Kuti-kutirispa rimay

ASKHA kutita imatapas yachachiwaqtinchisqa aswan allintan entiendenchis, chaymi allin yachachiqqa mana huk kutillatachu imatapas yachachinan. Chaymantapas kaq yachachikuyta huk-hinamanta yachachiqtinchisqa aswan allintan uyariqninchiskuna entiendenqaku.

Sichus uyariqniykikuna qonqankuman imamantachus yachachisqaykita chayqa, manan chayman hinachu yuyaykunqaku ruwanqakupas. Chayraykun allinta reparachinayki wakin yachachikuykunata, chaykunapi yuyaymanashanallankupaq.

Ancha Allin Yachachiqninchis Jehová Diospas chhaynatan yachachin. Chunka Kamachikuy Simikunataqa huk angelwanmi kunkayoqta Israel runakunaman willachirqan Sinaí orqopi. Chaymantataq Moisesman qorqan qelqasqata (Éxo. 20:1-17; 31:18; Deu. 5:22). Qhepamantaq manaraq Israel runakuna prometesqa hallp’aman haykushaqtinku Diosqa Moisesta kamachirqan chay kamachikuykunata yuyarichinanpaq, santo espiritunwantaq yuyaycharqan chaykunata qelqananpaq Deuteronomio 5:6-21 textoq nisqan hina. Chay kamachikuykuna ukhupin tarikurqan “Señor Diosta munakuychis tukuy sonqoykichiswan, tukuy almaykichiswan, tukuy kallpaykichispiwan” nisqa, chaytapas askha kutitan yuyarichirqan (Deu. 6:5; 10:12; 11:13; 30:6). ¿Imaraykun askha kutita yuyarichirqan? Jesuspa nisqan hina, ‘aswan chaniyoq ñawpaqkaq kamachikuy’ kasqanraykun (Mat. 22:34-38). Profeta Jeremiaswanmi Judá llaqtata iskay chunka más kutitaraq yuyarichirqan kasukuqpuni kanankuta (Jer. 7:23; 11:4; 12:17; 19:15). Profeta Ezequielwanpas soqta chunka más kutitan willachirqan llapa nacionkuna Jehová Dioslla ‘Señor Dios kasqanta reqsinankupaq’ (Eze. 6:10; 38:23).

Tawantin evangelio librokunapipas askha kutitan willakun Jesuspa wakin ruwasqankunamanta. Evangelio qelqaqkunaqa rikusqankuman hinan qelqarqanku Jesuspa wakin ruwasqankunata. Kikin Jesuspas askha kutitan kaq yachachikuyta yachachirqan, ichaqa hukniraymantañataq (Mar. 9:34-37; 10:35-45; Juan 13:2-17). Wañuchinankupaq pisi p’unchayllaña kashaqtinmi Jesusqa Olivos orqopi kashaspa iskay kutita nirqan: “Makilla kashaychis, manan yachankichischu ima horatachus Señorniykichispa kutimunanta”, nispa (Mat. 24:42; 25:13).

¿Imaynatan ruwasunman predicacionpi? Ñoqanchisqa munanchismi predicasqanchis runakuna imamantachus rimasqanchista yuyarinankuta. Chayraykun allinta yachananchis wakin nisqanchiskunata wakmanta rimayta.

Ima nisqaykitapas wakmanta rimanki chayqa, predicasqayki runan aswan allinta entiendenqa yachachisqaykita. Chaymi huk textota leesqayki qhepaman wakin simikunata reparachispa tapuwaq: “¿Reparashankichu chay textoq nisqanta?” nispa.

Piwanpas manaraq rimayta tukushaspaykin pisillapi wakmanta niwaq imatachus yuyarinanta munasqaykita. Khaynatapaschá niwaq: “Kunan rimasqanchismantaqa munaymanmi kay yuyarinaykita”, nispa. Hinaspataq niwaq: “Diosqa munanmi kay pacha huk paraisoman tukupunanta, chay munayninqa hunt’akunqapunin”, nispa. Huk temamantachus rimarqanki chayqa, niwaqmi: “Qhawasqanchis hina, Bibliaqa allintan willawanchis tukukuy qaylla p’unchaykunapi kawsashasqanchista. Chay tukukuy p’unchay chayamuqtin mana wañunanchispaqqa yachananchismi imatachus Dios sapankanchismanta munan chayta”, nispa. Otaq nillasunmantaq: “Qhawasqanchis hina, Diospa Simin Qelqaqa allintan yuyaychawanchis imaynatachus familiapi sasachakuykunata allichananchispaq”, nispa. Wakin kutikunapiqa texto leesqallaykitachá wakmanta yuyarichinayki kanqa. Imaynaña kaqtinpas, chayta ruwanaykipaqqa ñawpaqmantan allinta yuyaykunayki.

Revisitata ruwashaspa otaq estudiota qoshaspapas tapuykunawanmi allinta yuyarichiwaq imamantachus yachachisqaykita, chhaynapi allin kaqkunata mana qonqananpaq.

Sichus predicasqayki runa mana allintachu entiendenman Bibliaq huk yuyaychayninta otaq chayman hina imayna ruwanantapas chayqa, huk kutikunapin wakmanta sut’inchawaq chayta. Allinmi kanman huk-hinamanta chayta sut’inchay. Ichaqa manan nishu unaytachu chaymanta rimanayki, aswanpas kallpachay chaypi yuyaymanashanallanpaq. Jesuspas askha kutipin apostolninkunata yachachirqan k’umuykukuq kanankupaq (Mat. 18:1-6; 20:20-28; Luc. 22:24-27).

¿Imaynatan chayta ruwawaq discursota qoshaspayki? Discurso qoqqa manan yachachiyllachu imatapas yachachinan, aswanpas kallpachakunanmi uyariqninkuna entiendenankupaq, yuyarinankupaq, chayman hina ruwanankupaqpas. Chaypaqmi yachanan wakin nisqankunata wakmanta rimayta.

Ichaqa manan nishutaqa kaqllamanta askha kutita rimanaykichu, mana chayqa uyariqniykikunan manaña tukuy yuyaywanchu uyarisunkikuman. Chayraykun allinta akllanayki mayqen simikunatachus yachachikuykunatachus wakmanta reparachinaykita. Allinmi kanman discursoykipi aswan allin kaq yachachikuykuna yuyarichiy, hinallataq uyariqniykikunapaq hina kaq yachachikuykunatapas.

Qallariymantapachan willawaq discursoykiq aswan allin kaq yachachikuyninkunata, chhaynapin atinki chaykunata allinta reparachiyta. Willawaqmi imakunamantachus rimanaykita, otaq tapuykunawan qallariwaq, mana chayqa willawaqmi wakin sasachakuykunamanta, hinaspa niwaq chaykuna imayna allichakunanmanta discursoykipi rimamunaykita. Chaymantapas willawaqmi hayk’a yachachikuykunamantachus rimamunaykita, hinaspa ch’ulla-ch’ullallamanta chaykunamanta rimamuwaq. Chawpi discursopiña kashaspaykiqa allinmi kanman sapa mosoq yachachikuyman haykunaykipaq imamantachá ñawpaqta rimarqanki chayta yuyarichiy otaq ejemplokunata rikuchiwaq. Tukunaykipaqtaq yuyarichiwaq importante yachachikuykunata, chaytan ruwawaq chaykunamanta pisillapi wakmanta rimaspa, rikch’anachiykunata ruwaspa, qallariypi tapusqaykikunata kutichispa, otaq willasqayki sasachakuykuna imayna allichakunamanta pisillapi willaspapas.

Chaymantapas allin yachachiqqa makillan qhawarin uyariqninkunata. Sichus reparanqa wakinkuna mana allintachu ima allin yachachikuytapas entiendeshasqankuta chayqa, wakmantan chaykunata sut’inchan. Ichaqa manan kaq simikunallawanchu chayta ruwan, aswanpas kallpachakunmi huk simikunawanñataq entiendechinanpaq. Sichus qanpas chhayna allin yachachiq kayta munanki chayqa, yachanaykin uyariqniykikuna imaynachus kasqanman hina yachachiyta.