Umalli T’aqaq apachimusqan carta
Munasqa wawqe-panaykuna:
¡Ima allinmá Jehová Diospa testigonkuna kayqa! Payqa wiñaypaq tukuy atiyniyoqmi, manan pay hinaqa pipas kanchu. Pay kikinmi churawarqanchis chay sutita hukkunamanta sapaqchawananchispaq, chaymi 1931 watamantapacha chhaynata reqsichikunchis (Isa. 43:10). Chayraykun kusikunanchis sutinta apasqanchismanta.
Ichaqa Saqraqa imaynamantapas chinkachiytan munashan Diospa sutinta. Kay pachapi kamachisqan runakunapas cheqnikunkun sutinta, chaymi pantasqa religionkunapas askha t’ikrasqa Bibliakunamanta sutinta horqopunku. Jesusmi ichaqa chay sutitaqa ancha allinpaq qhawarirqan, chaymi qatikuqninkunata mañakuyta yachachishaspapas nirqan: ‘Qankunaqa kay hinata mañakuychis: Yayayku hanaq pachapi kaq, sutiyki yupaychasqa kachun’, nispa (Mat. 6:9). Chaymantapas sonqonmanta Diosmanta mañakuspan nirqan: “Kay pachamanta qowasqayki runakunamanqa ñan willaniña sutiykita”, nispa (Juan 17:6, NM). Ñoqanchispas Jesús hina tukuy kallpanchiswan kay pachantinpi willashallasun Diospa sutinta.
2009 watapaq texton nirqan: ‘Lliw runaman allin willakuykunata willasun’, nispa. Chay texton kallpachawarqanchis llapan runakunaman predicananchispaq (Hech. 20:24, NM). Jehová Diosqa allintan yanapawarqanchis qayna wata llank’asqanchispi, chaymi hinantin pachapi predicaspa Diosta hatuncharqanchis. Kunanqa 7.313.173 predicaqkunañan kashanchis, huk-nisqallan allin sonqoyoq runakunaman willarqanchis thak kawsay kananmanta. Jesuspa wañupusqan p’unchayta yuyarikusqanmanpas 18.168.323 runakunan huñunakurqanku, chaywanmi yachanchis manaraq kay millay kawsay tukupushaqtinqa askha runakunaraq Diospa sutinta hatunchanankuta.
Jehová Diospa maykamachus nisqankama tukuy sonqowan predicashallasun llapan runakunaman (Mat. 24:14; Mar. 13:10). Chaytaqa ruwasunman wasin-wasinta rispa, callekunapi, cartakunata qelqaspa, telefonopi waqyaspa, maypiña kaspapas, arí, kallpachakushallasun Diospa sutinta munaynintapas lliwman reqsichinanchispaq.
Pisi tiempollamantañan Jehová Diosqa sutinta ch’uyanchanqa (Eze. 36:23). Chaypin sutinta pisichaqkunataqa ch’usaqman tukuchinqa. Ancha kusikuychá chay p’unchayqa kanqa Diospa serviqninkunapaq, paykunaqa Diospa sutintan willanku, payllatataq Kamachiqninkuta hina qhawarinku.
Jehová Diosqa munakuywanmi llaqtanta cuidan, chaytaqa sut’itan rikuchirqan “Makilla kashaychis” nisqa hatun huñunakuypi, chayqa 2009 watapin aparikurqan. Chay huñunakuyqa mana qonqanapaq hinan karqan, yanapawarqanchistaqmi Jehová Diospa phiñakuynin p’unchay qayllallapiña kasqanta reparaspa makilla kashananchispaq (Mar. 13:37; 1 Tes. 5:1, 2, 4).
Yachasqanchis hina, Jehová Diosqa anchatan munakuwanchis, chaymi tukuy atisqanta ruwan kusisqa kananchispaq, ovejata hinataq ‘llullu q’achu-q’achupi samachiwanchis, suchuq unu qayllamanpas pusakuwanchis’ (Sal. 23:1, 2; 100:2, 5).
Arí, munasqa wawqe-panaykuna, Jehová Diosqa yanapawashallasunpunin sichus Dios serviyninchispi yanapakushallasun chayqa.
Kaytan apachimushaykiku
Umalli T’aqa
iñiqmasiykichiskuna