Uyarinankupaq hina rimay

DISCURSO qoq mana uyarikunanpaq hina rimamuqtinqa, uyariqninkunan puñuywan aysachikunkuman. Predicaqchus sinchi bajochallata rimanqa chayqa, wasiyoqqa manan tukuy yuyaywanchu uyarinqa. Huñunakuypi kaqkunachus pisi kunkallawan tapuykunata kutichinkuman chayqa, manan hukkunata allintachu kallpachanman (Heb. 10:24, 25). Discurso qoqchus sinchi kunkawan rimamunman mana chhayna rimamunanpi chayqa, uyariqkunan huknirayta qhawarinkuman, phiñakunkuman imaraq (Pro. 27:14).

Pikunaman rimamunaykita allinta qhawariy. ¿Pikunamanmi rimapayashanki? ¿Huk runallamanchu, huk familiamanchu, predicacionman lloqsinankupaq huñusqa kashaq iñiqkunamanchu, iñiq t’aqamanchu, hatun huñunakuypi kaqkunamanchu? Chayman hinan kanan kallpawanchus pisi kallpallawanchus rimamunaykipaqqa.

Diosta serviqkunaqa ñawpaqmantaraqmi ancha askha runakunaman rimaykurqanku. Jerusalén llaqtapi yupaychana wasita Diospaq sapaqchashaqtinkun rey Salomonqa sayana patapi sayaykuspa Israel runakunaman “kunkayoqta” allin kaqta rimaykurqan, chay tiempopiqa manan karqanchu parlantekuna (1 Rey. 8:55; 2 Cró. 6:13). 33 watapi Pentecostés fiestapin Jerusalenpi kaq huch’uy t’aqa cristianokuna santo espirituta chaskikurqanku, hinan askha runakuna paykunaman huñuykurqanku uyarinankupaq, wakinqa yachayta munaspapunin, wakintaq yanqa asipayaqlla. Chaypin apóstol Pedro askha kasqankuta rikuspa “sayarispa kunkayoqta” paykunaman rimaykurqan (Hech. 2:14). Chaypi willasqanqa uyariqkunaq sonqonmanmi chayarqan.

¿Imaynatan yachawaq uyarinankupaq hinachu rimamushanki chayta? Chaypaq allinta qhawariy uyariqniykikunata. Wakinkuna sasachakushanku uyarinankupaq chayqa, aswan kallpachawanmi rimanayki.

Uyariqniykikuna imaynachus kasqankuman hinan rimapayanayki. Wakinqa sasachaspa uyariqmi kanku, chaymi huk chhikanta aswan kallpawan rimanayki. Ichaqa sinchi kurak kasqanrayku mana usqhaytachu kutichisunki chayqa, ama nishu alto kunkawanqa rimaychu, mana chayqa mana allintan qhawarisunkiman, mana respetowan rimaqta hina. Wakin llaqtakunapiqa nishu alto kunkawan rimaqkunataqa phiñakuqta otaq mana pacienciakuqta hinan qhawarinku.

Ima afanpas kaqtinqa aswan kallpawan rimay. Predicashaspaqa allintan tukuy imatapas reparananchis chayman hina rimananchispaq. Sichus carrokuna afanraq purishanku, wawakuna bullachakushanku, alqokuna kanipakushanku, otaq takikunapas televisionpas nishu fuerteta uyarikunman chayqa, alto kunkawanmi rimanayki. Ichaqa qati-qatilla wasikunaq kasqanpiqa wasiyoqqa phiñakunmanmi wasimasinkunaq uyarinanpaq hinataraq rimapayaqtiykiqa.

Huñunakuypi otaq hatun huñunakuykunapi rimamuq iñiqmasinchiskunapas liston kashananku imapas kaqtin aswan alto kunkawan rimamunankupaq. Wakin hatun huñunakuykunaqa campollapin ruwakun, chaymi chaykunapiqa mana rimankumanchu huñunakuy wasipi rimamunku chay hinataqa. Huk llaqtapin iskay misionerokuna discursota qorqanku huk wiraqochaq pationpi, chaypin ichaqa huk gallo sapa rato waqasharqan, qayllallankupi kaq plazapitaq runakuna afanakuspa fiestapi kasharqanku.

Discursota qoshaqtiykiqa qonqayllan rimasqaykita imapas mana uyarichinmanchu, chaymi suyanayki kanqa otaq aswan kallpawan rimamunayki kanqa. Calamina techoyoq wasipi discursota qoshaqtiyki qonqaylla para chayamunman chayqa, yanqapaqmi kanman rimasqayki, manan uyarisunkikumanchu, chaymi suyanayki kanqa chay pasanankama. Wawakunaq waqasqanpas tardeta chayamuqkunapas distraesunkimanmi, chayraykun yachanayki chaypaq hina aswan kallpawan rimayta, chhaynapin rimamusqayki uyariqkunaq allinninpaq kanqa.

Parlantekunaña kan chaypas, mayninpiqa discurso qoqqa aswan kallpawanmi rimanan. Wakin llaqtakunapiqa sapa kutillanmi qonqaylla k’anchay wañurqamun, chaymi discurso qoqkunaqa aswan kunkawan rimananku kanqa.

Imamanta rimasqaykiman hina kunkayki kachun. Imatapas sut’inta mana manchakuspa rimana kaqtinqa manan wañu-wañu kunkawanqa rimanachu. Sichus pitapas Diospa anyaykusqanmanta otaq huchachasqanmanta leeshanki chayqa, allin kallpawanmi leenayki, ichaqa imaynatachus runamasinchista munakunanchismanta leeshanki chayqa, huk-hinamantan leenayki. Chhaynaqa imamantachus rimashanki chayman hina kunkaykita yapaykuy otaq pisiyachiy, ichaqa ama kikiykita allinta qhawarichikunaykipaqchu chayta ruway.

Yuyariy imapaq rimasqaykita. Uyariqniykikuna imatapas ruwanankuta munaspaqa aswan kallpawanpaschá rimanayki kanqa; ichaqa imatapas huk-hinamanta yuyaykunankuta munanki chayqa, ama manchachiq hinachu rimay. Llakisqatataqchus kallpachayta munanki chayqa, llamp’u simillawan rimay.

Necesitakusqanman hina kunkayoqta rimay. Imatapas ruwashaqtin pitapas rimapayayta munanki chayqa, aswan kunkawanmi rimawaq. Chaymi tayta-mamakunapas kallpawan wawankuta waqyanku pukllasqanta saqespa wasiman hamunanpaq. Huñunakuyta otaq hatun huñunakuyta qallarichiq iñiqmasinchiskunapas kunkawanmi rimayta qallarinku. Predicacionpi pitapas llank’ashaqta rikunki chayqa alto kunkawanmi napaykunayki.

Pipas allintaña uyarishasunkiman chaypas, allin kunkawanmi rimashanallayki. Mana chayqa manapas allintachu preparakuwaq karqan otaq manapas qan kikiyki rimasqaykipi creewaqchu hinatan qhawarisunkiman.

Imatapas allin kallpawan kamachiqtiykiqa ratullan hukkuna kasukunkuman (Hech. 14:9, 10). Mayninpiqa allinmi kanman qaparisparaq rimay, sasachakuykunamantan hark’asunkiman. Chaypaq yachasunchis Filipos llaqtapi kaq carceleromanta. Paymi llapa presokunaq ayqekusqankuta yuyaspa wañuchikunanña kasharqan. Chayllamanmi Pabloqa kunkayoqta nirqan: “¡Ama imanakuypaschu, llapallaykun kaypi kashayku!” nispa. Chaymi carceleroqa manaña wañuchikurqanchu, Pablowan Silaswan allin willakuykunata willaqtinkutaq familiantin cristianoman tukupurqanku (Hech. 16:27-33).

¿Imaynatan allinyawaq? Wakinpaqqa sinchi sasan allin kunkawan rimay. Kunkanku mana chaypaq hina kaqtinmi sinchi bajochallata rimanku, chaywanpas kallpachakuspaqa atinkumanmi kunkawan rimayta, llamp’ullatapuni rimashanqaku chaypas. Allin kunkawan rimanaykipaqqa yachanaykin wayrata imayna samayta, imayna sayaytapas. Allin derechotan sayanayki, tiyashaspaykipas manan umayki k’umunanchu. Chaymantapas askhatan wayrata samanayki wiksayki huk chhikanta punkinankama. Necesitasqaykiman hina ukhuykimanta wayrata lloqsichispaykiqa atillankin allin kunkawan rimayta.

Wakin runakunataq nishu alto kunkawan rimanku. Yaqapaschá chhayna rimayman yachakurqanku afán ruway kasqanpi llank’asqankurayku. Wakinpa familianpiqa sinchi ch’aqwaymi karqan, chaymi altomanta rimaspalla piwanpas parlayta munanku. Paykunaqa “khuyapayakuq-kaywan, sumaq sonqo-kaywan, huch’uyyaykukuywan, llamp’u sonqo-kaywan, pacienciawan ima” p’achawan hina p’achakusqankuman hinan atinqaku sumaqllata rimayta (Col. 3:12).

Kaypi yachasqanchis hina, uyarinankupaq hina rimananchispaqqa allinta preparakunanchis, predicacionman sapa kutilla lloqsinanchis, Jehová Diosmantapas mañakunanchis. Chhaynaqa discursota qoshaspapas predicashaspapas allin uyarinankupaq hinan rimanayki, chhaynapin ima rimasqaykipas uyariqkunaq allinninpaq kanqa (Pro. 18:21).