Familiakunapaq yanapaykuna
1. ¿Imaynapin sábado p’unchay Israel familiakunata yanaparqan?
1 Jehová Diosmi Israel runakunaman kamachirqan sábado p’unchayta waqaychanankupaq. Chay p’unchaymi samananku karqan llapa ruwanankumanta Jehová Diospa qosqan bendicionkunapi paywan allinpi kasqankupiwan yuyaymananankupaq. Tayta-mamakunatapas yanaparqanmi Diospa kamachikuyninta wawankuman yachachinankupaq (Deu. 6:6, 7). Chhaynapin sábado p’unchayqa Israel llaqtata yanaparqan Dios serviyninkupi yuyaymananankupaq.
2. ¿Imatan sábado p’unchay Jehová Diosmanta yachachiwanchis?
2 Jehová Diosqa manañan kamachinchu kay tiempopi familiakuna sábado p’unchayta waqaychanankupaq. Ichaqa ñawpaqpi chay kamachisqanpin yachanchis Diosninchis llaqtanpi interesakusqanta (Isa. 48:17, 18). Chay interesakusqantan kay tiempopi rikuchin Familiantin Diosta Yupaychana Ch’isiwan.
3. ¿Imaraykun Familiantin Diosta Yupaychananchis?
3 ¿Imaraykun Familiantin Diosta yupaychananchis? 2009 enero killapin Biblia Estudianapaq Huñunakuy qallarirqan Bibliamanta Allin Yachachiq Kanapaq Escuelawan kuska. ¿Imaraykun cambiakurqan? Familiakuna semanapi huk p’unchayta akllaspa Jehová Diosta kuska yupaychanankupaqmi, chhaynapi espiritualpi wiñarinankupaq. Chaymi kallpachakurqan familiapi Biblia estudiananku p’unchayta Biblia Estudianapaq Huñunakuy horaman cambianankupaq. Hinaspa chay horapi Bibliamanta t’aqwinankupaq sapanka familiaq necesitasqanman hina.
4. ¿Huk horallachu estudio aparikunan? Willay.
4 Biblia Estudianapaq Huñunakuyman rinapaqqa tiempotan necesitarqanchis allichakunapaq huñunakuyman chayanapaqpas. Yaqa llapanchismi huk horalla huñunakuypi kasqanchismantaqa más tiempota necesitarqanchis. Ichaqa huñunakuykunapaq horario cambiakusqanwanmi kunanqa chay tiempopi familiantin Diosta yupaychasunman, chayraykun familiapi estudioqa mana huk horallapunichu kanan. Aswanpas ñawpaqmantan yuyaykuna familia imakuna necesitasqanpi imayna tarikusqanpipas, chayman hinataq decidina chay estudiota hayk’a tiempo aparinapaqpas.
5. ¿Grupopichu tukuy tiempo estudiana? Willay.
5 ¿Grupopichu tukuy tiempo estudiana? Familiakunapas mana wawayoq casadokunapas Bibliamanta kuska t’aqwispaqa paykunapuran kallpachanakunku (Rom. 1:12). Chhaynapin familiakuna astawan hukllachakunku. Chayraykun Familiapi Diosta Yupaychanapaq horapiqa ancha importante Bibliamanta imatapas t’aqwiy, ichaqa chay horapiqa sapallankupas t’aqwirinkumanmi. Ejemplopaq, grupopi t’aqwisqanku qhepamanmi familiaqa kuskalla kankuman sapallankuña estudiashankuman chaypas, yaqapaschá huñunakuykunapaq preparakuspa otaq revistakunata leespa. Wakin familiakunaqa televisiontan wañuchinku chay horapaq.
6. ¿Imaynatan estudiota aparisunman?
6 ¿Imaynatan aparina? Manan tapuywan kutichiyllawanpunichu ruwakunan. Wakin familiakunaqa semanapi kaq huñunakuyninchiskunata hinan aparinku. Estudiananku temakunatan askha partepi t’aqanku, chhaynapi Familiapi Diosta Yupaychayninku sumaq kananpaq. Bibliatan kuska leenku, huñunakuykunapaq preparakunku hinallataq imayna predicanankupaq demostracionkunata ruwanku. 6 paginapin askha yanapaykuna kashan.
7. ¿Imaynatan tayta-mamakuna estudiota aparinanku?
7 Kusikunapaq hinan kanan. Wawakunaqa ratullan yachanku sichus estudiota sumaqta aparikun chayqa. Mana chirimuqtinqa yaqapaschá hawapi estudiawaqchis. Hinaspapas samariwaqchismi sayk’uspaqa. Wakin familiakunaqa preparankun imallatapas tukuspa mikhunankupaq. Yaqapaschá tayta-mamakunaqa wawakunapi ima mana allintapas reparaspaqa parlarinqaku paykunawan. Ichaqa manan Familiantin Diosta Yupaychana horapichu paykunata k’aminanku otaq anyananku. Huk wawankupi sasachakuy kaqtinqa huk p’unchayñan paywan chaymanta rimankuman, chhaynapi mana hukkunaq ladonpi p’enqaypi kananpaq. Familiantin Diosta Yupaychana Ch’isiqa kusikunapaq hinan kanan manan manchakunapaq hinachu nitaq aburrikunapaq hinachu, chhaynapin rikuchisun kusisqa Diosta yupaychasqanchista (1 Tim. 1:11).
8, 9. ¿Imaynatan preparakunman familiapi umalliq?
8 ¿Imatan familiapi umalliq ruwanman? Sichus umalliq ñawpaqmanta preparakunqa Familiantin Diosta Yupaychana horapi imakuna estudianankuta imayna aparinantapas chayqa, familianpa allinninpaqmi kanqa (Pro. 21:5). Qosaqa chaymantan esposanta tapurinan (Pro. 15:22). Wawakunatapas tapurinmanmi, chhaynapin yachanqa imakuna paykunaman interesasqanta llakichisqantapas.
9 Manan sapa kutichu taytaqa unay tiempo preparakunan kanqa. Yaqapaschá Familiaqa munanqa sapa semana ima temamantapas estudiayta, chhaynapin payqa mana sapakutipaqchu mosoq programata ruwanqa. Hinaspapas yaqapaschá taytaqa reparanqa familiapi estudiayta tukuqtinku hina preparakuy allinpuni kasqanta. Chay ratuqa umallanpiraqmi kashan familian iñiyninkupi wiñanankupaq imakuna necesitasqan. Wakin taytakunaqa pisillapin huk listata ruwanku hamuq semanapi rimanankupaq, hinaspa k’askachinku punkuman otaq may rikukuq cheqasmanpas. Chayqa yanapanqan familiata kusikuywan suyakunankupaq hinallataq necesario kaqtinqa ñawpaqmanta preparakunankupaq.
10. ¿Imatan ruwankuman sapallanku kaqkuna?
10 ¿Imaynatan ruwankuman sapallanku kaqkuna? Familiantin Diosta Yupaychana Ch’isipin paykunapas sapallanku Bibliata t’aqwinkuman. Allinta estudianapaqqa Bibliatan leena, huñunakuykunapaq preparakuna, Qhawaq, ¡Despertad! restakunatapas leena. Chaymantapas wakin iñiqmasikunaqa astawanraqmi ima temamantapas qelqakunapi t’aqwirinku. Mayninpitaq huk iñiqmasita otaq huk familiata wasinkuman invitanku paykunawan kuska sumaqta Bibliamanta estudianankupaq.
11, 12. Willay sapa kutilla Familiantin Diosta Yupaychay imakunapi allinninchispaq kasqanta.
11 ¿Imakunapin allinninchispaq Familiantin Diosta Yupaychay? Tukuy sonqomanta Diosta yupaychaspaqa Jehová Diosmanmi astawan asuykunchis. Chaymantapas kuska estudiaq familiakunaqa astawanmi hukllachakunku. Chhayna kasqanmantan huk casado iñiqmasinchiskuna ninku: “Iskayniykun precursor kayku manan wawayku kanchu, kusikuywantaqmi Familiantin Diosta Yupaychana Ch’isita suyakuyku. Chaypin astawan reqsinakuyku, hinallataq Jehová Diostapas astawan reqsiyku. Kunanqa yupaychanayku p’unchay chayamuqtinqa tutamantan rikch’arispan kusisqa ninakuyku: ‘¡Kunanqa Familiantinmi Diosta Yupaychasun!’ nispa”.
12 Familiantin Diosta Yupaychanapaq huk p’unchayta churayqa, yanapanmi imaymana ruwaywan ñit’isqa tarikuq familiakunatapas. Huk maman sapallan iskay wawakunata uywashan precursorataqmi kanpas, paymi nin: “Ñawpaqpiqa maynillanpin familiapi estudiaq kayku, nishu sayk’usqan tarikuq kani chaymi mana sapa semanachu estudiaq kayku. Manan tiempota tariqchu kani estudianaykupaq. Chayraykun anchata agradecekuykichis Familiantin Diosta Yupaychasqaykumanta. Kunanqa sapa semanan estudiayku, chay ruwasqaykuqa ancha allinniykupaqmi”, nispa.
13. ¿Imaynapin familiapi estudiay ancha allinninchispaq kanman?
13 Sábado p’unchayta waqaychay hinan kay tiempopi Familiantin Diosta Yupaychaypas Diospa qowasqanchis regalo, chayqa ancha allinninchispaqmi (Sant. 1:17). Ñawpaq tiempopiqa sábado p’unchaypi hayk’atachus kallpachakusqankuman hinan allinninkupaq kaq. Kay tiempopipas hayk’atachus familiantin estudiaspa kallpachakusqanchisman hinan allinninchispaq kanqa (2 Cor. 9:6; Gál. 6:7, 8; Col. 3:23, 24). Sichus chay yupaychana horata allinta utilizasun chayqa salmista hinan nisun: “Ñoqapaq aswan allinqa Diospa qayllanpi kayniymi. Apu Señor Diosníy, qanmi pakakunayqa kanki, lliw ruwasqaykitan willakusaq”, nispa (Sal. 73:28).
[5 paginapi willakuy]
Familiantin Diosta Yupaychana Ch’isiqa ancha kusikunapaqmi kanan, kusisqa Diosman rikch’akunanchispaq
[6 paginapi recuadro]
ALAYRIPI HAP’INAPAQ
Familiantin Diosta Yupaychana Ch’isipi ruwanapaq
Biblia:
• Semanapi Biblia leenanchismantan t’aqawaqchis leenaykichispaq. Chaypaq hina kaqtintaq pipas familiapi chayta leenman willashanmanpas hina, hukkunataq chaypi runakunaq imakuna nisqanta leenkuman.
• Dramapi hina ruwaychis wakin textokunata.
• Semanapi leenapaq capitulokunata llapaykichis ñawpaqmanta leeychis, hinaspa hukta otaq iskay tapuykunata qelqaychis. Chaymantataq kuska t’aqwiychis kutichiykunata.
• Sapa semana tarjetapi huk textota qelqaspa umaykichispi hap’iychis chaymantataq sut’inchaychis. Askha tarjetakunata huñuspa sapa semana yuyariychis hayk’a textokunatan yuyashankichis chayta.
• Bibliamanta grabasqa discokunata uyariychis Bibliaykichispitaq qatipaychis.
Huñunakuykuna:
• Huñunakuykunapaq kuska preparakuychis.
• Huñunakuykunapaq programasqa takikunata ensayaychis.
• Pipas Bibliamanta Allin Yachachiq Kanapaq Escuelapi asignacionnin kan otaq Predicayta Yachanapaq Huñunakuypi demostracionta ruwanqa chayqa, imayna ruwananpaqmi yanapawaqchis otaq familiaq ñawpaqenpi ensayanman.
Familiapi imakuna necesitasqanku:
• Los jóvenes preguntan otaq Aprendamos del Gran Maestro nisqa librokunamantan yachachikunman.
• Escuelapi sasachakuykuna kaqtin imayna atipanankumanta dramata hina ruwawaqchis.
• Dramatan ruwawaqchis tayta-mamakuna wawakunamanta ruwaspa, wawakunataq tayta-mamamanta. Chaypaqqa wawakunan ima tematapas maskhaspa tayta-mamankuta yuyaymanachinkuman.
Predicanapaq:
• Practicaychis predicacionpi ima qelqakuna munachinaykichismanta.
• Jesuspa wañusqan killapi otaq vacacionpi predicanaykichispaq imakunata aypanaykichista churakuychis.
• Tiempota t’aqaychis imakunatan predicacionpi tapumusunkichisman chayta sapankaykichis t’aqwinaykichispaq, hinaspa ensayaychis.
Huk yanapaykuna:
• Chayllaraq lloqsimuq revistakunata kuska leeychis.
• Sapankaykichis ñawpaqmanta leeychis chayllaraq lloqsimuq revistakunata, chaymanta willanaykichispaq.
• Huk familiata otaq huk iñiqmasitapas invitaychis Familiantin Diosta Yupaychanaykichisman, yaqapaschá experiencianta willananpaq tapuwaqchis.
• Mayqen videotapas qhawaspa chaymanta rimaychis.
• ¡Despertad! revistapi “Los jóvenes preguntan” otaq “Actividades para la familia” nisqakunata kuska t’aqwiychis.
• Qhawaq revistapi “Wawaykikunata yachachiy” otaq “Wayna-sipaskunapaq” nisqata kuska t’aqwiychis.
• Leespa allinta t’aqwiychis chay watamanta Anuario librota otaq hatun huñunakuypi qelqakuna rakikamusqanta.
• Huk p’unchay, iskay p’unchay huñunakuypi otaq hatun huñunakuypi yachamusqaykichista yuyariychis.
• Jehová Diospa kamasqanta qhawaspa chaymanta rimaychis imatas chaykuna yachachiwanchis chayta.
• Kuska ruwaychis huk mapata otaq dibujaychispas.