Paykuna puran ‘munanakunku’
“Mosoq kamachikuytan churapuykichis: Qankunapura munanakuychis. Imaynan ñoqapas munakuykichis, ahinata qankunapas munanakuychis. Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis.” (JUAN 13:34, 35.)
¿Imamantan Jesús rimasharqan? Jesusqa anchatan qatikuqninkunata kallpacharqan paykuna pura munanakunankupaq, imaynan paypas munakuywan qhawarirqan hinata. Chhaynaqa, ¿imaynatan Jesús rikuchirqan munakuyninta? Payqa sumaqtan huk llaqtayoq runakunata qhawariq hinallataq warmikunatapas, manan chay tiempopi runakuna hinachu pisicharqan (Juan 4:7-10). Payta qonqakusparaqmi tiempontapas kallpantapas qorqan (Marcos 6:30-34). Hatun munakuynintan ichaqa rikuchirqan kawsayninta qospa. Paymi nirqan: ‘Ñoqan allin michiqqa kani [...] ovejankunarayku wañuq’, nispa (Juan 10:11).
Ñawpa Cristianokunaq ruwasqanku. Chay tiempopi cristianokunaqa ‘wawqey’ otaq ‘panay’ nispan ninakuqku (Filemón 1, 2). Iñiq t’aqapiqa huk llaqtayoq runatapas ancha sumaqtan chaskiqku. Paykunapaqqa ‘Judío runakunapas mana judío runakunapas kaqkamallan karqan, kikin Señor llapaq Señornin’ kasqanrayku (Romanos 10:11, 12). Chaymi 33 Pentecostés fiestaq tukusqan qhepaman ‘hallp’ankutapas kaqninkutapas vendespa llapallankuman rakirqanku, sapankaq necesitasqanman hinataq’ qorqanku. ¿Imaraykun chayta ruwarqanku? Chayllaraq bautizakuqkuna qhepakuspanku apostolkunaq yachachisqankuta uyarinankupaqmi (Hechos 2:41-45). Tertulianon qelqarqan apostolkunaq wañukapusqanmanta yaqa 200 wata qhepaman, cristianokunamanta wakin runakunaq nisqanta, chaypin nirqan: “[...] Anchatan hukkuna-hukkunawan munanakunku [...] kawsayninkutapas qonkumanraqmi”, nispa.
¿Pikunan chay hinata kunan ruwashanku? Historia de la decadencia y ruina del Imperio romano libropin willakurqan “cristianon kayku” niqkuna “paykuna pura sinchi sasachakuykunapi churanakusqankuta huk runakunaq ruwasqankumantaqa aswan millaytaraq ruwanku”. Estados Unidospi chayllaraq estudiakusqanman hinan willakurqanku, huk razamanta kasqankurayku religioso pura cheqninakusqankuta pisichanakusqankutapas. Huk nacionkunamanta kashaspankupas kaq religionniyoqmi kanku, ichaqa manan munanakunkuchu. Chaymi imapi tarikuspapas mana yanapanakunkuchu.
Florida llaqtapin (EE.UU.) 2004 watapi, iskay killallapi tawa kutita tutuka wayra karqan. Chay qhepamanmi, chay sasachakuykunapi tarikuq runakunata yanapaq umalli yachayta munarqan imaynatas chay yanapaykuna chaskisqankuta rakinakushanku chayta. Chaypin repararqan Jehová Diospa testigonkunalla allin yuyaywan yanapanakushasqankuta, chaymi paykunaman imachus necesitasqankuta qorqan. 1997 watapin República Democrática del Congo nacionman Testigokunaqa aparqanku hampikunata, mikhunakunata, p’achakunata iñiqmasinkupaq huk runakunapaqpas. Chay apasqankuqa huk millón dolarmi valesqa. Chaytaqa Europa ladomanta iñiqmasinchiskunan apachimusqaku.