“Diospa munakuyninpi allinta takyaychis”
1. ¿Imapaqmi ruwakurqan “Diospa munakuyninpi allinta takyaychis” nisqa libro?
1 Enero killapi 6 p’unchaymantapachan “Diospa munakuyninpi allinta takyaychis” nisqa librota estudiayta qallarisun. ¡Ima hinaraqchá chay p’unchay chayamunantaqa suyakushanchis! Chay libroq qallariyninpin Umalliq T’aqa apachimurqan llapa Diosta serviqkunapaq huk cartata. Chaypin nirqan: “Kay libron ruwakun cheqaq yachachikuyman hina kawsananchispaq, kay libroq yanapayninwan ‘Diospa munakuyninpi allinta takyaspa [...] wiñay kawsay qowananchista suyakunapaq’, chaytan munayku tukuy sonqomanta”, nispa (Judas 21).
2. ¿Imakunapin chay libro yanapawasun?
2 ¿Imakunapin yanapawasunman? ¿Bibliaq nisqanman hinachu kawsashanchis, rimashanchispas? ¿Chaypi kamachikuykunaman hinachu akllakushanchis amigokunata, imapi kusirikuytapas? Casarakuna kaqtin ¿Bibliaq nisqanman hinachu imatapas ruwashanchis? ¿Kasukuqchu kanchis? Chaykunata allinta hunt’ananchispaqmi chay libro yanapawasun, chhaynapitaq allin concienciayoq kaspa tukuy imatapas Diospa munasqanman hina ruwasunchis (Sal. 19:7, 8). Chaymantapas allintan yachasunchis imakunatachus Dios munan chayta, chaymantataq astawanraq munasun sonqonta kusichiyta (Prov. 27:11; 1 Juan 5:3).
3. ¿Imaraykun kallpachakunanchis tapuykunaman kutichinanchispaq?
3 Allinta preparakusun. Siminchiswan Jehová Diosta hatunchananchispaqmi allinta chay librota preparakunanchis (Heb. 13:15). Chay librotaqa llapanchismi Huñunakuna Wasipi estudiasunchis. Pisi-pisillamantataq chay librota estudiasun chayqa, llapallanchismi allinta preparakunanchis, chhaynapin mana manchakuspa tapuykunata kutichisunchis. Allinta preparakuspa rimasun chayqa, ñoqanchispuran kallpachanakusun allin kaqta ruwashanallanchispaq, huñunakuyninchispas sumaqmi kanqa (Heb. 10:24). Chaymantapas anchatan kusikusun Jehová Diosta siminchiswan hatunchasqanchismanta.
4. ¿Imaraykun Jehová Diospa kamachikusqanman hina kawsananchis?
4 Diospa kamachikuyninkunata kasukuqtinchisqa payqa munakuwallasunmi, chaytan Jesusqa sut’ita nirqan manaraq wañupushaspa (Juan 15:10). Chay libroqa yanapawasunmi Bibliaq nisqanman hina kawsananchispaq, chhaynapin ‘Diospa munakuynillanpi’ kashasunchis (Jud. 21).