¿Imatata chimbapurai ushapangui?

CAI mundopica 2 mil millón yali gentecunami Jesusta catijcunami canchi nin. ¿Quiquinbashchu Jesusta catij religionmanda capangui? Cunanbica ashtaca ashtaca religiongunami Jesusta catinchi nishpapash paicunapura shuj shuj yuyaicunata yachachin, shuj shuj yuyaicunata charin. Quiquinga Jesusta catij gentecunamanda shuj yuyaicunatachari charipangui. Shinapash ¿imamanda ñucanchi crishcacuna ali cajtaca seguro cana canchi? Bibliapi yachachishca shina Jesusta catingapaj munashpaca, ñucanchi crishcacuna ali cashcata o nali cashcata yachanaca minishtirishcapachami can.

Jesusta punda catijcunataca Cristota catijcuna nishpami rijsin carca (Hechos 11:26). Chai punllacunapica Jesusta catij religionga shujllami carca. Chaimandami paicunataca shutilla rijsin carca. Jesusta catijcunaca shujllashna tucuilla tandanajushpami Jesuspa yachachishcacunatalla, mandashcacunatalla catishpa pactachin carca. ¿Quiquinba religionbica Jesús imata yachachishcata, paipa punda catijcuna imata rurashcatachu yachachin? Jesusta ali catijushcataca ¿imashinata seguro caita ushapangui? Seguro cangapaca quiquinba religión imata yachachishcatami Bibliahuan chimbapurashpa ricuna capangui.

Jesusca Taita Dios escribichishca Shimipachami can yashpami Taita Diospa Shimitaca ninanda respetan carca. Gentecunapa costumbrecunata pundapi churanamandalla Diospa Shimita na valichishpa ladoman saquijcunataca nalicachishpami Jesusca ricun carca (Marcos 7:9-13). Chaimandami Jesusta ali catijcunapash Bibliapi imata yachachishcatalla crin. Shinaca Jesusta ali sirvingapaj munajcunaca cashna nishpami pensarina can: “¿Ñuca religionbica Bibliapi yachachishcatachu yachachin?” nishpa. Chaita yachangapaca quiquinba religionbi yachachishcacunatami Bibliahuan chimbapurashpa ricuna cangui.

Jesusca nircami, na llullaj yuyaicunata catishpami Taita Diostaca adorana canchi nishpa. Na llulla yuyaicunaca Bibliapimi can (Juan 4:24; 17:17). Apóstol Pablopash nircami, Taita Diosmanda ‘na llullashpa villajuj Shimitapash yachajushpami’ salvaritaca ushanguichi nishpa (1 Timoteo 2:4). Shinaca salvaringapaj munashpaca, Bibliapi na llullashpa villajuj Shimitami yachajuna canchi.

ÑUCANCHI CRISHCACUNATACA ¿IMASHINATA BIBLIAHUAN CHIMBAPURASHUN?

Chaipaca recuadropi tiajuj 6 yuyaicunata liishpa, Biblia ima nijta ricupai. Chaipi tiajuj textocunata liishca jipaca respuestacunapi pensaripai. Chai jipaca tapuripai: “Ñuca religionbica ¿cai textocunapi nijujtachu yachachijun?” nishpa.

Chashna chimbapurashpa ricunami, quiquinbaca alipacha canga. Shinaca ¿nachu quiquinba religionbi shuj yachachishcacunatapash Bibliahuan chimbapurashpa ricungapaj munapanguiman? Testigo de Jehovacunaca cushijushpami Taita Diospa Shimi ima yachachijta ricuchun ayudanga. Munashpaca Testigocunatallata o Internetpi www.pr2711.com direccionman yaicushpa Bibliamanda gratis yachajungapaj munanimi ninallami capangui.

1 TAPUI: Taita Diosca ¿pita can?

RESPUESTA: Jehová Diosmi Taita Dios can. Paimi Jesuspa Taita can. Paimi tucuita ruraj, tucui ushaita charij Dios can. Paica siempremi tiashca.

¿IMATATA BIBLIACA NIN?

• “Cangunamanda na samashpa Diosta mañajushpami, ñucanchi Apunchi Jesucristopaj Taita Diosta pashi ninajunchi” (Colosenses 1:3).

• “Jatun Dioslla, canmi tucui imatapash rurashcangui. Can munashcamanda rurashcami, tucui ima cashpapash tian. Chaimandami canga, ninan punchapamba tiajunata, ninanda alicachi tucunata, ninan ushaihuan tiajunata chasquinapacha cangui” (Apocalipsis [Revelación] 4:11).

• Romanos 10:13; 1 Timoteo 1:17tapash ricupangui.

2 TAPUI: Jesusca ¿pita can?

RESPUESTA: Jesusca Diospa punda Churimi can. Paitaca Taita Diosmi rurarca. Ashtahuangarin, Taita Diospa autoridadta respetashpami paita cazun.

¿IMATATA BIBLIACA NIN?

• “Ñuca Taitaca, ñucata yali ushaitami charin” (Juan 14:28).

• “Cristoca, pipaj ñavipipash na ricurij Taita Dios imashna cajtami ricuchijun. Paica, tucui imatapash nara rurajpillatami, pundallata ña tiashca” (Colosenses 1:15).

• Mateo 26:39; 1 Corintios 15:28tapash ricupangui.

3 TAPUI: Espíritu santoca ¿imata can?

RESPUESTA: Espíritu santoca na shuj personachu can. Taita Diospa fuerzami can. Chai fuerzahuanmi Taita Diosca paipa munaita pactachin. Gentecunapash Taita Diospa espíritu santota chasquishpami fuerzata chasqui ushan.

¿IMATATA BIBLIACA NIN?

• ‘Elisabet huarmiguta María alillachu tiajupangui nijhuanmi, Elisabetpa vijsa ucupi huahuaguca cuyurirca. Elisabetca Diospa jucha illaj espíritu jundashcami carca’ (Lucas 1:41).

• ‘Diospaj jucha illaj espíritu cangunapaman shamujpimi ushaita japinguichi’ (Hechos 1:8).

• Génesis 1:2; Hechos 2:1-4; 10:38tapash ricupangui.

4 TAPUI: Diospa Reinoca ¿imata can?

RESPUESTA: Diospa Reinoca jahua cielomanda mandana gobiernomi can. Jesusmi Diospa Reinopica Rey can. Ñallami Diospa Reinoca cai Alpapipash Taita Diospa munaita pactachinga.

¿IMATATA BIBLIACA NIN?

• “Suctapaj cati ángel trompetata huacachijpica, jahua pachapi cashna nishpa, ninanda caparinajujtami uyarcani: ‘Ñucanchipaj Jatun Diospash, pai cachamushca Quishpichij Cristopash, cai pachapi tiaj tucui llactacunata mandajuna punllami pactashca. Paimi, causaita causaicaman mandajunga’ nishpa” (Apocalipsis 11:15).

• Daniel 2:44; Mateo 6:9, 10tapash ricupangui.

5 TAPUI: ¿Tucuilla ali gentecunachu jahua cieloman rin?

RESPUESTA: Na. Taita Diosca “ashalla llamagucuna” nishcacunatami jahua cieloman richun agllashca. Paicunaca Jehovata ali sirvijcunami can. Paicunami Jesucristohuan igual tiarishpa cai Alpapi gentecunataca mandanga.

¿IMATATA BIBLIACA NIN?

• “Ñuca llamagucuna, cangunaca ashalla cashpapash, na manllanachu canguichi. Cangunapaj Taitaca, mandanataca cushijushpami cangunaman carashapacha nirca” (Lucas 12:32).

• “Paicunaca Taita Diospajta, Cristopajta ruraj curacunami canga. Paicunami, Cristohuan mandanajunga” (Apocalipsis 20:6).

• Apocalipsis 14:1, 3, NM versiculotapash ricupangui.

6 TAPUI: Taita Diosca ¿imatata cai Alpahuanbash, gentecunahuanbash ruranga?

RESPUESTA: Diospa Reino mandajpica, tucuilla Alpami shuj juyailla Paraíso tucunga. Chaipimi Taita Diosta ali sirvij gentecunaca ungüicunapash illaj, tranquilo para siempre causanga.

¿IMATATA BIBLIACA NIN?

• “Na ñapash fiñarijllacunaca, ninandami cushijun. Paicunami, cai pachata paicunapaj cachun japinga” (Mateo 5:5).

• “Taita Diosmi, paicunapaj ñavimandaca, tucuilla viquita fichanga. Huañui- pash, huacaipash, llaquipash, nanaipash, na ashtahuan tiangachu. Punda ima tiashcapash illangami” (Apocalipsis 21:3, 4).

• Salmo 37:29, NM; 2 Pedro 3:13tapash ricupangui.