¿Imaynatan Diospa churasqan umalliqkunata qhawarinanchis?

1. ¿Imaraykun Jehová Diospa llaqtanpi juj nisqalla thajpi kausanchis?

JEHOVÁ DIOSPA llaqtanpiqa juj nisqallan thajpi kausanchis, ¿imarayku? Jehová Diospa churasqan umalliqkunata kasukusqanchisraykun. Chaytachus allinta entiendesunchis chayqa juj nisqallan Jehová Diosninchista servisunchis.

2. ¿Ima tapuykunatan kay yachachikuypi kutichisunchis?

² Kay yachachikuypin yachasunchis imaynatas qhawarinanchis Diospa churasqan umalliqkunata, chaymantapas kay tapuykunamantan yachallasuntaq: ¿Imaynatan hermanakuna iñiq t’aqapi kaq umalliqkunata qhawarinanku? ¿Llapa bautizasqa hermanokunachu hermanakunaq umallin kanku? ¿Imapin jujniray iñiq t’aqapi umalliqkunaq kamachikusqanwan familiapi umallikunaq kamachikusqanwan? Ñaupaqta yachasunchis imatachus hermanakuna ruwanankumanta, imaynatas paykunata qhawarinanchis chaymantawan.

¿IMAYNATAN IÑIQ T’AQAPI HERMANAKUNATA QHAWARINANCHIS?

3. ¿Iman yanapawasun hermananchiskunata astawan valorananchispaq?

³ Iñiq t’aqapi hermananchiskunaqa imaymanatan ruwanku: familiankuta uywanku, Diospa siminmanta yachachinku, iñiq t’aqapi hermanokunatapas yanapanku. Chaymantapas sichus Jehová Dios jina, Jesús jina, apóstol Pablo jina paykunata qhawarisunchis chayqa, astawanraqmi hermananchiskunataqa valorasun.

4. ¿Imaynatan Jehová Dios Bibliapi rikuchishan warmipas qharipas igual-lla kasqankuta?

⁴ Bibliapin willashan warmipas qharipas Jehová Diospaqqa igual-lla kasqankuta. Bibliapin willashan Jehová Diosqa ñaupa tiempo cristianokunaman qharimanpas warmimanpas santo espiritunta qosqanmanta. Chayraykun paykunaqa milagrokunata ruwayta atiranku juj rimaykunapipas rimayta qallariranku (Hech. 2:1-4, 15-18). Janaq pachapi Jesuswan kuska kamachikuq cristianokunapas manan qharikunallachu kanku (Gál. 3:26-29). Kay allpanchis paraiso kapuqtinpas warmipas qharipas llapallankun wiñay kausayta chaskinqaku (Apo. 7:9, 10, 13-15). Jesuspas warmikunatawan qharikunatawanmi kamachiran Diospa siminmanta runakunaman willanankupaq (Mat. 28:19, 20). Hechos libropin willashan imaynata Priscila qosan Aquilapiwan Apolosta yanapasqankumanta, paykunan “aswan allinta entiendechiranku Diospa ñanninta” (Hech. 18:24-26).

5. Lucas 10:38, 39, 42 nisqan jina, ¿imaynatan señorninchis Jesucristo warmikunata qhawariran?

⁵ Jesusqa respetowanmi warmikunata qhawariq. Fariseokunaqa warmikunatan pisichaqku, chaymi warmikunawanqa mana rimaqkuchu ni Diosmantapas yachachiqkuchu. Jesusmi ichaqa qharikunamanpas warmikunamanpas igualta Diosmanta yachachiq (leey Lucas 10:38, 39, 42).b Diosmanta willaq riqtinpas warmikunaqa paywan kuskan riranku (Luc. 8:1-3). Kausarimpusqan qhepamanpas warmikunawanmi apostolninkunaman willachiran kausarimpusqanta (Juan 20:16-18).

6. ¿Imaynatan apóstol Pablo warmikunata qhawariran?

⁶ Apóstol Pablon Timoteota kallpacharan warmikunata sumaqta respetowan qhawarinanpaq. Timoteotan niran kuraq warmikunata mamitanta jina sumaqta qhawarinanpaq, sipas hermanakunatapas pananta jina qhawarinanpaq (1 Tim. 5:1, 2). Apóstol Pabloqa maytan Timoteota yanaparan allin iñiyniyoq kananpaq, chaymi yuyarichiran imaynatas wawachanmantapacha mamitanpas abuelanpas ‘ch’uya qelqakunata’ yachachiran chayta (2 Tim. 1:5; 3:14, 15). Chaymantapas apóstol Pabloqa Romapi tiyaq hermanakunamanmi sutinmantakama napaykuyninta apachiran. Willarantaqmi imaynatas paykunaqa Diospa llaqtanpi sumaqta yanapakusqankumanta (Rom. 16:1-4, 6, 12; Filip. 4:3).

7. ¿Ima tapuykunamantan yachasunchis?

⁷ Kaypi yachasqanchisman jina, Bibliapiqa sumaqtan warmikunamanta riman, manapunin paykunataqa pisichanchu. Arí, paykunaqa munakuq sumaq sonqo kasqankuwanmi yanapakunku iñiq t’aqapi sumaq kausay kananpaq. Chaytan umalliqkunapas allinta reparanku. Ichaqa yaqapaschá kaykunata tapukusunman: ¿Imaraykun Jehová Dios munan mayninpi warmikuna umankuta tapakunankuta? Chaymantapas qharikunallataq iñiq t’aqapi umalliq kayta atinkuman chayqa, ¿chaywanchu nishan “llapa iñiq t’aqapi qharikunan warmikunaq umanqa” nispa?

¿LLAPA BAUTIZASQA HERMANOKUNACHU IÑIQ T’AQAPI HERMANAKUNATA UMALLINKU?

8. Efesios 5:23 nisqan jina, ¿imaraykun nisunman “manan llapa bautizasqa hermanokunachu hermanakunaq umanqa” nispa?

⁸ Manan, aswanpas señorninchis Jesucristollan iñiq t’aqapi llapa hermananchiskunaq umanqa (leey Efesios 5:23). Familiapiqa qosapunin esposaq umanqa, juj wawanña bautizasqa kanman chaypas payqa manan mamanpa umanqa kayta atinmanchu (Efes. 6:1, 2). Chaymantapas iñiq t’aqapi umalliqkunaqa manan hermanokunatapas hermanakunatapas llapanpipunichu kamachinku (1 Tes. 5:12; Heb. 13:17). Wakin hermananchiskunaqa manañan papankuwan kuskachu tiyanku, ¿pitaq paykunaq umanri? Papantaqa respetanqaña chaypas umalliqkunatapas kasukunqaña chaypas, manan paykunachu paypa umanqa aswanpas señorninchis Jesucriston.

9. ¿Imaraykun mayninpi hermananchiskuna umankuta tapakunanku?

⁹ Jehová Diosmi qharikunata churaran iñiq t’aqapi umalliq kanankupaq, chhaynapi iñiq t’aqata pusarinankupaq (1 Tim. 2:12). ¿Imaraykun qharikunallata churaran umalliq kananpaq? Jehová Diospa llaqtanpi imapas ordenpi ruwakunanpaqmi, chaymi Jesustapas qhariq uman kananpaq churaran (1 Cor. 11:4-7).c Sichus juj hermana mayninpi Diospa llaqtanpi yachachinqa otaq mañakunqa chayqa umantan tapakunan. Chaytan Jehová Dios paykunata kamachin. Chayta ruwaspan paykunaqa rikuchinqaku Diospa churasqan umalliqkunata respetasqankuta. Kunantaq kay tapuyta kutichisun: ¿Imapin jujniray iñiq t’aqapi umalliqkunaq kamachikusqanwan familiapi umallikunaq kamachikusqanwan?

FAMILIAPI UMALLIQKUNAQ IÑIQ T’AQAPI UMALLIQKUNAQ KAMACHIKUSQAN

10. ¿Imaraykun mayninpi iñiq t’aqapi umalliqkuna kamachikuykunata churayta munankuman?

¹⁰ Jesusta munakusqankuraykun iñiq t’aqapi umalliqkunaqa iñiqmasikunata munakunku (Juan 21:15-17). Chayraykupaschá wakin umalliqkunaqa juj tayta jina hermanokunata yanapayta munaspa ninman: “Familiata umalliq qosakunaqa wawankuta cuidanankupaqmá riki imaymana kamachikuykunata churanku, chhaynata noqapas hermanokunata kamachisaq”, nispa. Chaymantapas, yaqapaschá iñiq t’aqapi hermanokunapuni umalliqkunata ninkuman paypa rantinpi imatapas decidinankupaq.

11. ¿Ima ruwanankun kaqlla familiapi umalliqkunapaq iñiq t’aqapi umalliqkunapaqpas?

¹¹ Apóstol Pabloqa willaranmi familiapi umalliqkunaqpas iñiq t’aqapi umalliqkunaqpas wakin ruwayninkuqa kaqlla kasqanta (1 Tim. 3:4, 5). Jehová Diosqa maytan munan esposapas wawakunapas familiapi umalliqta kasukunankuta, munallantaqmi iñiq t’aqapi umalliqkunata respetanankutapas (Col. 3:20). Chhaynaqa, ¿ima ruwanankutan Jehová Dios munan familiapi umalliqkunata iñiq t’aqapi umalliqkunatapas? Payqa munanmi hermanonchiskuna familiapi kaqkunapas allin iñiyniyoq kanankuta munasqa ima sientekunankuta (Sant. 2:15-17). Chaymi iñiq t’aqapi umalliqkunapas familiapi umalliqkunapas jujkunata yanapananku Diospa kamachikuyninkunata kasukunankupaq, ‘imachus qelqasqa kashan chaykunallata ruwanankupaq’. Chay ruwanankutan Jehová Diosqa munan (1 Cor. 4:6).

12, 13. Romanos 7:2 nisqanman jina, ¿imakunapin mana kaqllachu iñiq t’aqata umalliq ruwasqanwan familiata umalliq ruwasqanwan?

¹² Ichaqa, ¿imakunapin mana kaqllachu iñiq t’aqapi umalliq ruwasqanwan familiata umalliq ruwasqanwan? Jehová Diosmi iñiq t’aqapi umalliqkunata kamachin iñiq t’aqapi kaqkunata juzganankupaq, juchankumanta mana pesapakuqkunatapas qarqonankupaq (1 Cor. 5:11-13).

¹³ Familiata umalliqkunatan Jehová Diosqa kamachin familian allin cuidasqa kananpaq kamachikuykunata churananpaq ima. Chaykunatan ichaqa iñiq t’aqapi umalliqkunaqa mana ruwayta atinkumanchu (leey Romanos 7:2). Familiapi umalliqkunaqa wawankutan ninkuman imay horasta wasinman chayamunankuta, mana kasukuqtinkutaq sumaqta paykunata yuyaychananku (Efes. 6:1). Ichaqa ima kamachikuytapas churananpaqqa esposanwanraqmi ñaupaqta parlarinan, chhaynapin ‘juj aychalla’ kasqankuta rikuchinqa (Mat. 19:6).d

CRISTON IÑIQ T’AQATA UMALLIQQA

14. a) Marcos 10:45 nisqan jina, ¿imaraykun Jehová Dios Jesusta churaran iñiq t’aqata umallinanpaq? b) ¿Imaynatan umalliq t’aqa umalliwachis? (Qhaway “¿Imaynatan umalliq t’aqa umalliwanchis?” nisqata.)

¹⁴ Jehová Diosmi Jesuspa yawarninwan rantiran llapa iñiq t’aqapi kaqkunaq kausayninta, Jesuspi iñipuq runakunaq kausaynintawan (leey Marcos 10:45; Hech. 20:28; 1 Cor. 15:21, 22). Chaymi Jehová Diosqa Jesusta churaran iñiq t’aqata umallinanpaq. Chayraykun Jesusqa kamachikuykunata churan iñiq t’aqakunapaq, familiakunapaq, llapa runakunapaqpas; chay junt’akunantataqmi munanpas (Gál. 6:2). Ichaqa manan kamachikuykunallatachu churan, aswanpas sumaqtan yachachiwanchis uywawanchispas (Efes. 5:29).

15, 16. ¿Imatan yachasunman Marley hermananchispa Benjamín hermanonchispa nisqankumanta?

¹⁵ Iñiq t’aqapi hermanakunaqa umalliqkunatan kasukunku, chayta ruwaspan rikuchishanku Jesucristota respetasqankuta. Estados Unidos nacionmanta Marley hermananchismi nin: “Qosaypas iñiq t’aqapi hermanokunapas respetawankun, imachus ruwasqaytapas allinpaqmi qhawarinku, chaymi noqaqa paykunata respetani kasukuni ima”, nispa. Chay hermananchis jinan askha hermananchiskunapas piensanku.

¹⁶ Hermanonchiskunaqa hermanakunata respetowan qhawarispan rikuchinku Cristota umalliqta jina respetasqankuta. Inglaterra nacionmanta Benjamín hermanonchismi nin: “Hermananchiskunaqa anchatan yanapawanku, paykunaqa sumaqtan juñunakuykunapi rimanku. Chaymantapas yuyaychawankun Bibliata allinta estudianaypaq Diosmanta jujkunaman willanaypaqpas. Chaymi noqaqa hermananchiskunataqa allinpaq qhawarini”, nispa.

17. ¿Imaraykun Diospa churasqan umalliqkunata kasukunanchis?

¹⁷ Sichus warmipas, qharipas, qosakunapas, umalliqkunapas Jehová Diospa churasqan umalliqkunata kasukusun chayqa, iñiq t’aqapin thaj kausasunchis. Astawanqa Jehová Diostan jatunchasunchis (Sal. 150:6).