Diosqa interesakunmi ñoqanchispi ¿imaynapin chayta yachanchis?
ÑAWPA tiempomantapachan runakuna tapukunku: “Sichus Dios munakuwanchis chayqa, ¿imaraykun runaq ñak’arisqanta ch’inlla qhawarin?” nispa. Wakinqa nillankutaq: “Pi reqsisqaykipas ñak’arishanman chayqa, usqhayllachá yanapawaq, ¿imaraykutaq Diosri mana chhaynachu? ¿Imaraykun mana tukuchinchu mana allin kaqkunata? Manachá riki imapas ñoqanchismanta qokunchu”, nispa. Chhaynataña ninku chaypas, Jehová Diosqa interesakunmi ñoqanchispi. Chaymantan qatiqninpi yachasunchis. Chaymantataq yachasun imaynatachus ñak’ariykunata chinkachinqa chayta.
Kamasqankunan rikuchin munakuyninta
Jehová Diosmi ‘hanaq pachata, kay pachata, lamar-qochata, chaykunapi lliw kaqkunatapas kamarqan’ (Hechos 4:24). Chaykunata qhawarispan reparasunman ancha munakuwasqanchista. Munakuwaspanchismi imaymana clase mikhuykunata qowarqanchis. Huk mikhuyllata qowasunman karqan chayri, ¿kusichu kawsasunman karqan? Manan riki. Chaymantapas munakuwaspanchismi kay pachatapas sumaqta munaycharqan sach’akunawan, imaymana t’ikakunawan ima.
Jehová Diosqa kamawarqanchis asirikunapaq, takinapaq, allin gustoyoq kananchispaqmi. Manaña chaykuna necesariochu kawsananchispaq chaypas, kusichiwanchismi. Chaymantapas Jehová Diosqa munakuq kananchispaqmi kamawarqanchis. Chayraykun amigonchiskunawan familianchiskunawan ima sumaqta kawsanchis. Chhayna munakuqta kamawasqanchispin yachallanchistaq Jehová Diospas munakuq kasqanta.
Biblian willawanchis munakuyninta
Biblian willawanchis Diospa maytukuy munakuwasqanchista. Chaypin nin: “Diosqa munakuymi”, nispa (1 Juan 4:8). Bibliaq yachachiyninkunaqa yanapawanchismi qhalilla kananchispaq, chaymi cuidakunchis viciokunamanta, machaymanta, rakrapu-kaymanta hukkunamantawan (1 Corintios 6:9, 10).
Bibliaqa yachachiwallanchistaqmi hukkuna hukkunawan qhawarinakuspa, respetanakuspa, munanakuspa sumaqta kawsananchispaq (Mateo 7:12). Chaymantapas sut’intan niwanchis yanqa tumpanakuymanta, warmi-qhari pantaymanta, runa wañuchiymanta, qolqe sonqo-kaymanta, envidianakuymantapas cuidakunanchispaq, chay ruwaykunaqa nishutan ñak’arichin runamasinchista. Sichus Bibliaq kamachisqanta llapallanchis kasukusunman chayqa pisiyapunmanmi ñak’ariykuna.
¿Imatawantaq Diosri ruwarqan munakuyninta rikuchiwananchispaq? Wawan Jesustan kay pachaman kachamurqan wañuymanta huchamantawan kacharichiwananchispaq. Chaymantan Biblia nin: “Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq”, nispa (Juan 3:16). Jesuspa sacrificakusqanwanmi Diosqa wiñaypaq chinkachinqa ñak’ariyta wañuytawan (1 Juan 3:8).
Chhaynaqa Diosqa anchatan munakuwanchis, manataqmi munanchu ñak’arinanchista. Payqa tukuchinqapunin ñak’ariykunata. Bibliaqa sut’itan willawanchis imaynatachus chay ruwananta. Chaymantan qatiqninpi yachasunchis.
[27 paginapi foto]
Diosqa ancha munakuqmi, chaymi munakuyniyoqta kamawarqanchis