¿Allinchu kanman mana casarakuspalla piwanpas tiyay?
¿Imaninmi Biblia?
Biblian niwanchis Diosqa manan munanchu “qhelli juchaman” urmananchista (1 Tesalonicenses 4:3). Bibliaq nisqanman jinaqa “qhelli juchan” jujwan pantay, qharipura otaq warmipura puñuy, mana casado kashaspa warmi-qhari puñuypas.
¿Imaraykun Dios munan warmi-qhari casarasqa kanankuta?
Casado kausaytaqa Diosmi qallarichirqan. Chaytataq ruwarqan ñaupaq warmi-qharita casarachispa (Génesis 2:22-24). Diosqa manan munarqanchu warmi-qhari manaraq casarakuspa tiyanankuta.
Diosqa yachanmi imas allin noqanchispaq. Diosmi casarakuytaqa paqarichirqan warmi-qhari casarakuspa pasaqpaq tiyanankupaq. Diosmi murarqan casarasqa ukhupi warmipas, qharipas, wawakunapas kusisqa kausanankuta. Kaypi piensay: Juj muebleta otaq roperota allinta armanapaqqa manualpa nisqanman jinan armananchis. Chhaynallataqmi familianchiswan kusisqa kausanapaqpas Diospa nisqanman jina kausananchis. Sichus kasukusun chayqa allinninchispaqpuni kanqa (Isaías 48:17, 18).
Juj muebleta otaq roperota armanapaqqa manualpa nisqanman jinan armananchis. Chhaynallataqmi familianchiswan kusisqa kausanapaqpas Diospa nisqanman jina kausananchis.
Manaraq casarasqa kashaspa warmi-qhari puñuyqa jatun llakikunatan apamun. Chaykunan kashan manaraq tiemponpi wawayoq kay, millay onqoykunawan contagiachikuy, llakisqa ima tarikuy.
Diosmi runakunaman juj regalota qorqan: Warmi-qhari puñuspa wawayoq kayta atinankupaq. Chayqa ancha valorniyoq regalon. Diospaqqa kausayqa sagradon. Chayraykun payqa munan chay regalota respetananchista casarakusqanchis qosallanchiswan otaq esposallanchiswan kaspa. Chhaynapin casado kausayta respetashanchis (Hebreos 13:4).
Allintachus icha manachus apanakusun chayta yachanapaq, ¿allinchu kanman mana casarakuspalla tiyay?
Mana. Casado kausaypi kusisqa kausanapaqqa manan juj tiempotachu mana casarakuspalla tiyananku allintachus icha manachus kausanqaku chayta yachanankupaq chaymantataq t’aqanakunankupaq. Aswanmi casarakuspa comprometekunku juj jinalla kausanankupaq kallpachakunkutaq ima sasachakuytapas allichanankupaq.a Casarakuspa tiyaspalla chay compromiso ruwasqankuta junt’anankupaq kallpachakunku (Mateo 19:6).
¿Imatan casarasqakuna ruwananku kusisqa kausanankupaq?
Casarasqakunaqa manan allintapunichu imatapas ruwanqaku. Ichaqa atinkumanmi kusisqa kausayta Bibliaq kamachisqanta kasukuqtinkuqa. Wakinmanta yachasun:
Ama munaynillaykichistachu maskhaychis aswanpas qosaykiq otaq esposaykiq munayninta ñaupaqtaqa maskhaychis (1 Corintios 7:3-5; Filipenses 2:3, 4).
Kallpachakuychis sapa p’unchay astawan munanakunaykichispaq respetanakunaykichispaq ima (Efesios 5:25, 33).
Manaraq imatapas rimashaspa ñaupaqtaraq allinta piensaykuy (Proverbios 12:18).
Paciencianakuychis usqhayllatataq perdonanakuychispas (Colosenses 3:13, 14).
a Qhaway “Casarakushaspa prometekusqaykitan junt’anayki” nisqa yachachikuyta.