Noé arcata ruwan

Tiempowanmi askha runakuna jallp’api tiyarqanku. Yaqa llapankun millayman tukupurqanku. Wakin angelkunapas millaymanmi tukupurqanku. Janaq pachapi tiyanankuta saqespan kay pachaman jamurqanku. ¿Imapaqtaq jamurqankuri? Runakuna jina aycha cuerpoyoq kanankupaq, jinaspa warmikunawan casarakunankupaq.

Chay angelkunan warmikunawan casarakuspa wawakunayoq karqanku, wawankutaq wiñaspa jatun runakuna kapurqanku, sinchitan runakunatapas maqaqku. Jehová Diosqa manan jinallatachu chaykunata qhawarqan. Chaymi sinchita parachimuspa llapa millay runakunata wañuchipurqan.

Noé ichaqa mana chhaynachu karqan. Payqa Jehová Diostan munakurqan. Noeqa esposayoq kinsa qhari wawakunayoqmi karqan, sutinkun karqan: Sem, Cam, Jafet. Paykunapas esposayoqmi karqanku. Jehová Diosmi Noeta nirqan arcata ruwananpaq, chaypi Noepas familianpas salvakunankupaq. Chay arcan karqan maderamanta ruwasqa jatunkaray caja jina. Jinaspapas Jehová Diosmi kamachirqan askha animalkunata arcaman apaykunanpaq, chhaynapi chay animalkunapas salvakunankupaq.

Noeqa kaqpachan arca ruwayta qallarirqan. Familianwanmi 50 watapi jina arca ruwayta tukurqanku. Diospa nisqanman jinapunin ruwarqanku. Chay watakunapin Noeqa runakunaman willarqan jatun para chayamunanmanta, ichaqa manan pipas kasukurqanchu.

Jinan arcaman jaykunankupaq hora chayamurqan. ¿Iman chay qhepaman pasarqan? ¿Yachayta munawaqchu?