Umalli T’aqaq cartan
Munasqa wawqe-panaykuna:
¡Ancha kusikunapaqmi kay tiempopi llank’asqanchisqa! Kusikuykun qankunawan kuska “huk-nisqalla” Diosta servispa. Mana hayk’aq willakusqanta hinan Jehová Diosmanta willaskushan (Sof. 3:9; Juan 14:12).
Kusisqaña Diosta servinchis chaypas, imaymana sasachakuykunapin tarikushanchis. Qayna watan wakinniykichis sinchi sasachakuypi tarikurqankichis terremotokuna, lloqllakuna, hatun wayrakuna kasqanwan (Mat. 24:7). Hukkunataq sapa p’unchay llakisqa tarikunkichis onqosqa kaspa otaq yuyaqña kaspa. Arí, llapallanchismi ‘nanaykunapi’ tarikunchis (Mat. 24:8). Chaymantapas Armenia, Corea del Sur, Eritrea nacionkunapin askha iñiqmasikuna iñiyninkurayku carcelpi wisk’asqa kashanku (Mat. 24:9).
¿Iman yanapawarqanchis chay sasachakuykunapi tarikushaspapas mana pisipananchispaq? 2010 watapaq textoq nisqanmi yanapawarqanchis, chaypin nin: ‘Munakuqqa tukuy imapin pacienciakun. Munakuyqa wiñaypaqmi’, nispa (1 Cor. 13:7, 8). Arí, hukkuna hukkunawan munanakusqanchis hinallataq Jehová Diosta munakusqanchismi kallpachawanchis aguantananchispaq.
“Cristianon kayku” niq religionkunapi runakunan anchata admirakunku predicasqanchista rikuspa hinallataq sapa kuti visitasqanchista rikuspa. Wakinqa manaña iñisqanchista yachachisqanchista chaskikunkuchu chaypas ninkun: “Qankunan ñoqaykuq llank’anaykuta aparishankichis”, nispa. ¿Iman Jehová Diospa testigonkunata yanapan sapa p’unchay predicashanallankupaq? Munakuyllataqmi. Taytanchis Jehová hinan ñoqanchispas mana munanchischu pipas chinkachisqa kananta (2 Ped. 3:9). Qayna watan pachantinpi karqanchis 7.508.050 predicaqkuna, chaymi rikuchin lliw runa huchankumanta kutirikunankuta munasqanchista. Huk religionkunapiqa manan chhaynataqa predicankuchu munakusqankurayku runakunata yanapanankupaq.
Anchatan kallpachawanchis profeta Isaiaspa qelqasqan profecía, paymi nirqan: “Hamuq p’unchaykunapin Señor Diospa wasin orqo aswan hatunkaray kanqa, llapa orqokunamantapas aswan alton kanqa. Llapa suyu runakunan chayman qhochurikamunqaku”, nispa (Isa. 2:2-4). Qayna watan 294.368 bautizakurqanku paykunapas Jehová Diospa wasinmanmi hamushanku, chaymi ancha kusikuywan chaskirqanchis. Munakuyninchiswan yanapashallasun enemigonchis Saqraq trampankunata atipanankupaq (1 Ped. 5:8, 9).
Qayna watan 30 marzo p’unchaypi 18.706.895 runakuna Jesuspa Wañusqanta Yuyarina huñunakuyman hamurqanku. Chhaytukuy hamusqankun rikuchin millonninpi runakuna ñoqanchiswan kuska Jehová Diosta yupaychay munasqankuta. Ancha kusisqan sientekunchis Dios manaraq kay millay pachata tukuchisqanmanta. Chay p’unchay chayamunankaman munakuy yanapawanchis aguantananchispaq (2 Tes. 3:5).
Qayna watan kinsa p’unchay huñunakuyninchispa teman karqan: “Jehová Diospa qayllallanpi kasun”, nisqa. Chaymi anchata kallpachawarqanchis. Salmistaq nisqanqa cheqaqpunin karqan, paymi nirqan: “¡Kusisamiyoqmi Señor Diosniyoq llaqtaqa!” nispa (Sal. 144:15). Jehová Dios ñoqanchiswan kaqtinqa manan imapas manchachiwasunchu (Sal. 23:4). Pisi tiempollamantan Jehová Dios Churinwan ‘Saqraq ruwasqankunata thunichinqapuni’ (1 Juan 3:8). ¡Maytan munanchis chay p’unchay chayamunanta! Chaykamaqa askhan ruwananchis kashan (1 Cor. 15:58).
Ñoqaykuqa ‘sapa kutillan’ mañakuyniykupi qankunata yuyariykichis (Rom. 1:9). Valekuykikun ‘Diospa munakuyninpi allinta takyanaykichispaq’ Señorninchis Jesucristoq khuyapayakuyninpi wiñay kawsay qonasuykichista suyakuspa (Jud. 21).
¡Anchatan munakuykiku llapaykichista!
Iñiqmasiykichiskuna,
Jehová Diospa Testigonkunamanta Umalliq T’aqa