Predicaymi aswan allinqa ima ruwaymantapas
1. ¿Imaynatan qhawarinanchis predicayninchista?
1 Kay pachapiqa predicayninchismi ima ruwaymantapas aswan importante, chayraykun huñunakuykunapipas qelqanchiskunapipas sapa kutilla kallpachawanchis tukuy tiemponchiswan kallpanchiswan predicashanallapaq, kaqninchiskunatapas qonapaq. Chay llank’ayninchis imapaqchus allin kasqanta yuyaymanasun chayqa, mana pisipaspan predicashallasun, chay ruwayqa manañan hayk’aqpas aparikunqañachu (Hech. 20:24).
2. ¿Imaynapin predicaspanchis Diospa sutinta hatunchanchis?
2 Predicaspaqa Diostan hatunchanchis. Predicaspaqa sut’itan rikuchinchis Diospa Gobiernollan kay pacha gobiernokunata tukuchinanta, runaq llakikuyninta tukuchinanmantawan (Mat. 6:9, 10). Rikuchillanchistaqmi Jehová Dioslla onqoymanta wañuymantawan kacharichiyta atisqanta (Isa. 25:8; 33:24). Diospa sutintataq apanchis chayqa allintan kawsananchis, tukuy sonqowantaqmi predicananchis, chhaynapin hukkunapas Diosta serviyta qallarinkuman (1 Ped. 2:12). Ancha kusikunapaqmi Jehová Diospa sutinta pachantinpi runakunaman reqsichiyqa (Sal. 83:18, NM).
3. ¿Ima allinkunan kanqa uyariqninchiskunapaq?
3 Mana wañunankupaqmi predicanchis. Jehová Diosqa ‘manan pitapas chinkananta munanchu, [aswanmi] huchata saqespa payman llapa kutirikunankuta munan’ (2 Ped. 3:9). Chayraykun lliwman yachachinanchispuni allin kaqta mana allin kaqta reparanankupaq (Jon. 4:11; Rom. 10:13-15). Allin willakuykunata kasukuspa millay ruwayninkunata saqepuqqa, aswan allintan kawsan, wiñay kawsaytataq suyakun (Miq. 4:1-4). Mana pisipaspa predicashallasun chayqa, ñoqanchis kikinchistan salvakusun hinallataq uyariqninchiskunatapas (1 Tim. 4:16). Ancha allinpunimá chay llank’aypi kayqa.
4. ¿Imaraykun predicashanallanchis yachachishanallanchis ima?
4 Pisi tiempomantan tukukapunqa kay pachapi millay ruwaykuna, Diosta serviqkunan ichaqa wiñaypaq kawsanqaku. Chayraykun tukuy kallpanchiswan predicananchis yachachinanchis ima, chay llank’ayllan ima ruwaymantapas aswan importanteqa (Mat. 6:33).