¿Pin Diospa gobiernonpi kamachikunqa?

• Diospa ajllasqanmi kanan karan. “Ch’uya orqoy Sionpin reyniyta churaniña, [...] suyukunatan qosqayki herenciayki kananpaq, lliu teqsimuyuntintan qosqayki kaqniyki kananpaq” (Salmos 2:6, 8).

• Rey Davidpa rantinpin kamachikunan karan. “Diosmi qowanchis juj qhari wawata [...]. Davidpa kamachikuy tiyananpin tiyanqa, kamachikuy atiyninqa jinantinmanmi mast’arikunqa” (Isaías 9:6, 7).

• Belén llaqtapin nacenan karan. “Qanqa, Belén [...], qanmantan Israel suyuta kamachiq paqarimunqa [...]. Teqsimuyuntin llaqtakunan payta anchatapuni jatunchanqa” (Miqueas 5:2, 4).

• Paytaqa cheqnikuspan wañuchinanku karan. “Runakunaq pisichasqanmi qhawarparisqanmi karan [...], mana kasukusqanchiskunamanta k’irisqa karan, juchanchiskunamanta sinchi muchuchisqa karan” (Isaías 53:3, 5).

• Kausarimpuspataq jatunchasqa kanan karan. “Manan noqataqa Wañuy-pachapi saqerpariwankichu, manan qan sonqo kamachiykitaqa ismurichiwankichu [...], wiñaypaq kusikuymi paña ladoykipiqa kan” (Salmos 16:10, 11).

Jesucriston aswan allin kamachikuqqa

Bibliapi willakusqanqa Jesucristopin junt’akuran. Chaymi juj angelpas maman Mariaman willaran: “Diosmi paytaqa ñaupa taytan Davidpa trononpi reyta churanqa. [...] Kamachikuynintaq mana tukukuq kanqa”, nispa (Lucas 1:31-33).

Jesusqa manan jayk’aqpas kay pachapi kashaspaqa kamachikuranchu. Aswanpas janaq pachapi kaspañan Diospa gobiernonpi runakunata kamachimunqa. ¿Imaraykun pimantapas aswan allin kamachikuq kanqa? Chaypaq yachasun kay pachapi kashaspa imakuna ruwasqanmanta.

• Jesusqa munakuranmi runakunata. Yanaparanmi kuraqkunata wayna-sipaskunatapas. Payqa manan maymanta kasqankutachu nitaq allin educacionniyoq kasqankutachu qhawaran (Mateo 9:36; Marcos 10:16). Lepra onqoyniyoq runan niran: “Munanki chayqa, atinkin qhaliyachiwayta”, nispa; Jesustaq khuyapayaspa qhaliachiran (Marcos 1:40-42).

• Jesusqa Diosta imayna kasukuytan yachachiran. Paymi niran: “Manan qankunaqa Diostawan qhapaq kaytawanqa serviyta atiwaqchischu”, nispa. Nillarantaqmi: “Imatachus runakuna ruwanasuykichista munankichis, chhaynallatataq qankunapas paykunata ruwaychis”, nispa. Yachachiwallaranchistaqmi Diosqa manan ruwasqallanchistachu qhawamun aswanpas piensasqanchista, sonqonchispi imayna tarikusqanchistawan. Chayraykun sonqonchispi mana mana allinkunataqa piensananchischu (Mateo 5:28; 6:24; 7:12). Sonqomantapuni kusisqa kanapaqqa Diospa munasqantan ruwananchis (Lucas 11:28).

• Jesusmi yachachiran munakuyta. Imachus ruwasqankunaqa yachachisqanpas runaq sonqonmanmi chayaran. Biblian nin: “Runakunaqa anchatapuni admirakuranku imayna yachachisqanmanta. Payqa Diospa nisqanman jinapunin yachachiq”, nispa (Mateo 7:28, 29). Chaymi niran: “Munakushallaychis enemigoykichiskunataqa”, nispa. Payqa wañuchiqninkunapaqpas mañapuranmi: “Yayáy, perdonay kay runakunata, paykunaqa manan yachankuchu imatachus ruwashanku chayta”, nispa (Mateo 5:44; Lucas 23:34).

Jesusqa aswan allin kamachikuqmi. Payqa allintan imatapas yachan, munakuwasqanchisraykun yanapayta munawanchis. ¿Jayk’aqmi kamachiyta qallarinqa?