“Manan uyariyta munanichu”
1 Chhaynatan askha runakuna predicaqtinchis niwanchis. ¿Iman yanapawasunchis chhaynata niqtinku mana pisipananchispaq? ¿Imatan ruwananchis allin willakuykunapi interesakunankupaq?
2 Kusikuyninchis ama chiriyachunchu: Kusisqalla kanapaqqa yachananchismi ima rayku runakuna mana uyarikunkuchu chayta. Wakinqa mana iñinkuchu Bibliapi, evolución nisqapi creesqanku rayku otaq mana Diospi iñiq familiapi wiñasqanku rayku. Wakintaq mana uyariyta munankuchu mana allin ruwaykunata religionpi rikuspanku, otaq sinchi llakisqa mana ima suyakuyniyoq tarikuspanku (Efe. 2:12). Wakintaq predicasqanchista mana ‘reparankuchu’ ruwayninkunawan sayk’usqa tarikuspanku (Mat. 24:37-39).
3 Manaña uyarikunkuchu chaypas, anchatan kusikunchis predicayninchis Diosta hatunchasqanta yachaspa (1 Ped. 4:11). Chaymantapas cheqaq kaymanta rimaspaqa iñiyninchista kallpachanchis manaña uyariqtinkupas. Kallpachakunanchismi runamasinchista Diospa rikusqanta hina rikunanchispaq. Payqa khuyapayaranmi Nínive llaqta runakunata, paykunaqa ‘manan repararankuchu allinkaqta mana allinkaqmanta’ (Jon. 4:11). Llaqtanchispi runakunaqa necesitankun allin willakuykuna uyariyta. Chay rayku ama pisipasunchu, aswanpas tukuy atisqanchista ruwasun Bibliapi interesachinanchispaq.
4 Llaqtaykipi imachus sucedesqanmanta rimay: Wasiyoqwan rimayta qallarishaspaqa willawaqmi llaqtapi imachus sucedesqanmanta, hinaspa tapuwaq: ¿Ima ninkitaq chaymanta? nispa. Uyariy kutichisqanta, hinaspataq Bibliaq sumaq willakuyninta qhawachiy. Huk kutinmi wayqenchispa llaqtanpi hatun llaki sucedesqa, chaymi wayqenchisqa runakunaman predicasqa chay hatun llakimanta. Paymi willakun: “Chaymanta rimaqtiymi runakuna sonqonkuta kichariwaranku. Askha runakunawanmi chay p’unchay sumaqta rimarani llakikuyninkupi interesakusqay rayku”, nispa.
5 Diospa Reinonmi runaq llapa sasachakuyninkunata tukuchinqa. Chaymi reparanayki mayqen sasachakuychus uyariqniykita aswanta llakichisqanta. Chhaynapi yaqapaschá munanqa Bibliaq sumaq suyakuy qosqanmanta willanaykita. Mana chayqa ‘hukpiña uyarisunkiman’ (Hech. 17:32).