Quiquinba estudiantetaca Jehovata sirvichun ayudapai

1, 2. a) Huaquin estudiantecunaca ¿imamandata testigo de Jehová tucunataca manllan? b) Cai temapica ¿imatata yachajugripanchi?

TESTIGO de Jehová tucungapaj munashpaca ¿imacunatallata manllaparcangui? Trabajomanda compañerocuna, amigocuna o familiacuna quiquinhuan culiranatami talvez manllapariangui. O Jehová Diostaca na tucuipi cazuita ushashachu yashpami talvez pensapariangui. Quiquin chashna pasashcamandami quiquinba estudiante imamanda manllajujtaca de seguro intindipangui.

² Manllaimanda Jehová Diosta sirvina na fácil cana cashcataca Jesusca alimi yacharca (Mat. 13:​20-22). Jesusta catinata o na catinata gentecuna dudanajujpipash Jesusca paicunataca ayudashpami catirca. Jesuspa ejemplota catishpaca ñucanchi estudiantecunataca 1) Jehová Diosta sirvingapaj ima jarcaicunata charishcata cuenta japichun, 2) Jehová Diosta ashtahuan juyachun, 3) Jehová Diosta en primer lugar churachun y 4) jarcaicuna ricurijpi imata ruranata yachachunmi ayudaita ushapashun. Ñucanchi estudiantecuna testigo de Jehovacuna tucuchunga ¿imashinata Jesuspa ejemplota catishpa Cushilla causapashunchi librota utilizai ushapanchi?

IMA JARCAICUNATA CHARISHCATA CUENTA JAPICHUN AYUDAPAI

3. Nicodemoca ¿imamandashi Jesuspa discípulo tucuitaca na usharca?

³ Nicodemoca judiocunapa shuj importante gobernantemi carca. Shinapash ¿imamandashi Jesuspa discípulo tucuitaca na usharca? Nicodemoca, Jesús predicai callarishcamanda 6 quillacuna jipallami Jesús, Mesías cashcataca cuenta japirca (Juan 3:​1, 2). Jesús, Mesías cashcata cuenta japishpapash “judiocunata manllaimandami” Jesushuanga pacalla parlangapaj rirca (Juan 7:13; 12:42). Nicodemoca ñana ashtaca autoridadta charishachu yashpa, charishca cosascunatapash quichuhuangami yashpami, Jesuspa discípulo tucunataca manllashcanga.a

4. Jesusca ¿imashinata Nicodemotaca ayudarca?

⁴ Nicodemoca Moisesman Cushca Leytaca alimi rijsirca. Shinapash Jehová Dios pai imata rurachun munashcata pipash intindichichunmi minishtirca. Jesusca ¿imashinata Nicodemotaca ayudarca? Jesusca Nicodemohuan tiempota yalingapaj, tuta cajpipash paihuan parlangapaj dispuesto cashpami ayudarca. Shinallata Nicodemomanga paipa discípulo tucungapaca pecadocunamanda arripintirinata, yacupi bautizarinata y paipi feta charina cashcatami intindichishpa explicarca (Juan 3:​5, 14-21).

5. Quiquinba estudiante imamanda Jehová Diosta na sirvi ushajushcata cuenta japichunga ¿imashinata ayudai ushapangui?

⁵ Shuj estudianteca Bibliamandaca talvez alimi yachanga. Pero Jehová Diosta imamanda na sirvi ushajushcata pipash intindichichunmi minishtijunga. Talvez trabajopimi yapa tiempota yalijunga o familiacunami na Testigo tucuchun munanajunga. Chai situacionbica ¿imashinata Jesuspa ejemplota catishpa ayudaita ushapangui? Chaipaca quiquinba estudiantehuan tiempota yalingapami dispuesto cana capangui. Por ejemplo, huasiman o shuj micunaguman invitashpami pai ima problemacunata charishcata tranquilo parlaita ushapangui. Quiquinba estudiante ima problemacunata charijta uyashpami, ima cambiocunata rurai ushashcata parlai ushapangui. Shinallata “ñucamandaca na cambiocunataca ruranachu cangui, sino Jehovata cushichingapami cambiocunataca rurana cangui” nishpami intindichina capangui.

6. Quiquinba estudiante imata yachajujushcata paipa causaipi pactachichunga ¿imashinata ayudai ushapangui? (1 Corintios 16:13).

⁶ Jehová Dios ayudanata quiquinba estudiante seguro cashpaca, imata yachajujushcata paipa causaipi pactachingapaca dispuestomi canga (1 Corintios 16:13​ta liipangui). Pero ¿imashinata paitaca ayudaita ushapangui? Escuelapi shuj ali profesor cuendami, quiquinba estudiante imata rurai ushashcapi seguro sintirichun pacienciahuan ayudaita ushapangui. Bibliamanda ali yachachijcunaca Jehová Dios imata rurachun mandashcatallaca na yachachinllu. Sino Jehová Diospa ayudahuan cambiocunata rurai ushashcata seguro sintirichunmi ayudan. Quiquinba estudianteta ashtahuan ayudangapaca ¿imatata rurai ushapangui?

JEHOVÁ DIOSTA ASHTAHUAN JUYACHUN AYUDAPAI

7. Gentecuna Jehová Diosta ashtahuan juyachunga ¿imashinata Jesusca ayudarca?

⁷ Jesuspa discipulocunaca Jehová Diosta juyaimandami paicuna imata yachajushcataca ashtahuan facillla pactachita ushana carca. Chaita ali yachaimandami Jesusca, Jehová Diosta ashtahuan juyachun paipa discipulocunamanga yachachirca. Por ejemplo, Jehová Diostaca shuj ali taita paipa churicunaman ali cosascunata carajhuanmi compararca (Mat. 7:​9-11). Jesusta uyaj huaquin gentecunaca paicunata juyaj taitataca talvez na charishcangachu. Por ejemplo pensaripai, shuj nali churi nalicunata rurashpa tigrajpi paipa taita cushijushpa chasquijta Jesús parlajpica chai gentecunaca shuj juyaj taita imashina cashcatami pensarishcanga. Jesús shina yachachijpimi gentecunaca Jehová Dios paicunata ninanda juyashcata intindirca (Luc. 15:​20-24).

8. Quiquinba estudiante Jehová Diosta ashtahuan juyachunga ¿imatata rurai ushapangui?

⁸ Quiquinbashmi quiquinba estudiantetaca Jehová Diosta ashtahuan juyachun ayudaita ushapangui. Chaipaca cada yachachishcapimi Jehová Dios imashina cashcata intindichina capangui. Yachachijushpaca Jehová Dios paita ninanda juyashcatami intindichina capangui. Shinallata, Jesús huañushcamanda yachachijushpaca, Jehová Dios paita juyaimanda paipa Churipa causaita cushcatami intindichina capangui (Rom. 5:8; 1 Juan 4:10). Jehová Dios paita juyajta intindishpaca, quiquinba estudianteca Jehová Diostaca talvez ashtahuanmi juyanga (Gál. 2:20).

9. Michaelca ¿imamandata cambiocunata rurai usharca?

⁹ Michaelpa ejemplota ricupashun. Paica Indonesia llactamandami can. Huahuamanda Bibliata yachajushpapash na bautizarircachu. 18 huatacunata charishpaca camiongunata manejashpa trabajangapami caru llactaman rirca. Jipamanga Indonesia llactaman tigrashpami cazararca y shuj ushigutapash charirca. Shinapash cutinmi caru llactapi trabajangapaj rirca. Tiempohuanga paipa huarmigu y paipa ushiguca Bibliamanda yachajui callarishpami cambiai callarirca. Michaelca paipa mamita huañujpimi, paipa taitata cuidangapaj Indonesia llactaman tigrarca. Chaipimi Bibliamandapash estudiai callarirca. Bibliata yachajujushpaca Cushilla causapashunchi libropa lección 27​pi “Ashtahuan yachajupashunchi” nishca partemanmi chayarca. Chaipica Jehová Dios paipa Churi huañujta ricushpa ninanda sufrishcata pensarishpami huacai callarirca. Michaelca Jehová Dios y Jesús paita ninanda juyashcata cuenta japishpami paipa causaipi cambiocunata rurashpa bautizarirca.

JEHOVÁ DIOSTA EN PRIMER LUGAR CHURACHUN AYUDAPAI

10. Jesusca ¿imashinata paipa discipulocunataca cambiocunata rurashpa Jehová Diosta ashtahuan sirvichun ayudarca? (Lucas 5:​5-11; dibujotapash ricupangui).

¹⁰ Jesuspa primer discipulocunaca Jesús, Mesías cashcataca ñapashmi cuenta japirca. Shinapash Jehová Diosta sirvingapaca predicacionda en primer lugar churana cashcatami todavía intindinara carca. Pedro y Andresca ñami Jesuspa discipulocuna carca. Shinapash Jesusca paicunataca, tucuita saquishpa ñucata tiempo completo catihuaichi nishpami nirca (Mat. 4:​18, 19). Pedro y Andresca Santiago y Juanhuanmi pescadota japina ali negociota charirca (Mar. 1:​16-20). Pedro y Andresca “pescadocunata japina” negociota saquishpami Jesustaca tiempo completo cati callarirca. Shinapash paicunapa familiacuna tucui minishtirishca cosasgucunata charichun asegurarishpami Jesustaca tiempo completo catishcanga. ¿Imamandata paicunapa negociota saquingapaj dispuesto carca? Jesusca shuj milagrota rurashpami, ima pasajpipash Jehová Dios paicunaman minishtirishca cosasgucunata caranataca intindichirca. Chaimi Jesuspa discipulocunaca, Jehová Diosta en primer lugar churajpica, Jehová Diosllata tucui minishtirishca cosasgucunata caranata seguro carca (Lucas 5:​5-11​ta liipangui).

11. Quiquinba estudiante ashtahuan shinlli feta charichunga ¿imatata rurai ushapangui?

¹¹ Ñucanchicunaca Jesushna milagrocunata ruraitaca na ushapanchichu. Shinapash Jehová Diosta en primer lugar churajpi pai bendiciajtami estudiantemanga parlaita ushapanchi. Por ejemplo, reuniongunaman rijpi Jehová Dios quiquinda imashina ayudashcatami parlaita ushapangui. Talvez quiquinba jefehuanga, reuniongunaman rinami cani, yapalla horascunata trabajaitaca na ushapanichu nishpami parlapariangui. Shina parlashcamanda Jehová Dios imashina ayudashcata y ayudashcata ricushpa quiquinba fe imashina shinlliyashcatapashmi estudiantemanga parlaita ushapangui.

12. a) Bibliamanda yachachingapaj rishpaca ¿imamandata shuj shuj huauquipanicunata pushashpa rita ushapangui? b) Quiquinba estudiante Jehová Diosta en primer lugar churachunga ¿imashinata ashtahuan ayudaita ushapangui? Shuj ejemplomanda parlapai.

¹² Quiquinba estudianteca, shuj huauquipanicunapash Jehová Diosta en primer lugar churaimanda ima bendiciongunata charishcata uyashpapashmi beneficiarita ushanga. Chaimi Bibliamanda yachachingapaj rishpaca shuj shuj huauquipanicunata pushashpa rita ushapangui. Paicunataca imashina testigo de Jehová tucushcata y Jehová Diosta en primer lugar churangapaj imata rurashcata estudianteman parlapangui nishpami nita ushapangui. Shinallata quiquinba estudiantehuan videocunata ricungapami tiempota llujchina capangui. Por ejemplo Cushilla causapashunchi libropa “Ashtahuan yachajupashunchi” partepi y “Caitapash ricupai” partepi videocunatami ricuita ushapangui. Chai libropa lección 37​pica, Jehová Diosca ñucanchi minishtishcacunata cungami nishca videomi tiajun. Chai videota ricuchishca jipaca, Jehová Diosta en primer lugar churajpi, Jehová Dios imashina bendiciajtami estudiantemanga yachachina capangui.

JARCAICUNA RICURIJPI IMATA RURANATA YACHACHUN AYUDAPAI

13. Jesusca ¿imatata paipa discipulocunamanga advirtirca?

¹³ Jesusca paipa discipulocunamanga, shuj gentecunapash y familiacunapash cangunataca na ricunayachingachu nircami (Mat. 5:11; 10:​22, 36). Huañungapaj ashalla tiempo faltajpipashmi Jesusca, cangunaca huañuna peligropipashmi canguichi nishpa advirtirca (Mat. 24:9; Juan 15:20; 16:2). Shinallata, paicunapa crishcacunamanda pipash rimajpica na pliturijunachu canguichi, imata nishpa o imata rurashpapash cuidadota charinami canguichi nircami.

14. Jarcaicuna ricurijpi ñucanchi estudiantecuna imata ruranata yachachunga ¿imashinata ayudaita ushapanchi? (2 Timoteo 3:12).

¹⁴ Jesushnallatami quiquinba estudiantecunamanga, trabajopi cumbacuna, amigocuna o familiacuna imata ninata o imata ruranataca anticipana capangui (2 Timoteo 3:12​ta liipangui). Por ejemplo, trabajopi huaquin cumbacunaca Bibliapi imata yachajushcata pactachijujta ricushpami burlarin. Shinallata huaquin familiacuna o shuj gentecunaca Bibliapi yachachishcacunaca na alichu can nishpami riman. Chaimi ima jarcaicunalla ricurinataca uchalla quiquinba estudiantemanga parlana capangui. Shinami paicunapash jarcaicuna ricurijpica imata ninata o imata ruranataca ña yachanga.

15. Estudiantepa familiacuna culirajpica ¿imashinata estudiantetaca ayudaita ushapangui?

¹⁵ Estudiantepa familiacuna culirajpica, familiacuna imamanda culirashcapi pensarichunmi estudiantetaca ayudana capangui. Por ejemplo, huaquin familiacunaca, Testigocunaca llullacunatami yachachin o Testigocunaca na ali gentecunachu can yashpami culiran. Jesuspa huaquin familiacunapashmi, Jesusca juizu illa, locomi tucushca nishpa pensan carca (Mar. 3:21; Juan 7:5). Quiquinba estudiantemanga familiacunahuan o shuj gentecunahuanbash aliguman parlachun y pacienciata charichunmi ayudaita ushapangui.

16. Estudiantecuna paicunapa crishcacunamanda aliguman parlachunga ¿imashinata ayudai ushapanchi?

¹⁶ Estudiantepa familiacuna paipa crishcacunamanda ashtahuan yachangapaj munajpica ¿imatata estudianteca ruraita ushan? Tauca cosascunata explicashpa yachachijpica, paicunaca shaijushpami yachajungapapash na munanga. Chaimandami quiquinba estudiantetaca ashagutalla yachachishpa explicachun ayudana capangui. Shinami estudiantepa familiaca cutinbapash Bibliamanda parlangapaj munanga (Col. 4:6). Estudianteca jw.org paginamandapashmi paipa familiamanga parlaita ushan. Shinami paicunaca, testigo de Jehovacunamanda ashtahuan informacionda yachangapaj munashpaca, paicuna ushashca ratopi chai paginaman yaicunga.

17. Estudiantecunamanga ¿ima ayudacunata utilizachunda yachachita ushapangui? (Fototapash ricupangui).

¹⁷ Familiacuna o trabajopi cumbacuna tapujpi quiquinba estudiante imata contestanata yachachunga, jw.org paginapi “Gentecunaca Testigo de Jehovacunamandaca cashnami tapurin” nishca parteta utilizashpami ayudaita ushapangui (2 Tim. 2:​24, 25). Shinallata Cushilla causapashunchi libropa cada lección tucuripimi ‘Huaquingunaca ninmi’ nishca recuadro tian. Chai recuadropi tiajuj tapuicunata imashina paipa shimicunapillata contestanata practicachunmi yachachina capangui. Quiquinba estudiante ashtahuan aliguta contestangapaj imagupipash mejorana cajpica ninallami capangui. Shina practicashpami quiquinba estudianteca imata crishcata o imata na crishcatapash ashtahuan facillla explicaita ushanga.

18. Quiquinba estudiante congregacionbi huauquipanicunahuan predicachunga ¿imashinata ayudaita ushapangui? (Mateo 10:27).

¹⁸ Jesusca paipa discipulocunamanga, tucui gentecunamanmi ali villaicunataca villachina canguichi nircami (Mateo 10:27​ta liipangui). Estudiantecunaca congregacionbi huauquipanicunahuan predicashpami, Jehová Dios imashina ayudajta ricushpa Jehovapi ashtahuan confianata yachajunga. Quiquinba estudiante congregacionbi huauquipanicunahuan predicachunga ¿imashinata ayudaita ushapangui? Congregacionbi campaña tiajta villajpica, publicador tucungapaj imata rurai ushashcatami quiquinba estudiantemanga parlana capangui. “Campañapica ashtahuan facilllami predicaita ushapangui” nishpami explicana capangui. Shinallata quiquinba estudiantetaca, entre semana reunionbi matricularishpa asignaciongunata cuchunmi animaita ushapangui. Shinami estudianteca paipa crishcacunamandaca ashtahuan seguro parlaita ushanga.

QUIQUINBA ESTUDIANTEMANGA PAIPI CONFIASHCATAMI RICUCHINA CAPANGUI

19. a) Jesusca ¿imashinata paipa discipulocunapi confiashcataca ricuchirca? b) ¿Imashinata Jesuspa ejemplota catishpa ñucanchi estudiantecunapi confiashcata ricuchi ushapanchi?

¹⁹ Jesús nara jahua cieloman rishpaca paipa discipulocunamanga, shuj punllaca cutinmi tandanajushun nircami. Chai ratopica paipa discipulocunaca paicuna jahua cieloman rinata Jesús parlajushcataca na intindircachu. Jesusca paipa discipulocuna na tucuita intindi ushanajujtaca ali yacharca. Shinapash paicuna paita catingapaj munashcataca Jesusca seguromi carca (Juan 14:1-5, 8). Jahua cieloman rinata intindingapaj y shuj cosascunatapash intindingapaj paipa discipulocuna tiempota minishtinajushcataca Jesusca alimi yacharca (Juan 16:12). Ñucanchicunapash Jesuspa ejemplota catishpami estudiantecunapi confiashcata ricuchishpa cashna nita ushapanchi: “Imata yachajushcataca pactachi ushanguimi, Jehová Diosta sirvitaca ushanguimi” nishpa.

20. Malaui llactamanda paniguca ¿imashinata paipa estudiantepi confiashcata ricuchirca?

²⁰ Ñucanchi estudiantecuna alita rurangapaj munanajujtaca confianami capanchi. Shuj ejemplota ricupashun. Malaui llactamanda Rebecab shuti paniguca Alina shuti jovengumanmi Bibliata yachachi callarirca. Alinaca catolicami carca. Cushilla causapashunchi libropi lección 14man chayashpaca, “Taita Diosta adorangapaj santocunata utilizanamandaca ¿imatata pensapangui?” nishpami tapurca. Chaimi Alinaca “chaitaca cada unomi ricuna canchi” nishpa culira contestarca. Chaimi Rebecaca, Alinaca asha tiempotallami Bibliataca estudiashpa catinga yarca. Shinapash tiempohuanga, santocunata na adorana cashcataca intindingami yashpami, estudiota cushpa catirca. Huaquin quillacuna jipaca Cushilla causapashunchi libropa lección 34​pi tiajuj tapuita utilizashpami Alinataca “Bibliata yachajuna y Jehová Diosta ashtahuan rijsinaca ¿imashinata quiquindaca ayudashca?” nishpa tapurca. Alina imata contestashcata parlashpami Rebecaca cashna nin: “Alinaca juyailla cosascunatami nirca. Testigo de Jehovacunaca Biblia imata mandashcatallami ruran cashca” nircami. Tiempohuanga santocunata utilizanata saquishpami Alinaca bautizarirca.

21. Ñucanchi estudiantecuna Jehová Diosta sirvichunga ¿imacunatallata rurai ushapanchi?

²¹ Jehová Diosmi Bibliapa yachachishcacunataca shuj muyugutashna gentecunapa shungupica viñachin. Shinapash ñucanchicunapashmi estudiantecunataca Jehová Diosta sirvichun ayudaita ushapanchi (1 Cor. 3:7). Estudiantecunamanga Jehová Dios imata mandashcata pactachichunmi yachachinchi. Shinallata Jehová Diosta ashtahuan juyachunmi yachachipanchi. Ashtahuanbash, Jehová Diosta juyaimanda, paita en primer lugar churanatami yachachinchi. Shinallata, llaquicuna ricurijpi Jehová Diospi confiana cashcatapashmi yachachinchi. Ñucanchi estudiantecunapi confiashcata ricuchishpami, estudiantecunataca paicunapash Jehová Diosta sirvi ushashcata seguro cachun ayudapanchi.