QALLARIYPI KAQ | ¿PIKUNAN KANKU JEHOVÁ DIOSPA TESTIGONKUNA?
¿Pikunan kayku?
Ñoqaykuqa yaqa llapa nacionkunapin kashayku pusaq millón hinataqmi kayku. Manan huk religionkunawan hukllachakuykuchu. Oficina centralqa Estados Unidos nacionpin tarikun. 230 más nacionkunapin Bibliamanta estudiota qoshayku, chhaynapin Jesuspa kay kamachisqanta hunt’ashayku: “[Diospa gobiernonmanta] allin willakuykunan kay pachantinpi willasqa kanqa, llapa suyukunaq yachananpaq”, nispa (Mateo 24:14).
May nacionpiña tiyayku chaypas, leykunatan respetayku kasukuyku ima. Ichaqa manan politicapi chhaqrukuykuchu, Jesuspunin nirqan: ‘Manañan kay pachaqchu kankichis’, nispa. Chaymi mana politicapi chhaqrukuykuchu nitaq guerrakunapi yanapakuykuchu (Juan 15:19; 17:16). Chaymi segunda guerra mundial nisqapi askha Testigokunata carcelpi wisq’arqanku, ñak’arichirqanku wakintataq wañuchirqanku. Alemania nacionpi Hitler kamachikusqanmanta rimaspan, ñawpaqpi obispo runa qelqarqan: “Paykunallan mana politicapi nitaq guerrapipas chhaqrukurqankuchu”, nispa.
“[Jehová Diospa testigonkunaqa] anchatan kallpachakunku ch’uyata kawsanankupaq. Paykunaqa allintachá ruwankuman llaqtapi kamachikuspa, ichaqa imataña munachiqtinchispas manan kamachikuq kayta munanqakuchu. [...] Kasukunkun autoridadkunaq kamachisqanta, ichaqa confiankun Diospa gobiernollan ima sasachakuytapas tukuchinanpi” (Periódico Nová Svoboda, República Checa)
Ichaqa manan runakunamanta t’aqakuykuchu. Qatikuqninkunapaq mañakuspan Jesús nirqan: “Manan kay pachamanta paykunata horqonaykipaqchu mañakuyki”, nispa (Juan 17:15). Chaymi llapa runakuna hina llank’ayku, rantikuq riyku, wawaykutapas educayku.