Bibliata kicharinankupaq kallpachay

DIOSPA SIMIN QELQATAN runakunaman allinta qhawarichinanchis. Predicasqanchisqa Bibliamantan horqosqa kashan, chaymi lliwman sut’ita rikuchinanchis yachachisqanchisqa Diosmanta hamusqanta, manataq ñoqanchismantachu. Paykunaqa Diospa Simin Qelqaman hap’ipakuytan yachananku.

Predicacionpi kashaspa. Predicanaykipaq preparakushaspaykiqa akllay huk otaq iskay textokunata uyariy munaqkunaman leenaykipaq. Huk qelqata munachinapaqña preparakushanki chaypas, allinmi kanman huk textota qhawachiy. Ima nisqanchismantapas Diospa Simin Qelqan aswan allinta iñichinman llamp’u sonqo runakunataqa. Bibliamanta leeyta mana atikunmanchu chayqa, umallaykimantañan willawaq textoq nisqanta. Apostolkunaq tiemponpiqa wakin runakunallan qelqa k’uyukunayoq kaqku. Chaywanpas Jesuswan apostolninkunawanqa askha kutitan chaykunaq nisqanta umallankumanta willarqanku. Chhaynaqa kallpachakuy wakin textokunata umaykipi allinta hap’inaykipaq, chaykunawantaq predicacionpi yanapachikuy, Bibliamantapuni leeyta mana atikuqtintaq umallaykimantaña willawaq.

Leesqaykita wasiyoq qatipananpaq hina Bibliata hap’iy. Kikin Bibliantapuni horqomuspa leesqaykita qatipanqa chayqa aswan allinmi kanqa.

Ichaqa wakin Biblia t’ikraqkunaqa munasqankuman hinan wakin textokunata t’ikrarqanku. Wakinmi manaña churarqankuchu Diospa sutinta, wakintaq mana sut’i entiendeytachu t’ikrarqanku wañuymanta willaq textokunata, otaq pantasqata t’ikrarqanku kay hallp’a pachapaq Diospa ima munasqanta. Chaykunata reparachinaykipaqqa mayninpiqa qhawachinaykin kanqa huk Bibliakunapi imayna t’ikrakusqanta, qhawachillawaqtaqmi ñawpaq Bibliakunapi imayna t’ikrakusqantapas. Razonamiento a partir de las Escrituras nisqa libropin rikhurin wakin yachachikuykuna huk Bibliakunapi imayna t’ikrakusqanta. Predicasqayki runa cheqaqtapuni yachayta munan chayqa, kusikunqachá chaykunata qhawachiqtiyki.

Huñunakuypi kashaspa. Huñunakuykunapiqa llapantan kallpachana Bibliata kicharispa leemuqpa leesqanta qatipanankupaq. Chhaynapin makilla uyarinqaku yachachikusqata, aswan allintataq entiendenqaku, chayllaraq hamuqkunapas sut’itan rikunqaku Bibliaq nisqanman hinapuni imatapas yachachikusqanta.

Leesqayki textokunata uyariqkuna qatipanankupaqqa yachanaykin imayna kallpachayta. Chaypaqmi nisunman: “Qhawarisunchis Bibliapi kay textota”, nispa.

Discurso qoqmantan kanqa mayqen textokunatachus huñunakuypi leekunanpaq. Allinmi kanman allinnin yachachikuykunamanta willaq textokunata qhawachinman chayqa; huk textokunataqa tiempoq aypasqanman hinañan leenman.

Leesqayki textokunata uyariqkuna qatipanankupaqqa tiempotan qonayki textokunata maskhanankupaq, mana chayqa manañapaschá maskhayta munanqakuchu. Chhaynaqa allinta qhawariy uyariqniykikunata, hinaspa yaqa llapanku tariqtinkuña leey nisqayki textota.

Chaymantapas ñawpaqtaraqmi willawaq mayqen textota leenaykita, chhaynapin manaña nishutachu suyanayki kanqa textota tarinankupaq. Sichus uyariqniykikunaman tiempota qonki textokunata maskhanankupaq chayqa, tiempoykiqa pisillachá kanqa rimanaykipaq, ichaqa uyariqniykikunaq allinninpaqmi kanqa.