QALLARIYPI KAQ | ¿ATIPASUNMANCHU WAÑUYTA?
¡Wañuytaqa atipakunqan!
Jerusalén llaqtaq qayllanpin tarikurqan Betania llaqta (Juan 11:18). Chaypin tiyarqan Jesuspa amigon Lázaro, paymi sinchita onqospa wañupurqan.
Jesusmi Lazaroq wañupusqanta yacharuspa qatikuqninkunata nirqan: “Amigonchis Lazaron puñushan, payta rikch’arichimuqmi risaq”, nispa (Juan 11:11). Qatikuqninkunaqa manan entienderqankuchu rimasqanta, chaymi sut’inta nirqan: “Lazaroqa wañupunmi”, nispa (Juan 11:14).
4 p’unchay p’ampasqanku qhepamanmi Jesusqa Betania llaqtaman chayaspa Martata maskharqan sonqochananpaq, chaymi Martaqa Jesusta nirqan: “Señor, kaypi kashawaq karqan chayqa, turayqa manan wañunmanchu karqan”, nispa (Juan 11:17, 21). Jesustaq nirqan: “Ñoqan kawsarimpuypas kawsaypas kani. Ñoqapi iñiqqa, wañusqaña kashaspapas kawsanqan”, nispa (Juan 11:25).
“¡Lázaro, lloqsimuy!”
Rimasqan cheqaq kasqanta rikuchinanpaqmi Lázaro maypichus p’ampasqa kasqanman rispa kunkayoqta nirqan: “¡Lázaro, lloqsimuy!”, nispa (Juan 11:43). Hinan Lazaroqa lloqsimurqan.
Jesusqa iskay runatañan kawsarichirqan. Hukninmi karqan Jairoq ususin. Chaypipas Jesusqa wañuytan puñuywan rikch’anachirqan (Lucas 8:52).
Chay iskaynin kutipin Jesusqa wañuyta puñuywan rikch’anachirqan. ¿Imarayku? Misk’ita puñunki chayqa manan imatapas reparankichu nitaq sientenkipaschu (Eclesiastés 9:5, qhaway “Wañupuqkunaqa puñuypi hinan kashanku” nisqa recuadrota). Ñawpa tiempopi cristianokunapas allintan entienderqanku wañuqkuna imaynapi tarikusqankuta. Chaymi Religionnmanta rimaq libron nirqan: “Diospaq hunt’aq sonqo runakunaqa puñuyta hinallan wañuyta qhawariqku aya p’ampanatataq samakunapaq cheqasta hinaa [...]”, nispa.
Wañuqkunaqa aya p’ampanapin puñushanku manan ñak’arishankuchu, chay yachayqa kusichiwanchismi.
¿WAÑUQ RUNA KAWSARINMANCHU?
Llapanchispas munanchismi misk’ita puñuyta, ichaqa manan wiñaypaqchu. ¿Kanmanchu ima suyakuyllapas wañuqkunapaq? ¿Atinkumanchu Lázaro, Jairoq wawan hina kawsarimpuyta?
Ñawpa tiempopi Job Diosta tapurqan: “[¿]Sichus uj runa wañun chayqa, ujtawan kawsanmanchu?”, nispa (Job 14:14, Diosmanta Qhelqasqa).
Pay kikin kutichikurqan: “Waqyamuwaqtiykiqa kutichimusqaykin, kamasqayki runamanta sonqoykita ‘ch’allaq’ nirichinki”, nispa (Job 14:15). Jobqa manan iskayarqanchu kawsarichisqa kananmanta, chay yuyaykusqanqa cheqaqmi karqan.
Jehová Diosmi Jesusman atiytan qorqan wañuyta atipananpaq, chaytan sut’ita rikuchirqan runakunata kawsarichispa. Biblian willan Jesús ‘wañuypa llaventa’ hap’isqanta (Apocalipsis 1:18). Chay llavewanmi aya p’ampanakunata kicharimunqa, imaynan Lázarota kawsarichispa aya p’ampanata kicharirqanku hinata.
Bibliapiqa sapa kutillanmi kawsarimpuy suyakuymanta uyarinchis. Ñawpa tiempopi Diosta serviq Danieltan huk ángel nirqan: “Qanqa wañukapunkin, herenciaykita chaskinaykipaqtaq p’uchukay p’unchaykunapi kawsarimpunki”, nispa (Daniel 12:13). Saduceo runakunan mana iñirqankuchu kawsarimpuypi, chaymi Jesús paykunata nirqan: “Pantankichismi Diospa Simin Qelqatapas Diospa atiynintapas mana yachaspa”, nispa (Mateo 22:23, 29). Apóstol Pablopas nirqanmi: “Ñoqapas Diospi suyakuni chaninkunatapas mana chaninkunatapas wañusqankumanta Diospa kawsarichimpunanta”, nispa (Hechos 24:15).
¿HAYK’AQMI WAÑUQKUNA KAWSARIMPUNQAKU?
¿Hayk’aqmi chanin mana chanin runakuna kawsarimpunqaku? Danielman angelpa nisqan hina chayqa ‘p’uchukay p’unchaypin’ kanqa. Martapas nirqanmi turan Lázaro ‘p’uchukay p’unchaypi kawsarimpunanta’ (Juan 11:24).
Biblian ‘p’uchukay p’unchayta’ tupachin Jesuspa waranqa wata kamachikusqanwan. Apóstol Pablon nirqan: “Cristoqa kamachikunqapunin tukuy awqankunata chaki sarunanman Dios churanankama. Qhepallataña ch’usaqyachina awqaqa wañuymi”, nispa (1 Corintios 15:25, 26). Chayraykun Diospa Gobiernon hamunanpaq mañakunanchis, chhaynapin Diospa munaynin kay pachapi hunt’akunqa.b
Jobpa nisqan hina Diosqa munanmi wañupuqkunata kawsarichiyta, chay p’unchay chayamuqtinmi wañuyqa chinkapunqa, manañan pipas tapukunqachu: “¿Wañuyta atipakunmanchu?”, nispa.
a Griego rimaypi “cementerio” simiqa “samakunapaq cheqas” ninanmi.
b Astawan yachayta munanki chayqa ¿Imatapunin Biblia yachachin? nisqa libropi 8 capitulota maskhay, chaytaqa Jehová Diospa testigonkunan ruwan. Horqowaqmi www.jw.org/quz nisqamanta.