapaspa (Prov. 3:9). Qolqe qosqanchismi yanapan teqsimuyuntinpi Reinopaq Salonkuna ruwakunanpaq, Asambleapaq Salonkuna, sucursalkunapas ruwakunanpaq. Qoyusqanchiswanmi millonninpi runakuna Diospa yachachisqanwan beneficiakunku, wayqe panakunawanpas espiritualpi kallpachanakunku.
3 Kallpachasun. Ima ñak’ariykuna kaqtinpas, Jehová Diospa llaqtanqa liston kashan, iñiq masinkunapaq mana iñiqkunapaqpas ‘allinkaqta ruwananpaq’ (Gál. 6:10). Franciapin huk químico ruwaq fábrica phatasqa, fabricaq ladonpi warmi qhari tiyaqmi kayta willanku: “Cristiano wayqe panaykun usqaylla yanapaqniyku hamuranku. Edificiopi tiyasqayku wasitan pichaysiwaranku hukkunaq tiyasqantapas. Wasimasiykun admirakuranku chhaynaniraq hamusqankuwan”. Huk hermanan nillantaq: “Ancianokunan hamuranku kallpachawaqniyku, qolqemantapas, mikhunamantapas, imamantapas kaytan astawanqa munarayku” nispa.
4 Imakunawanña runamasinchista yanapasunman chaypas, aswan allinqa Bibliamanta yachachiymi, Jehová Diospa prometesqan ‘wiñay kawsay suyakuypiwan’ (Tito 1:1, 2). Bibliaq willasqanmi kallpachan kay pachapi imaymana ñak’ariykunamanta, huchapi kawsasqanmantapas llakikuqkunata (Mat. 5:4). Chayrayku allinkaqta ruwashallasun, ima kaqninchiswanpas ukkunata yanapaspa (Pro. 3:27).