Orohuan rurashca estatuapa ñaupapica na cungurircachu

Rey Nabucodonosor muscushca jipaca paiman rijcha estatuatami ‘orohuan rurachishpa shayachirca’. “Chaitaca, Babilonia llactapi tiaj Dura shuti pambapimi shayachirca”. Chaipimi chai llactamanda ashtahuan importante gentecunata, Sadrac, Mesac, Abednego jovengunatapash tandachirca. Jipamanga reyca cashnami mandarca: ‘Tucui canguna, bocinata, gaitata, arpata tocajta uyashpaca, Nabucodonosor orohuan rurachishca estatua ñaupapi cungurishpa adoranguichi. Maijanbash na cungurishpaca nina rupajuj hornopimi ñapash shitai tucunga’ nirca. ¿Imatata yuyangui? ¿Chai quimsa hebreocunaca orohuan rurashca estatuapa ñaupapi cungurircacha? O ¿Jehová Diostallachu adoragrinajurca?

Chai jipami reyca musicata tocachun mandarca. Chaita uyashpami ‘tucui gentecuna cungurishpa adoranajurca’. Shinapash Sadrac, Mesac, Abednego jovengunaca na cungurircachu. Chaita shuj jaricuna ricushpami Nabucodonosorman cashna villarca: ‘Can churashca estatuata Sadrac, Mesac, Abednegoca na adoranajunllu’ nirca. Chaimi reyca chai quimsa jovengunata cayashpa cashna nirca: Cutinmi ‘ñuca rurachishca estatuapa ñaupapi cungurishpa adorachun’ shuyasha. ‘Canguna na adorajpica, chai ratomi nina rupajuj hornopi shitachun mandasha. Maijan diospash ñucamandaca na salvangachu’ nirca. Shina nijpimi chai jovengunaca nirca: Ñucanchicuna chai estatuata adorachunga na shuyanachu capangui. ‘Ricui, ñucanchi Taita Diosca canmandaca salvangapachami’. ‘Pai na salvajpipash ñucanchica can rurachishca estatuataca nimamanda na adorashunllu’ nircami.

Shina nijpimi Nabucodonosorca ninanda culirashpa paipa sirvijcunataca hornota 7 viajecaman rupayachichun mandarca. ‘Jipaca paipa soldadocunatami Sadrac, Mesac, Abednegotapash huatashpa, nina rupajuj hornoman shitachun mandarca’. Chai horno rupa rupa cashcamandami shitangapaj apanajuj soldadocunata chai ninaca huañuchirca. Shinami chai quimsa jovengunaca nina rupajuj hornoman shitai tucurca. Chai jipaca Nabucodonosorca hornoman quimirishpami nina ucupi chuscupuracuna purinajujta ricurca. Chaimi ‘Nabucodonosorca ninanda manllarishpa’ ‘paita sirvijcunataca cashna tapurca: nina rupajuj hornopica ¿nachu quimsapuracunatalla huatashpa shitarcanchi?’ ‘Ricuichi, ñucaca chuscu runacunatami nina chaupipi ricuni. Chai chuscumanda shujcarin shuj ángel cuendami’ can nirca.

Shina ricushpami Nabucodonosorca rupajuj hornoman quimirishpa cashna caparirca: ‘Jahua pachapi causajuj Taita Diosta sirvijcuna chai ucumanda Ilujshimuichi’ nirca. Sadrac, Mesac, Abednegopash hornomanda llujshijpi imapash na pasashcata ricushpaca manllarishpami ricunajurca. Paicunapa aicha carapash, ajchapash, paicuna churajushcapash na rupashcachu carca. Cushnillapash na ashnanajurcachu.

Nabucodonosorca: ‘Sadrac, Mesac, Abednegopa Taita Diosca alipachamari can. Paita sirvijcunata quishpichingapami paipa angelta cachamushca’. Pai shinaca ‘maijan shuj diospash na tianllu’ nirca.

Quimsa hebreocunaca ima pasajpipash Jehová Diostalla tucuipi cazunatami decidishca carca. ¿Canbash paicuna shina cangapaj munanguimanllu?