QALLARIYPI KAQ | ¿PIKUNAN KANKU JEHOVÁ DIOSPA TESTIGONKUNA?
¿Imakunapin creeyku?
Bibliaqa ‘Diospa yuyaychasqanmi chayraykun allinpuni yachachinapaq’ (2 Timoteo 3:16). Chaypi creesqaykuraykun Bibliata estudiayku Diosmanta yachanaykupaq allinta kawsanaykupaq ima.
Biblian nin: “Qanllapuni [Jehová] Diosqa kasqaykita yachachunku, qanllapuni teqsimuyuntinpi Ancha Hatun Dios kasqaykita reqsichunku”, nispa (Salmo 83:18).a Chaymi payllata adorayku. Testigonkuna kasqaykuraykun kallpachakuyku hukkunaman Diospa sutinta willanaykupaq (Isaías 43:10-12).
Creeykun Jesús “Diospa Churin”b kasqanpi, kay pachaman hamusqanpi, Mesías kasqanpipas (Juan 1:34, 41; 4:25, 26). Wañupusqan qhepamanmi Jesusqa, kawsarichisqa kaspa hanaq pachaman kutipurqan (1 Corintios 15:3, 4). Qhepamanmi Diospa gobiernonpi rey kananpaq churasqa karqan (Apocalipsis 11:15). Chay gobiernoqa ñan hanaq pachapi kamachikushanña, qhepamantaq kay hallp’ata paraisoman tukuchinqa (Daniel 2:44). Biblian nin: “Llamp’u sonqokunan ichaqa kay hallp’ata chaskinqaku, sumaq thak-nisqataq tiyakunqaku”, nispa (Salmo 37:11, 29).
“Diospas paykunawan rimashan hinatan [Testigokunaqa] Bibliata leenku. Ima sasachakuypiña kaspapas Diospa siminpin yanapayta maskhanku. [...] Paykunapaqqa Diospa siminqa kawsashanmi” (Sacerdote católico Benjamin Cherayath, qelqarqan Münsterländische Volkszeitung periodicopi, Alemania)
Bibliapi yachachikuykunaqa runakunaq allinninpaqmi (Isaías 48:17, 18). Chaymi kallpachakuyku nisqanman hina kawsanaykupaq. Biblian nin cuerponchistapas yuyayninchistapas ama qhellichanapaq, chaymi mana cigarrota fumaykuchu nitaq drogakuykuchu (2 Corintios 7:1). Hinaspapas willanmi machay, qhelli huchata ruway, suwakuy, hukkunapas hatun hucha kasqanta. Chaymi chaykunata mana ruwaykuchu (1 Corintios 6:9-11).
a Diospa Simin Qelqa Bibliapin “sut’inchasqa simikuna” nisqapi, willashan Diospa sutin Yavé otaq Jehová kasqanta.
b Biblian Jesusta sutichallantaq “Diospa sapan Churin” nispa. ¿Imarayku? Dios kikin payta kamasqanrayku, hinaspapas paytan ñawpaqta kamarqan (Juan 3:18; Colosenses 1:13-15).