¿Imatan ruwawaq jujkunata respetanaykipaq?

JUJKUNATA RESPETAYQA ANCHA ALLINPUNIN

Sichus respetanakuspa kausasunchis chayqa allinmi kanqa sapankanchispaq, thaj nisqataqmi kasunpas.

Bibliapin nin: “Sumaq simiwan rimayqa phiñakuytan thasnun, k’araq simin ichaqa phiñakuyta jatarichin”, nispa (Proverbios 15:1). Sichus mana respetowan rimasunchis ruwasunchispas chayqa, mana allinpin tarikusunchis.
Jesusmi nirqan: “Simiqa riman imachus sonqopi junt’a kashan chaytan”, nispa (Mateo 12:34). Sichus pitapas mana respetowanchu rimapayashanchis chayqa, piensaykunanchismi ¿imaraykun chhaynata paykunata qhawarishani? nispa. Juj nacionmanta kasqanraykuchu, juj colorniyoq kasqanraykuchu, jujniray costumbreyoq kasqanraykuchu. Chhayna kaqtinqa, usqhayllan cambiananchis kanqa.

Juj encuestatan ruwakurqan 28 nacionkunapi 32 mil runakunata, chaymantan kuskan más runakuna ninku, “manan jayk’aqpas rikurqaykuchu chhayna askha runakuna mana respetoyoq kasqankutaqa” nispa.

¿IMATAN RUWAWAQ?

Piwanña rimashaspapas respetowan rimay, manaña piensasqaykichis tupanchu chaypas. Ima rimasqaykichis tematachus allinta tupachishankichis chaymanta rimaychis, mana chaytachu ruwanki chayqa juzgayta, mana allinta rimayta iman qallariwaq.

“Amaña pitapas juchachaychischu, chhaynapi mana juchachasqa kanaykichispaq” (Mateo 7:1).

Imaynatachus runakuna ruwanasuykita munanki, chhaynallatataq qanpas paykunata ruway. Sichus munakuq kanki chayqa, jujkunapas munakullasunkichistaqmi.

“Imaynatachus runakuna ruwanasuykichista munankichis, chhaynallatataq qankunapas paykunata ruwaychis” (Lucas 6:31).

Perdonakuq kay. Yaqapaschá pipas mayninqa malta sientechisunkiman, chhayna kaqtinqa ama phiñakuychu.

“Allin reparaq kayninmi runaq phiñakuynintaqa jark’an, may munaymi k’amisqawan mana phiñakusqanqa” (Proverbios 19:11).

Jehová Diospa testigonkunaq juñunakunanku wasipin munayta imaymana clase runakuna rimashanku, manaraq juñunakuy qallarishaqtin.

¿IMATAN JEHOVÁ DIOSPA TESTIGONKUNA RUWAYKU?

May tiyasqaykupi, llank’askaykupi, may tarikusqaykupipas Jehová Diospa testigonkunaqa respetaykun runakunata, chaymantapas kallpachaykun paykunapas chhayna respetakuq kanankupaq.

Bibliapi imachus nisqanta allinta entiendenankupaqmi gratislla yachachiyku, ichaqa manan jayk’aqpas pitapas obligaykuchu noqayku jina piensananpaq nitaq creenanpaqpas. Aswanmi Bibliaq nisqanman jina willayku imapi creesqaykuta, chaytaqa respetowanmi willayku (1 Pedro 3:15; 2 Timoteo 2:24).

Manan pitapas pisichaykuchu. Juñunakuyniykupiqa pikunachus Bibliamanta yachayta munaqkunataqa sumaqtan chaskiyku, chaymantapas llapaykun kallpachakuyku respetowan llapa runakunata chaskinaykupaq (1 Pedro 2:17).

Gobiernoq churasqan autoridadkunatapas respetaykun tiyasqayku llaqtapiqa (Romanos 13:1). Leykunatapas kasukuykun impuestokunatapas pagaykun. Noqaykuqa manaña gobiernota politicapi apoyaykuchu chaypas, respetaykun jujkunaq imachus politicamanta piensasqankutaqa.