QALLARIYPI KAQ: ¿IMANAQTINMI ÑAK’ARIYKUNA KAN? ¿HAYK’AQMI TUKUNQA?
¡Askha runakunan wañurqanku!
Noelle sutiyoq wawan munakuqllaña karqan, paymanmi dibujay gustarqan. Huk p’unchaymi wasiq pationpi purishaqtin unuyoq piscinaman urmaspa wañupurqan. ¡Manaraqmi tawa watanmanpas chayarqanraqchu!
2012 watapi 14 diciembre killapin Estado Unidospi 20 wawakuna wañuchisqa karqanku. Soqta otaq qanchis watallayoqmi karqanku, wakinpa sutinmi karqan: Charlotte, Daniel, Olivia, Josephine ima, llapankupiqa 26 runakunan wañurqanku. Paykunata p’ampakushaqtinmi Estados Unidosmanta Barack Obama presidente wawakunaq sutinta willayta tukuspa nirqan: “Manañan chaykunaqa kananñachu”, nispa.
Bano sutiyoq sipasmi 18 watanpi Irak nacionmanta familianwan Noruega nacionman ripurqan 1996 watapi. 2011 watapi 22 julio killapi huk locoyasqa millay runa 77 wayna-sipaskunata wañurqachirqan chay ukhupin paypas tarikurqan, chay runaqa nirqanraqmi: “Pampachaykuwaychis [...] aswan askhataraqmi wañuchiyta munarqani”, nispa.
Chay hina noticiakunaqa maypipas uyarikushallanmi. Askha runakunan wañunku accidentekunapi, guerrakunapi, terremotokunapi otaq ima ñak’ariypi tarikuqtinkupas. ¡Ancha llakikunapaqmi chayqa!
Askha runakunan Diosman tumpanku ñak’arisqankumanta. Wakintaq ninku: “Diosqa rikumushanmi ñak’arisqanchista, ichaqa manan paymanqa imapas qokunchu”, nispa. Hukkunataq ninku: “Destinasqañan kashan ima llakipi rikukunanchisqa”, nispa. Reparasqayki hinaqa imaymanatan runakuna yuyaykun. Qatiqninpin sut’ita yachasunchis imanaqtinmi imaymana llakipi tarikusqanchista, chaypaqmi Diospa Simin Qelqa yanapawasunchis.