Sonqonkuman chayay

MANAN predicayllachu-predicana aswanpas runakunaq sonqonmanmi chayana. Bibliaqa sut’itan willan, runakuna mana kaqllachu kasqankuta sonqonku ukhupi kasqankuwan. Sonqo nispaqa nikun: imayna sientekusqanta, imayna yuyaykusqanta, imaraykus chay hinata yuyaykun, ima ruwananpaqsi chay hina yuyaykusqan kallpachan chaykunan. Cheqaq willakuykunaqa runakunaq sonqonpin takyanan (Mat. 13:19). Chhaynapin sonqomanta Diosta kasukunqaku (Pro. 3:1; Rom. 6:17).

Runakunaq sonqonman yachachisqayki chayananpaqqa: 1) reparanaykin ima yachachikuykunas sonqonpi kashan chayta, 2) kallpachanaykin munakuq runa kananpaq Diosta manchakunanpaqpas, 3) kallpachanaykin imayna sonqoyoq kasqanta qhawarikunanpaq, chhaynapi Jehová Diosta kusichinanpaq.

Allin reparaq kay. Runakunaqa imaymana kasqanraykun Jehová Diosta mana reqsinkuchu. Chaymi piwanpas Bibliata estudiaspaykiqa yaqapas mana allin yuyaykusqanta cambianayki kanqa, chaytaqa ruwawaq imarayku mana chhaynachu kasqanta rikuchispan. Tapukuy: “¿Cheqaqtapunichu chay runa Diosta maskhashan? ¿Imapin creen imakunapitaq mana creenchu? ¿Imaraykun chhaynata yuyaykun? Diosta reqsinanpaq imapas hark’aqtin, ¿atipanmanchu yanapayniywan?” nispa.

Imaraykus imapipas runakuna creesqankumanta yachayqa manan facilchu. Biblian nin: “Chinkay-chinkay ukhu unu hinan sonqollapi yuyaykusqakunaqa, yuyayniyoq runan ichaqa chaykunata sut’iman horqoyta yachan”, nispa (Pro. 20:5). Yuyayniyoq kayqa allin reparaq kaymi, chayqa sonqo ukhupi yuyaykusqakunata yachaymi, chaytaqa ruwakun allinta qhawaspan entiendespa ima.

Bibliata estudiaq imayna sientekusqanta yachanapaqqa manan rimallaqtinchu reparasunman, uyanpipas, imayna kunkawan rimasqanpipas reparasunmanmi yachasqanta imayna qhawarisqanta. Sichus tayta-mama kanki chayqa, reparankichá wawaykikunaq imapas chayllaraq yachasqankuqa comportakusqankupi sut’i kasqanta. Chaykunan rikuchin runakunaq sonqonpi imachus kasqanta.

Allinta yuyaykuspa tapuykunata ruwaypas yanapawasunmi runakunaq sonqopi imachus kasqanta yachanapaq. Khaynatan tapuwaq: “¿Imaynatan sientekuwaq chay...? ¿Imaraykun chay hinata...? ¿Imatan ruwawaq sichus...?” nispa. Ichaqa mana p’enqachispallan chayta ruwana. Yaqapaschá khaynata qallariwaq: “¿Tapuriykimanchu?” nispa. Sonqonkupi imapas kasqantaqa manan kaqpachachu yachasunman. Chayraykun anchata kallpachakuna chaykunata reparananchispaq. Pipas imayna sientekusqanta willawananchispaqqa, kallpachakunanchismi ñoqanchispi confiananpaq, chayqa tiempoq pasasqanman hinan kanqa. Chaywanpas allin yuyaywanmi chayta ruwanayki Biblia estudiaq runata mana p’enqachinaykipaq (1 Ped. 4:15).

Estudiantekunata allin yuyaywan kutichinaykipaqqa allin reparaqmi kanayki. Yuyaykusqantan entiendenayki chhaynapin reparanki ima yachachinaykita, chayta ruwaspaqa sonqonmanmi chayanki. Ima yuyaykusqankupipas pantaqtinkuqa amapuni ninkichu: “Manan chhaynachu”, nispaqa. Aswanpas reparanaykin imaraykus chayta nishasqanta. Chhaynapin allinta kutichinki, hinaspapas allintan yachachisqaykita hap’ikunqa (Pro. 16:23).

Askha runakunata yachachispapas atisqanchisman hinan kallpachananchis. Sichus uyariqniykikunaq uyanta qhawarispa rimanki otaq yuyaykunankupaq hina tapuykunata ruwanki chayqa, sut’itan reparanki imaynatas yachachisqaykita qhawarishanku chayta. Allinta reqsinki uyariqniykikunata chayqa, imakunapis allinyananku kashan chayman hinan yachachinayki. Diospa Siminmanta yuyaymanachispaqa reparanaykin imaynatas chay yachachikuykunata iñiqmasikuna qhawarinku chayta (Gál. 6:18).

Yuyaymanachiy sonqonta kicharinanpaq. Imapis runakuna creenku, imapis mana creenkuchu, imaraykus chaykunapi creenku, chaykunata yachaspaqa, atinkin chayman hina yachachiyta. Kawsarimpusqan qhepamanmi Jesusqa, ‘Diospa Simin Qelqamanta’ rimapayaspa qatikuqninkunaq sonqonkuta kicharirqan (Luc. 24:32). Qanpas kallpachakuy chay hinata ruwanaykipaq. Imaynatas ñawpaqpi kawsarqan, imatas ruwayta munan, imaynatas Diospa Siminta qhawarin chaykunaman hina yachachiy. Sichus estudiachisqayki runa ninqa: “Kaymá CHEQAQ KAQQA”, nispa chayqa sonqonman chayasqaykitan reparanki.

Sichus reparachinki Diosninchis munakuq, khuyapayakuq, chanin Dios kasqanta chayqa, astawanmi Diosta munakunqa. Hinaspapas Diosqa allin kaqkunatan paykunapi qhawarin, chaykunata yachaypas kallpachanmanmi Diosta amigonkuta hina qhawarinankupaq. Chaypaqqa kallpachay Salmo 139:1-3, Lucas 21:1-4, Juan 6:44 textokunapi yuyaymananankupaq. Imaynatas Dios hunt’aq sonqo serviqninkunata munakun chaykunamanta willasqaykipas kallpachanmanmi (Rom. 8:38, 39). Willariy, pantaq runa kasqanchismantapas Jehová Diosqa yachanmi, imayna kawsasqanchista, tukuy sonqo yupaychasqanchista, sutinta hatunchay munasqanchistapas (2 Cró. 19:2, 3; Heb. 6:10). Jehová Diosqa manan qonqanchu sapankanchispas imayna kasqanchista, chayraykun ‘aya p’ampanakunapi lliw kaqkunata’ kawsarichinqa (Juan 5:28, 29; Luc. 12:6, 7). Jehová Diosqa payman rikch’akuqtan runakunataqa kamawarqanchis, chaymi imayna Diosninchis kasqanmanta rimapayaqtiykiqa estudianteq sonqonman chayanqa (Gén. 1:27).

Jehová Dios hina hukkunata munakuywan qhawarisqanchispas sonqontan kicharinman. Arí, Jehová Diosqa sumaqtan sapankanchistapas qhawariwanchis, chay hinatan llapa runakunatapas qhawarin, Payqa manan imayna rikch’ayniyoq kasqantachu, nitaq huk llaqtayoq kasqankuta qhawaspachu runakunataqa akllan (Hech. 10:34, 35). Chaykunata Biblia estudiaq allinta reparanqa chayqa, kallpachakunqachá Bibliaq nisqanman hina runamasinta munakunanpaq. Hinaspapas, sumaqtachá hukkunawan kawsanqa, chhaynapitaq pisi-pisimanta astawan Diospa munayninmanta yachanqa.

Diosta manchakuyniyoq kanankupaqpas yanapananchismi (Sal. 111:10; Apo. 14:6, 7). Sonqomanta Diosta respetasqankupas manchakusqankupas anchatan kallpachanqa paykunallamanta mana atisqanku ruwaykunata saqepunankupaq. Jehová Diospa hatun ruwasqankunamanta ancha munakuyninmanta rikuchisqanchispas yanapanqan manchakunankupaq (Sal. 66:5; Jer. 32:40).

Jehová Diosqa kamachisqanman hina kawsananchistan munan. Payqa sienteq Diosmi mayninpin llakichisunman mayninpitaq kusichisunman, chayqa kamachikuyninkunata imayna qhawarisqanchismantan kanqa (Sal. 78:40-42). Hinaspapas imayna kawsasqanchiswanmi Saqraq llullakusqanman kutichinchis, chaykunatan reparachina (Pro. 27:11).

Diospa munasqanman hina kawsayqa allinninchispaqmi, chaytan Biblia estudiaqqa reparanallantaq (Isa. 48:17). Imaraykullapas Diospa yuyaychayninkunata mana kasukuyqa sasachakuykunata llakikuykunatan apamun, chaykunatan uyariqninchisman reparachina. Huchallikuyqa Jehová Diosmantan karunchawanchis hinaspapas munakusqanchis runakunaq sonqontan k’irinchis manataqmi atinchischu hukkunaman cheqaq kay willayta (1 Tes. 4:6). Diosta kasukusqankurayku ima saminchaykunatan chaskikurqanku chaykunata reparachiy, hinallataq ima sasachakuykunamantan librakurqanku chaykunamanta gracias ninankupaq kallpachay. Diospa yuyaychasqanman hina kawsaqqa, cheqnikunmi Diospa kamachisqan contra mana allin ruwaykunataqa (Sal. 119:104). Kasukuq kayta sasapaq hina qhawarinanmantaqa, Jehová Diosta munakusqanta, Payllata hatunchay munasqantawanmi rikuchinqa.

Yanapay sonqonkuta t’aqwikunankupaq. Iñiyninkupi wiñarinankupaqqa sonqonkupi imayna kasqankutan allinta qhawarikunanku. Willay imaynatas Biblia chaykunapi yanapanman chayta.

Bibliaqa manan kamachikuykunallatachu, yuyaychaykunallatachu, ñawpaqpi imakuna pasasqallantachu nitaq profeciakunallamantachu willan, aswanpas Diospa yuyaychasqankunan chaypiqa kashan. Santiago 1:22-25 textopin Diospa Siminta rikch’anachikun huk espejowan. Imaynatan Diospa yachachikuyninkunata qhawarinchis, imachus ruway munasqantapas, chaykunapin Diospa Siminqa sut’ita rikuchiwanchis sonqonchis ukhupi imachus kasqanta, hinallataq ‘sonqonchista’ t’aqwiq Dios imaynatas qhawariwanchis chaytapas (Pro. 17:3). Uyariqniykikunata kallpachay chaykunata ama qonqanankupaq. Hinaspapas yuyaymanachiy imaynatas ñoqanchisrayku Jehová Dios Simin Qelqanta cuidarqan chaykunapi, hinallataq Diospa amigon kananpaq imakunapis cambiana kashan chaytapas. Bibliata leespaqa allintan reparanqaku imaynatas sonqota t’aqwiq Dios qhawarin ‘sonqonkupi yuyaykusqankuta’, chhaynapin Diospa munasqanman hina imapi pantasqankutapas cambianqaku (Heb. 4:12; Rom. 15:4).

Wakin estudiantekunaqa Bibliapi yachasqankuman hinan ruwayta munanku, ichaqa hukkunata manchakuspan mana kallpachakunkuchu. Wakinqa yaqapaschá aychankuq munapayasqankuwan atipachikushanku otaq kay pachatawan Diostawan serviyta munashanku. Reparachiy chaykuna mana allin kasqanta (1 Rey. 18:21). Jehová Diosmanta mañakuchunku sonqonkuta t’aqwinanpaq (Sal. 26:2; 139:23, 24).

Jehová Diosqa yachanmi kallpachakusqankuta chay hawa imayna sientekusqankutapas (Rom. 7:22, 23). Kallpachay huchallikuq sonqonwan ama atipachikunanpaq (Pro. 3:5, 6; 28:26; Jer. 17:9, 10).

Yuyaymanachiy imaraykus imatapas ruwayta munan chayta. Chaypaqqa kay hina tapuykunata ruwakuchunku: “¿Imaraykun munani chay ruwayta? Chay ruwasqay, ¿rikuchinqachu Jehová Dios agradecekusqayta?” nispa. Allinta rikuchiy Diospa amigon kay imamantapas ancha allinpuni kasqanta.

Allinta reparachiy uyariqniykikunata, imaynas ‘tukuy sonqowan’ Diosta serviy chayta (Luc. 10:27). Ima yuyaykusqankutapas ima munasqankutapas Diospa munasqanman hina ruwanankupaqmi kallpachakunanku. Chayrayku ama imachus ruwasqallankumantachu yuyaymanachiy aswanpas imaynatas Diospa kamachiyninkunata qhawarinku imaraykus payta servinku chaykunatawan yuyaymanachiy (Sal. 37:4). Imakunapiraqchus allinyananku kashan chayta reparakusqankuman hina kallpachay Jehová Diosman khaynata mañakunankupaq: “Qanta tukuy sonqo serviqta ruwaway”, nispa (Sal. 86:11).

Jehová Diosta astawan reqsispan iñisqanrayku kikillanmanta Diospa kamachikuyninkunata kasukunqa, manañan tanqasqaykiraykuchu. Arí, payllamantan ‘imachus Señorpa sonqonta kusichiq kaqta ruwanqa’ (Efe. 5:10; Fili. 2:12). Chhayna sonqowan kasukuq runakunaqa Diostan kusichin (Pro. 23:15).

Manan qonqananchischu, Jehová Diosmi runakunaq sonqontaqa t’aqwin, paytaqmi llaqtanman runakunata pusamun (Pro. 21:2; Juan 6:44). Ñoqanchisqa llank’aysiq-masillanmi kanchis (1 Cor. 3:9). ‘Diospas ñoqanchiswan valekushanman hinan’ (2 Cor. 5:20; Hech. 16:14). Jehová Diosqa manan pitapas obliganchu paymanta yachanankupaq. Ichaqa Bibliaq nisqanman hina yachachisun chayqa, yaqapaschá willasqanchis runakunaq tapuyninman mañakuyninmanpas kutichinqa. Pitapas yachachiyta munaspaqa amapuni qonqaychu Jehová Diospa yanapayninta, yuyaychayninta mañakuyta (1 Cró. 29:18, 19; Efe. 1:16-18).