‘Rimakuyniykichisqa [...] kachiwan kachichasqa hinapuni’ kachun
1. ¿Imaynapin rimayninchis “kachiwan kachichasqa hina” kanan?
1 “Rimakuyniykichisqa ancha sumaqpuni kachun, kachiwan kachichasqa hina, ahinapin yachankichis imaynatachus sapankamanpas allinta kutichinaykichista.” (Col. 4:6.) Rimayninchisqa misk’in kanan uyariqninchiskunapaqpas ancha sumaqmi kanan, chhaynapin kachiwan kachichasqata hina rimasun. Chhayna rimayqa ancha allinpuni kanqa predicayninchispi.
2. ¿Imaynatan Jesús Samaria llaqtayoq warmita predicaran?
2 Jesusmanta yachasun: Jesús p’uytuq qayllanpi samashaqtinmi Samaria llaqtayoq warmi p’uytumanta unu aysaq hamuran, Jesustaq chay warmiwan rimayta qallariran. Chay warmiqa askha kutitan rimasqanpi rikuchiran judío runakuna Samaria runakunawan cheqninakusqankuta. Nillarantaqmi, Samaria llaqtayoq runakunaqa Jacobpa mirayninmanta kayku nispa, judío runakunan ichaqa niqku, Samaria runakunaqa wak llaqtamanta runakunaq mirayninmi kanku, nispa. Chhaynataña rimaqtinpas Jesusqa sumaqllata rimapayaran, chhaynapin predicasqanwan chay warmita huk runakunatapas yanaparan (Juan 4:7-15, 39).
3. ¿Imaynatan Jesuspa predicasqanta hina predicasunman?
3 Ñoqanchispas, predicaspaqa ‘sumaq allin willakuykunatan willananchis’ (Rom. 10:15). Willasqanchisqa runakunaq allinninpaqmi kanan sumaqtaqmi kananpas, chaymi runakunaq pantasqa iñisqankumanqa mana churapakunanchischu. Pantasqa yachachikuykunataña runakuna niwasunman chaypas, manan kaqratochu ninanchis manan chhaynachu nispaqa. Rimasqankutaqa makillan uyarinanchis, chhaynapin reparasun allin rimasqankuta, chay allin rimasqankumantataq nisunman allinmi chay nisqaykiqa nispa. Chayta nispaqa yaqapaschá huk textollatapas leepusunman.
4. ¿Imatan ruwasunman ch’aqwayllata munaq runakunawan tupaqtinchis?
4 ¿Imatan ruwasunman ch’aqwayllata munaq runakunawan tupaqtinchis? Chay runakunawan tupaqtinchispas munakuq kasqanchista llanp’u sonqo kasqanchistawan rimasqanchispi rikuchinanchis (2 Tim. 2:24, 25). Reinomanta willasqanchista mana uyarikuqtinkutaq, sumaqllata mana phiñachispalla ripunanchis (Mat. 7:6; 10:11-14).
5. ¿Iman karan pananchispa llanp’u simiwan kutichisqanmanta?
5 Llanp’u simiwan kutichisun: Huk pananchismi wasimasinta predicayta munaran, wasimasinmi ichaqa sinchita phiñakuspa millayta k’amiran. Pananchistaq llanp’u simiwan niran: “Panpachaykuway, manan chhaynapi tarikunaykitaqa yuyaykuranichu. Huk p’unchayña kutimusaq”, nispa. Chay warmiqa iskay semanamanta pananchispa wasinta rispa panpachayta mañakuran, nirantaq kunanqa munani willawanaykita nispa. Llanp’u simiwan kutichiyqa ancha allinpunin (Pro. 15:1; 25:15).
6. ¿Imaraykun misk’i simiwan rimananchis predicaspa?
6 Chhaynaqa, kallpachakuy misk’i simiwan allin willakuykunata predicanaykipaq. Manaña ñoqanchista uyariwasunchu chaypas, yaqapaschá hukpi wayqe pananchiskunata uyarinkuman.