Diospa Reinomi para siempre mandanga

Shuj tutaca rey Nabucodonosorca nunca na muscushcatami muscurca. Paipa muscui ima cajta na yachashpami puñuitapash na ushajurca. Chaimi Nabucodonosorca, magiata rurajcunata cayashpa: ‘Ñucaca, shuj muscuitami charishcani ima cajta yachangapami munani’ nirca. Chai magiata rurajcunaca ‘ñucanchiman parlapailla’ nircami. Nabucodonosorca: ‘Ima muscushcata cangunallata na villajpica’ huañuchishapachami nircami. Shina nijpimi paicunaca: ‘Jatun mandajlla, can muscushcata ñucanchiman villajpica ima cajtapash villashunllami’ nirca. Chaimi Nabucodonosorca: ‘Cangunaca imatapash juchachishpami na ucha villangapaj munahuanguichi’. Uchalla villahuaichi nircami. Chaimi magiata rurajcunaca: “Jatun mandajlla, can tapushcataca tucui cai pachapi causaj runacunamandaca, pipash na tigrachi ushangachu” nirca.

Nabucodonosor ninanda culirashca cashpami, chai llactapi tucui alipacha yachajushcacunata huañuchichun mandarca. Daniel, Sadrac, Mesac, Abednego jovengunatapashmi huañuchigrijurca. Shinapash ‘Danielca rey Nabucodonosortaca, asha tiempoguta shuyapai’ nircami. Chai jipami Danielpash paipa quimsa cumbacunapash Jehovata ayudahuai nishpa mañarca. Jehová Diosca ¿imatata rurarca?

Jehová Diosca shuj muscuipimi Danielmanga, Nabucodonosorpa muscui ima cashcata ricuchirca. Chaimi Danielca Nabucodonosorpa sirvijhuan parlashpa: “Babilonia llactapi causanajuj alipacha yachajushcacunataca, ama huañuchipaichu”. Reypa ‘muscui ima cajtaca ñuca villashallami’ nirca. Chaimi chai sirvij runaca Danielta reypa ñaupaman aparca. Chaipimi Danielca: Taita Diosca jipa punllacunapi ima pasanatami muscuchishca. ‘Shuj jatun runaman rijchajtami ricurcangui’. ‘Chai runaman rijchajpa umaca, alipacha oromi carca. Cungamanda vijsacaman, rigracunapash culquimi carca. Vijsamanda uraica broncemi carca. Changacunaca jirrumi carca. Chaquipash ashaca jirru, ashaca turuhuan chapumi carca. Chaita ricujujpillatami shuj rumi shamujta ricurcangui. Chai rumica, runaman rijchajpa chaquipi huactarijta shamushpami jirruhuan, turuhuan chapushpa rurashca chaquitaca faquishpa ñuturca. Chai rumi huactajpimi jirrupash, turupash, broncepash, culquipash, oropash ñuturirca. Ñutu jupashnami tucurca. Chaitaca huaira shamushpami tucuillata aparca. Chai rumica tucuilla cai pacha junda jatun urcumi tucurca’.

Jipamanga Danielca nircami: ‘Chai muscui ima cajtami villagrini’. Chai oro umaca, can mandajujtami ricuchijun. ‘Cungamanda vijsacaman, rigracunapash culquimi’. Chaica ‘canba jipa shuj llacta mandangapaj jatarinatami ricuchijun’. Chaipa catica ‘shuj llactami mandangapaj jataringa. Chaica, bronceshnami canga. Chaimi tucui cai pachata mandanga’. Cutin chaipa ‘cati mandajuj shuj llactaca, jirrushna shinllimi canga’. Tucuripica ‘chaqui dedocunapash ashaca jirru, ashaca turutami ricurcangui’. Chaica, ‘ishcaipi shicanyarishca llacta, chaupica shinlli, chaupica urmanalla llactami canga’. Ashtahuangarin jatun urcuman tigrashca rumica Diospa Reinomi can. Chai Reinomi tucuilla mandana llactacunata ñutushpa tucuchinga. Shinami Diospa Reinolla para siempre mandanga nishpa.

Shina villajpimi rey Nabucodonosorca, Danielpa ñaupajpi urai cungurishpa: ‘Cangunapa Taita Diosca, tucui dioscunapa Taita Diosmi, jatun mandajcunatapash Mandajmi. Pipash na yachai ushashcatapash ricuchijmi’ can nirca. Chaimi Nabucodonosorca Danielta huañuchinapa randica, reypa jipa ‘tucui Babilonia llactata mandaj cachun, tucuilla alipacha yachajushcacunata mandaj cachunbash churarca’. Shinaca ¿Danielpa mañashcata Jehová Dios uyarcachu?