Munakuywanmi allinta predicasun
1 Jesusmi niran: “Ñoqaman hamuychis [...] ñoqan samachisqaykichis”, nispa. (Mat. 11:28.) Kay sumaq rimasqanpi rikunchis Jesús maytapuni runakuna munakusqanta. Kay pachapi runakunaqa sinchi llakisqan kashanku mana munanakuy kasqanmanta, chaymi cristianokunaqa Jesusman rikch’akunanchis runakunata munakuspa. ¿Imaynatan munakuyninchista rikuchisunman predicasqanchis runakunaman?
2 Rimayninchiswan: Runakunata munakuspan Jesusqa maypiña kashaspapas allin willakuykunata predicaran (Juan 4:7-14). Munakuymi yanapawasun maypiña tarikuqtinchispas mana manchakuspa predicananchispaq. Soqta watachayoq erqecha hospitalpi doctorta suyashanankama ladonpi tiyashaq warmita sumaqta predicasqa. ¿Iman kallpacharan predicananpaq? Paymi willakun: “Yuyaykuranin kay warmiqa necesitanmi Jehová Dios reqsiyta”, nispa.
3 Hukkunapi interesakusqanchista rikuchisun kusisqa llanp’u simiwan rimaspa. Munakusqanchistapas rikuchillanchistaq rimasqankuta allinta uyarispa, imakuna llakichisqanpipas interesakuspa (Pro. 15:23). Jesús hina noqanchispas aswanta willananchis Diospa Reinonmanta, Jehová Dios runakunata khuyapayasqanmantapas (Mat. 24:14; Luc. 4:18).
4 Ruwayninchiswan: Jesusqa allintapunin repararan runakunaq ima necesitasqanta, chayman hinataqmi yanaparan (Mat. 15:32). Noqanchispas predicasqanchispi tarillanchis yanapana runakunata. Huk pananchismi predicasqanpi rikusqa huk warmita, telefonopi rimamuqninta mana entiendeshaqta. Chaymi pananchis yanapasqa telefonopi rimamuqpa nisqanta t’ikraspa. Pananchispa sumaq yanapasqanta rikuspan warmiqa predicasqanta uyariran, Biblia estudiaytapas qallariran. Kallantaq huk willakuypas, huk wayqenchis revisitata ruwashaspa wasiyoqta tarisqa sinchi sayk’usqata, hatun tiyana horqosqan punkupi chakarukusqan rayku. Hinan wayqenchis yanapasqa horqoypi, wiraqochataq anchata agradecekusqa. Hinaspataq chay tiyanapi tiyaykuspanku Biblia estudiayta qallarisqaku.
5 Predicasqanchiswanmi rikuchinchis Diostapas runamasinchistapas munakusqanchista (Mat. 22:36-40). Sichus rimayninchiswan ruwayninchiswan munakuyninchista rikuchisun chayqa, allin sonqoyoq runakuna reparanqaku cheqaqpi kasqanchista.