Yanapasun mana allin leeqkunata
1. ¿Imaynan kanku wakin Bibliamanta yachay munaqkuna?
1 Predicaspaqa tarinchispunin Bibliamanta yachay munaq runakunata, paykunamanta wakinmi ichaqa mana allintachu leenku. ¿Atisunmanchu paykuna yanapayta? Arí, atisunmanmi.
2. ¿Imaraykun respetananchis mana allin leeqkunata? ¿Imaynatan chayta ruwasunman?
2 Respetananchismi: Jehová Diosta servinapaqqa manan allin educasqaraqchu kana, aswanmi payqa llapa allin sonqoyoq runakunata chaskin (1 Sam. 16:7; Pro. 21:2). Chayraykun ñoqanchispas mana allin leeqkunataqa munakuywan yachachinanchis. Chaymantapas sichus paykunata respetasun, pacienciayoqtaq kasunpas chayqa, yaqapaschá munanqaku astawan yanapananchista (1 Ped. 3:15). Chaypaqqa manapaschá leechisunmanchu estudiota qallarishaspaqa. Tiempowanqa Bibliamanta yachasqanman hina, yaqapaschá paykunallamanta munanqaku allin leeyta, chhaynapi Diospa Simin Qelqata “tutapas p’unchaypas” leenankupaq (Sal. 1:2, 3).
3. ¿Imaynatan yanapasunman mana allin leeqkunata?
3 ¿Imaynatan yachachisunman? Librokunapi otaq folletokunapi kaq dibujokunawan yachachiymi kusa kanman. Chhaynapin paykunaqa imatapas allinta yuyarinqaku. Estudianteman qhawachiy huk dibujota hinaspa tapuy imatachus rikusqanta. Chaymanta tapullaytaq imatachus chay dibujo payman yachachin chayta willanasuykipaq. Chaymantataq chay dibujomanta rimaq textokunata leey. Chay dibujokunaqa yanapallasunkimantaqmi imachus yachasqaykichismanta yuyarichinaykipaqpas. Ichaqa ama ñishutaqa estudiachiychu, aswanpas imatachus estudiachishanki chayllata allinta entiendechiy. Chaymantapas estudiasqaykichis qelqallamanta yachachiy ama hukkunamantaqa. Chaypi kaq textokunataqa Bibliamantapunin leenayki chaymantataq tapuy imakuna entiendesqanta. Chhaynata ruwanki chayqa, yaqapaschá estudiaqqa kallpachakunman aswan allinta leenanpaq, chhaynapi payllamanta Bibliaq yachachisqanta astawan yachananpaq.
4. ¿Imaynatan estudiantekunata yanapasunman allinta leenankupaq?
4 ¿Imaynatan yanapasunman allinta leenankupaq? Wakin runakuna manaña allintachu leenku chaypas, allintan entiendenkuman ima yachachisqanchistapas. Chaymi paykunaman qosunman grabasqa librokunata revistakunatawan chhaynapi uyarinankupaq. Yaqapaschá paykunaqa revistankuwan otaq libronkuwan ima qatipankuman leeqta, chaypas yanapanmanmi allinta leenankupaq. Chaymantapas yanapachikunkumanmi Kallpachakuy leenaykipaq qelqanaykipaq nisqa folletowan. Wakin congregacionpi umalliqkunan mana allin leeqkunapaq escuelata aparichinku chhaynapi paykunata yanapanankupaq. Kaypi yachasqanchis hina, kallpachakusunyá mana allin leey yachaqkunata yanapananchispaq, chhaynapin paykunaqa “Diospa Simin Qelqakunata” allinta entiendenqaku, chaymantapas yaqapaschá aypankuman wiñay kawsaymanpas (2 Tim. 3:15).