Nabucodonosorpa muscushca jatun quiru

Shuj tutaca Nabucodonosorca shuj muscuita muscushpami ninanda manllarirca. Chaimi “Babilonia llactapi causaj tucui alipacha yachajushcacunata” chai muscui ima cashcata villachun cayarca. Paicunapuramandaca ni maijan chai muscui ima cajtaca na villai usharcachu. Chaimandami rey Nabucodonosorca Danielhuan parlarca.

Nabucodonosorca Danieltaca nircami: Muscuipica shuj quirutami ricurcani. ‘Chai quiruca alto altota jahua cielocamanmi viñarca. Chaitaca, tucui cai pachamandami maimandapash ricunalla carca. Granocunapash ninanda fucujujta, fanga junda, juyailla cajtami ricurcani. Tucui animalcunapash, chai quiru ucupimi, llandushpa sirinajurca. Jahuata rij alasyu animalcunapash, chai quirupimi causanajurca’. Chai jipaca shuj angelmi ‘jahua cielomanda urai shamurca. Paica, cashnami caparijurca: Chai quiruta urmachishpa malquicunatapash fitichi. Ashtahuangarin troncotaca sapicunandi saquichilla. Chaitaca, jirru cadenahuan, bronce cadenahuan huatashpa saquichi. Chai quirupa shungupash, runapa shungushna cashca cashpapash, animalpa shungushnami tucunga. Canchis huatacaman chashna causachun’. Tucui gentecunami Taita Dioslla Tucuita Mandaj cajta yachanga. Paillami piman mandana derechotapash cuita ushan.

Jehová Diosca chai muscui ima cashcatami Danielmanga intindichirca. Chai muscui ima cashcata intindishpami Danielca manllarishpa cashna nirca: “Ñuca reylla, cambaj muscuica canda fiñajcunapaj cashpami ali canman”. Muscuipi ricushcacunaca canbimi pactarigrijun. Chai cuchushca jatun quiruca canmi cangui. Can mandajushcata quichujpimi, pamba animalcunashna jihuata micushpa causangui. Shinallata shuj angelca ‘troncotaca sapicunandi chaipillata saquichun mandajtami ricurcangui’. Chaica, cutin rey cana cashcatami ricuchijun.

Shuj huata jipaca Nabucodonosorca paipa huasipimi caiman chaiman purijurca. Shina purijushpami Babilonia llactata ricushpaca: Cai jatun Babilonia pueblotaca ñucami rurashcani. Ñucaca alipacha reymi cani nirca. Shina nijujpillatami “jahua pachamanda cashna nij uyarirca, jatun mandaj Nabucodonosor can mandana llactataca, ña quichui tucurcanguimi” nishpa.

Shina nijhuanmi Nabucodonosorca loco tucushpa sacha animal cuenda tucurca. Chaimi pai mandana huasimanda Ilujchishpa shitajpi animalcunahuan causana tucurca. ‘Paipa tucui cuerpopimi jatun angapaj plumashna milmacuna viñarca. Sillucunapash, alasyu animalcunapa sillucunashnami tucurca’.

7 huatacuna yalishca jipaca Nabucodonosor ali tucujpimi Jehová Diosca cutin Babilonia llactata mandachun saquirca. Chaimi Nabucodonosorca cashna nirca: ‘Cunanga, jahua pachamanda Jatun Mandajtami alicachishpa jatunyachini’. ‘Paica, jariyajcunatapash, jatun tucujcunatapash pingaipi churanllami’. Cunanga Jehová DiosTucuita Mandaj cajta, piman cungapaj munashpapash mandanataca cujlla cashcatami ali yachani nishpa.