¿Astawan kallpachakusunmanchu runakunaman willanapaq?

1900 wata qallariypi San Francisco (Estados Unidos) llaqtapi imaynachus kawsay kasqantan rikuchin “Market callepi purispa”, nisqa película (inglés simipi). Chayta grabanankupaqqa huk carroq ñawpanmanmi churarqanku camarata, chhaynapi Market callenta purispa grabananpaq. Chaypin rikukun carretakuna, chay tiempopi kaq carrokuna, periódico rakiqkuna huk purikuq runakunapas.

1906 watapi 18 abril killapin chay llaqtapi huk terremoto karqan, chay peliculataqmi grabakunman karqan ñawpaq p’unchaykunallata. Chay terremotopin waranqanpi runakuna wañurqanku, sinchi thunisqataqmi qhepapurqan chay peliculapi rikukuq calleqa. Chaypi rikukuq ancha kusisqa runakunamantaqa askhachá wañupurqanku. Chay película grabaqpa huknin familianmi Scott Miles, paymi nirqan: “Chay runakunaqa manan yacharqankuchu pisi p’unchaymanta ñak’ariypi tarikunankuta, chayta rikuyqa ancha khuyapayanapaqmi”, nispa.

Kay tiempopi runakunapas anchata khuyapayanapaqmi. Paykunaqa imaymana ruwayninkupin afanasqa kaspan mana reparankuchu kay pachaq tukukuynin chayamushasqanta. Terremoto hayk’aqchus kanantaqa manan yachakunchu, Diospa juzgana p’unchay chayamunanmantan ichaqa runakunaman willayta atinchis. Llapanchispas tiempotaqa t’aqanchischá ima p’unchaykuna predicaq lloqsinapaq, ichaqa ¿astawan kallpachakusunmanchu runakunaman willanapaq?

JESUSQA PREPARASQAN KARQAN PREDICANANPAQ

Jesusqa preparasqapunin kasharqan predicananpaq. Piwanpas rimaqpunin, payqa rimarqanmi impuesto cobraq runawan tupaspa, chawpi p’unchaypi hina p’uytu patapi huk warmiwan tupaspapas (Luc. 19:1-5; Juan 4:5-10, 21-24). Samanan kashaqtinpas chaytaraqmi saqeq runakunata yachachinanpaq. Payqa manan pisillatachu ruwaq, khuyapayakuq kasqanraykun tukuy atisqanta ruwaq (Mar. 6:30-34). ¿Imaynatan wakinkuna rikuchinku Jesús hina mana tiempota usuchispa predicasqankuta?

TIEMPOTAN MANA USUCHINKUCHU

Melika cristianaqa allin cuidasqa edificiopin tiyan. Vecinonkunaqa huk nacionkunamanta hamuq estudiantekunan, sutinkupas telefononkupas manan tarikunchu edificioq punkunpi kaq listapi. Payqa anchatan munan vecinonkunawan Bibliamanta rimayta, chaymi atikusqanman hina paykunawan riman ascensorpi otaq edificioq punkunpipas. Ninmi: “Chayqa predicanaypaq territorion”, nispa. Askha simikunapin qelqanchiskunata payqa apan, chaymi askha runakunaman chay qelqakunata saqerqan. Hinaspapas willanmi Internetpi jw.org nisqaman haykunankupaqpas. Melika cristianaqa askha runakunamanmi estudiota qoshan.

Soniapas kallpachakunmi llapa runakunaman predicananpaq. Payqa huk clinicapin llank’an chaypin llapa llank’aqmasinkunaman predicayta munarqan. Ñawpaqtaqa sapanka llank’aqmasinkuna imaynapi tarikusqankuta imachus necesitasqankutan qhawarirqan, chay qhepamantaq almuerzo horaspi sapankata maskhaspa Bibliamanta rimapayarqan. Chayta ruwaspan iskay estudiokunata qallarirqan. Kunanqa samanan horaskunapin clinicata hamuq runakunaman predicananpaq yuyaykushan.

KAQLLATATAQ RUWASUN

1906 watapi terremoto sucedesqanmanta salvakuq runa nirqan: “Chay terremoto hinaqa manan may llaqtapipas sucederqanchu”, nispa. Ichaqa pisi tiempomanta terremotokuna hukkunapas mana imapaschu kanqa Jehová Diospa hatun phiñakuynin p’unchaywan, chaypin ‘Diosta mana reqsiqkunaqa’ ch’usaqyachisqa kanqaku (2 Tes. 1:8). Chaymi Jehová Diosqa munan llapa runakuna allin willakuykunata uyarispa kawsayninku cambianankuta (2 Ped. 3:9; Apo. 14:6, 7).

Llapa runakunatan yanapananchis tukukuy tiempopiña kawsasqanchista reparanankupaq Jehová Diosta maskhanankupaqpas (Sof. 2:2, 3). Chayraykun imataña ruwashaspapas kallpachakunanchis llank’aqmasinchiskunata, vecinonchiskunata, huk runakunatapas predicananchispaq. Chhaynaqa, ¿astawan kallpachakusunmanchu runakunaman willanapaq?