Predicayta atiwaqmi may tarikusqaykipipas

1. a) ¿Iman predicación informal nisqa? b) ¿Hayk’an kaypi kaqkunamanta Diospa Siminta uyarirqankichis callepi, llank’anapi otaq huk ladokunapi?

¹ ¿Hayk’an Diospa llaqtanpi qanwan huñunakuqkunamanta predicación informal nisqapi Diospa Siminmanta uyarirqanku? Askhapaschá kashanku. ¿Imataq predicación informal nisqari? Maypi tarikuspapas Diospa Siminmanta willaymi. Chaytaqa ruwasunman: escuelapi, llank’anapi, rantikuq rispa, familiakunata otaq vecinokunata visitaspa, viajaspa otaq maypipas. Huk t’aqa iñiqmasinchiskuna ukhupin kanku iskay pachaq Testigokuna hina, sapa pachaq Testigokunamantataq tawa chunka chhaynapi Diospa Siminta uyarisqaku. Chaypin yachanchis maypi tarikuspapas predicay allinpuni kasqanta.

2. ¿Imaynatan ñawpa tiempopi cristianokuna predicaqku?

² Apostolkunaq tiemponpi cristianokunapas may tarikusqankupin predicaqku. Wakinmanta yuyarisun. Jesusmi huk kutin Samaria llaqtanta pasashaspa p’onqopi unu wisikuq warmita Diosmanta rimapayarqan (Juan 4:6-26). Felipe cristianon huk Etiope runa Isaías qelqata leeshaqtin asuykuspa tapurqan: “¿Entiendenkichu leesqaykita?” nispa (Hech. 8:26-38). Pablopas carcelpi kashaspan carcelerota predicarqan (Hech. 16:23-34). Qhepamanmi Pabloqa huk wasipi guardiakunaq qhawasqan kashaspa “chaskirqan llapan payta watukamuqkunata”. Pabloqa “Diospa qhapaqsuyunmanta willarqan, Señor Jesucristomantapas yachachirqan” (Hech. 28:30, 31). Chhaynatataq paykunapas predicarqanku chayqa, qanpas manchapakunkiña chaypas, predicayta atiwaqmi may tarikusqaykipipas. ¿Imaynatan chayta ruwawaq?

3. ¿Iman yanapawasun mana manchakuq kanapaq?

³ Qallariypi. Wakinqa sasatan mana reqsisqanku runawan parlata tupachinku. Reqsisqanchis runaña kankuman chaypas, mayninqa manchapakunchismi Diospa Siminmanta willayta. Ichaqa chhaynata manchapakushaspan yuyarina Jehová ancha sumaq Dios kasqanpi, ancha sumaq yachaykuna yachachiwasqanchispi, kay pachapi runakuna imayna tarikusqankupipas, chaykunan tanqariwasun Diosmanta willananchispaq (Jon. 4:11; Sal. 40:5; Mat. 13:52). Jehová Diostapas mañakunanchismi kallpata qowananchispaq (1 Tes. 2:2). Escuela de Galaad nisqaman riq iñiqmasinchismi nin: “Diosmanta sapa kutilla mañakuqtiymi kallpata hap’ini runakunawan rimanaypaq”, nispa. Sichus qanpas manchapakushanki chayqa sonqollaykipi Diosmanta mañakuy (Neh. 2:4).

4. ¿Imaynatan qallariwaq predicanaykipaq? ¿Imaraykun chayta ruwananchis?

⁴ Sapallanchis maypipas predicanapaqqa manan yachananchisraqchu imaynanmanta qallariyta, nitaqmi huk textota leespachu qallarinanchis. Imamantapas rimaspan qallariwaq, manataqmi kaqratopachachu predicanayki. Chayta ruwaspan askha cristianokuna manaña manchakunkuchu Diospa Siminmanta willayta. Sichus rimapayasqayki runa mana parlayta munanchu chayqa amaña rimapayaychu sumaqllata despedikuspa pasapuy.

5. ¿Imaynatan huk manchapakuq cristiana predican?

⁵ Huk manchapakuq hermananchismi khaynata predican: rantiq risqanpin pitapas asirikuspa qhawarin. Chay runa asirikuspa qhawariqtintaq imallatapas rimaykun. Rimasqanman kutichiqtintaq mana manchakuspa parlayta qallarin. Allinta qhawarispan reparan imakunapi chay runa interesakusqanta. Chayta ruwaspan chay cristiana askhamanña qelqakunata saqen ñan huk estudiotapas tarirunña.

6. ¿Imaynatan rimayta qallariwaq?

⁶ Manchapakuyta atipanapaq. ¿Imanispan parlayta qallarisunman? Jesusmi p’onqopi kashaq warmiwan rimananpaq unuta mañakurqan (Juan 4:7). Yaqapaschá qanpas napaykuspa otaq imallatapas tapurispa manaña manchapakuwaqchu. Parlasqaykiman hinan pisi-pisimanta Bibliamanta rimayta qallariwaq sonqonpi Diospa Siminta tarpunapaq (Ecl. 11:6). Wakinqa runakunaman astawan interesasqanmantan rimayta qallarinku, chayman hinataq imatapas tapuykunku. Yaqapaschá doctorta suyakushaspa ladoykipi kaqta niwaq: “Maytan kusikusaq onqoy chinkapuqtin”, nispa.

7. ¿Imaynatan allin reparaq kay yanapawasunman predicayta qallarinapaq?

⁷ Chaymantapas allin reparaqmi kananchis. Yaqapaschá huk warmiq wawankuna santolla kanku, chayta qhawarispaqa niwaqmi: “¿Imatan ruwanki wawaykikuna khayna sumaq kanankupaq?” nispa. Huk cristianan makilla uyarin llank’aqmasinkuna rimasqankuta, hinaspa sapankankuman imachus interesasqanman hina qelqakunata qon. Huk kutinmi yacharusqa huk llank’aqmasin casarakunanta, chaymi ¡Despertad! revistapi casarakunapaq yanapaykunata tarispa chayta aparqan. Chayman tumpallan Bibliamanta rimayta qallarirqanku.

8. ¿Imaynatan qelqanchiskunawan predicayta qallarisunman?

⁸ Chaymantapas hukkuna rikunanpaqmi qelqanchiskunata leesunman. Huk iñiqmasinchismi chayta ruwan, payqa ch’inllan leen Qhawaq otaq ¡Despertad! revistata. Pipas qhawashasqanta reparaspataq tapurin otaq willan imamanta chay revista rimasqanta. Chayta ruwasqanmi yanaparqan runakunawan parlarinanpaq predicayta qallarinanpaqpas. Llank’asqanchispi otaq escuelapipas hukkunaq rikusqanmanmi qelqanchiskunata churasunman yaqapaschá mesapi otaq carpetapi, chayta tarispan hukkuna imallamantapas tapukunkuman hinaspa predicasunman.

9, 10. a) ¿Imakunatan ruwasunman maypipas tarikuspa predicanapaq? b) ¿Imatan qanpas ruwanki?

⁹ Ñoqanchismi qallarinanchis. Tukukuy tiempopi tarikusqanchisraykun makilla predicananchis, manan hukkuna rimaywananchistaraqchu suyananchis predicayta qallarinapaq. Aswanmi kallpachakunanchis maypi tarikuspapas tukuy imaymanata ruwaspa predicanapaq. Ñawpaqmantan yuyaykunayki tupasqayki runakunawan imamanta rimanaykipaqpas. Manapunin Bibliaykipas huk qelqakunapas makiykipi faltananchu munaqkunaman qonaykipaq (1 Ped. 3:15).

¹⁰ Askha cristianokunan imaymananmanta predicanku. Huk cristianan allin cuidasqa edificiopi tiyan, chaymi chaypi tiyaq runakunaman predicayta munaspa chay edificioq parquenpi tiyayuspan sumaq campokunamanta rompecabezas nisqata arman. Runakuna chayninta pasaspa “¡munaycha!” nispa qhawashaqtinkutaq chayman tumpalla ‘mosoq hanaq pachamanta mosoq hallp’a pachamantawan’ rimayta qallarin (Apo. 21:1-4). ¿Imakunata ruwaspan qanpas predicawaq?

11.¿Imatan ruwasunman uyarikuq runakunata yanapanapaq?

¹¹ Astawan yanapasun uyarikuqkunata. Pitapas uyarikuy munaqta tarispaqa astawanmi yanapanayki. Yaqapaschá khaynata niwaq: “Sumaqta parlarukunchis. ¿Maypin tariykiman astawan parlarinapaq?” nispa. Wakin iñiqmasinchiskunaqa direccionninkuta telefononkuq numerontawan qospan ninku: “Kusata parlarunchis. Parlasqanchismanta astawan yachayta munanki chayqa chay dirección saqesqaypin tariwankiman”, nispa. Chay runaman mana visitayta atispaqa Sírvase visitar (S-43) nisqa formulariota hunt’aspa congregacionpi secretarioman qoy chay runaq tiyasqan ladopi predicaqkuna visitanankupaq.

12.a) ¿Imaraykun maypipas tarikuspa predicasqanchista anotananchis? b) ¿Allinchu maypipas tarikuspa predicay? (“Maypipas tarikuspa predicayqa allinpunin” nisqa recuadrota qhawariy.)

¹² Maypipas tarikuspa predicasqanchistaqa anotananchispunin, iskay kinsa minutollaña kaqtinpas. Sapankanchis phisqa minutollata sapa p’unchay predicasunman chayqa, ¡chunka qanchisniyoq millón más horan huk killapi llank’asqanchis kanman!

13. ¿Iman kallpachawasun maypiña tarikuspapas predicanapaq?

¹³ Jehová Diosta runamasinchistawan munakuspan maypi tarikuspapas predicanchis (Mat. 22:37-39). Ancha sumaq Dios kasqanmanta, qhepaman imachus ruway munasqanmantawan agradecekuspan ‘kamachikusqan qhapaq-atiyninmanta rimanchis’ (Sal. 145:7, 10-12). Chaymantapas runakunapi anchata interesakusqanchisraykun tiempo kashaqtinraq maypiña kaspapas allin willakuykunata willanchis (Rom. 10:13, 14). Ñawpaqmanta preparakuspaqa atisunmanmi maypiña tarikuspapas predicayta. Chayta ruwasun chayqa yaqapaschá pillatapas yanapasun Jehová Diosta reqsinanpaq.

[4 paginapi willakuy]

Ama manchakunaykipaq, ñawpaqta sutiykita willay hinaspa imallamantapas rimay

[5 paginapi willakuy]

Askha cristianokunan imaymanata ruwaspa allin willakuykunata willanku

[5 paginapi recuadro]

Predicayta qallarinapaq yanapaykuna

◼ Jehová Diospa yanapayninta mañakuy

◼ Susigowan puriqkunata, kusisqa hina kaqkunata maskhay

◼ Asirikuspa uyanta qhawariy, imachus payman qanmanpas interesasunkichis chaymanta willariy

◼ Makilla uyariy

[6 paginapi recuadro]

Maypipas tarikuspa predicayqa allinpunin

• Huk iñiqmasinchismi tallerpi carronta allichashanankukama huk discursopaq invitacionkunata rakiyta qallarirqan. Huk wata qhepamanmi hatun huñunakuypi kashaqtin mana reqsisqan cristiano sumaqta napaykurqan. ¡Chay cristianoqa karqan tallerpi predicasqan runan! Payqa invitacionta chaskispas discurso uyariq risqa chaypis estudiota mañakusqa. Kunanqa paypas esposanpas bautizasqañan kashanku.

• Huk hermananchismi predicación informal nisqapi Jehová Diosta reqsirqan. Paypa kinsa wawankunamanta rimasqan tumpallan predicayta qallarin. Ahinapin parlan vecinonkunawan, escuelapi reqsisqan runakunawan, tayta-mamakunapaq huñunakuykuna kasqanpiwan. Chayllaraq piwanpas reqsinakuspaqa willanmi sutinta hinaspa pisillapi willan imaynatan Biblia yanapan wawankunata uywananpaq, chaymantataq huk temamanta riman. Chaymi yanapan hukkunapi tupaqtinku Bibliamanta parlarinankupaq. Chayta ruwaspan 12 runakunata yanaparqan bautizakunankupaq.

• Wasikunata visitaspa aseguraq runatan huk iñiqmasinchis predicarqan. Payqa tapurisqan: “¿Manachu personaykipas munawaq qhali kayta, kusisqa tiyayta, wiñaypaq kawsaytapas?” nispa. Hinan chay runa nirqan: “Arí munaymanmi, ¿maypin asegurachikuyman chayta tarinaypaq?” nispa. Chaymi iñiqmasinchis Bibliapi Diospa promesankunata qhawarichirqan. Chay runataq huk qelqata chaskikuspa chay tardellapi leeyta tukurusqa. Hinan estudiayta qallarirqan huñunakuykunamanpas rirqan, qhepamantaq bautizakapurqan.

• Huk cristianan avionpi viajashaspa ladonpi tiyaq warmita predicarqan. Hinan iñiqmasinchis direccionninta telefononpa numerontawan qorqan, kallpacharqantaqmi mayqen Testigopas wasinta visitaqtin estudiota mañakunanpaq. Chay p’unchay qhepallamanmi iskay Testigokuna visitarqanku hinan chay warmiqa Biblia estudiayta qallarirqan. Kunanqa bautizakapunñan kinsa runakunatañan Bibliamantapas yachachishan.

• 100 watanpi hermanonchismi asilopi tiyan manataqmi ñawin rikunchu. Paymi sapa kutilla nin: “Reinotan necesitanchis”, nispa. Chayta uyarispan enfermerakuna chaypi kaqkunapas tapunku, paytaq willan imachus Reino kasqanta. Huk kutinmi chaypi llank’aq warmi tapurqan: “¿Imatan ruwanki Paraisopi?” nispa. Hinan iñiqmasinchisqa nirqan: “Chaypiqa ñawiymi kicharikunqa, hukmantan purisaq hinan kay silla de ruedas nisqata ruphaykachisaq”, nispa. Payqa chay warmitan valekun revistakunata leepunanpaq. Huk p’unchaymi ususin visitaq riqtin chay warmi nirqan: “¿Apakuymanchu kay revistakunata?”, nispa. Huk enfermerataq nirqan: “Kunanqa llapallaykun kay wasipi niyku: ‘Reinotan necesitanchis’”, nispa.

• Huk cristianan restaurantepi suyakushaspa uyarirqan kurak runakuna politicamanta rimasqankuta. Hukninmi nirqan mana mayqen gobiernopas runakunaq sasachakuyninta allichay atisqanta. Hinan payqa sonqonpi nirqan “Bibliamanta willarisaq” nispa. Hinan Diosmanta mañakuspa paykunaman asuykurqan. Sutinta willakuspan willarqan Diospa Gobiernollan runakunaq sasachakuyninta allichananta, sapankankumantaq huk folletota qorqan. Chayllamanmi restaurantepi umalliq asuykurqan. Payqa nisharqanmi “kunanqa niwanqachá kaymanta lloqsinaypaq” nispa. Ichaqa manan chaytachu nirqan, payqa uyarishasqan rimasqankuta chaymi huk folletota mañakurqan. Chaypi llank’aq warmin uyarillasqataq rimasqankuta, hinan weqe ñawintin asuykullarqantaq. Payqa ñawpaqpis Bibliata estudiasqa, chaymi kunanqa hukmanta estudiayta munarqan.