Diospa sutin orqo-orqo wayq’opi
YAQAPASCHÁ uyarirqanki Saint Moritz sutita. Chaytan huk nacionkunamanta askha runakuna qhawaq rinku. Chay llaqtaqa tarikun Suizaq urayninpi inti lloqsimuy kinraypi, Italia nacionwan tuparinapi. Ñawpa tiempomantaraqmi rit’i-rit’i orqo ukhupi sumaq Engadina wayq’opi tarikuq llaqtata rinku. Ichaqa manan chayraykullachu rinku, chaypiqa kashallantaqmi ancha sumaq sach’akunayoq t’ikakunayoq imaymana uywakunayoq sumaq Parque Nacional Suizo, chaypi kaq tukuy imapas anchatan hatunchan Kamaq Diosta (Sal. 148:7-10). 1600 watamanta wichayman runakunaq costumbrenkunapas Diostan hatunchallantaq.
Chay llaqtapiqa wasikunaq ñawpaqenpi qelqasqankun ancha sumaq qhawarinapaq kashan. Ñawpaq tiempomantaraqmi chaypi tiyaqkunaqa wasinkuta sumaqyachiqku punkunkuq hawanpi imatapas qelqaspa, chaytaqa sumaqtan ruwachiqku rumipi otaq pintaqku. Chaykunapin Diospa sutin qelqasqa rikhurishan. Uraypin rikukushan Bever llaqtapi imayna ruwasqanku, nishanmi: “Kay wasiqa 1715 watapin ruwasqa. Jehová Diosmi qallariypas Jehová Diosmi tukukuypas. Paywanmi tukuy imapas ruwakun pay mana kaqtinqa manan imapas kanmanchu”, nispa. Chay qelqasqankupin iskay kutita Diospa sutin rikhurishan.
Madulain llaqtapiqa huk wasiq perqanpin aswan ñawpaq watapi qelqasqanku rikhurin, khaynatan nishan: “Salmo 127. Jehová Dioschus wasita mana sayarichin chayqa, yanqapaqmi wasichaqkunaqa wasichan. Lucio Rumedio. 1654 watapi”, nispa.
¿Imaraykun Diospa sutinta wasi punkunkuq hawanpi qelqarqanku? Chay tiempopin Católica religionpa mana allin ruwasqanta allichay munaqkuna, latín rimaymanta hamuq Romanche rimayman Bibliata t’ikrarqanku, chay simitan Engadinapi rimaqku. Ñawpaqpiqa manan ima libropas t’ikrakusqaraqchu chay rimayman. Biblia leesqankuqa sonqonkumanmi chayarqan, chaymi punkunkuq hawanpiqa mana sutillankutachu churarqanku aswanpas Diospa sutinmanta willaq textokunatawan.
Wasinkupi Diospa sutinta qelqasqankuqa kunankaman Diosta hatuchashan. Chay llaqtapiña tiyanki otaq visitaqña rinki chaypas, invitaykikun Jehová Diospa testigonkunaq huñunakunanku wasipi chay Diosmanta astawan yachanaykipaq.
[7 paginapi kaq fotota horqorqan]
© Stähli Rolf A/age fotostock