Enocca nali gentecunapurapi causashpapashmi Jehová Diosta sirvirca

DIABLOCA gulpi gentecunatami Taita Diosmanda caruyachita ushani nishca. Y huaquin gentecunataca Taita Diosmanda caruyachishcami. Abel huañushcamanda ña casi 500 huatacuna yalishca cajpipash Jehová Diostaca ni shujllapash na sirvijurcachu. Gentecunaca nalicunatalla rurashpami causanajurca.

Shina nali gentecunalla junda cajpipash Jehovata ali adoraj shuj runagumi ricurirca. Paica Enocmi carca. Bibliapi fechacunata ricujpica Enocca 3​mil 404 (a.e.c) huatapimi nacishca. Paica Jehovapa ñaupapi ali ricuringapami ninanda esforzarirca. Chaimi apóstol Pablopash Enocca Jehovata ali adorajcunapurami can nirca. Porque Enocca shinlli feta charishcatami ricuchirca. Ñucanchipash Enoc cuentallatami shinlli feta charina capanchi. Shinaca Enocca ¿pita carca? ¿Ima llaquicunatallata charirca? Llaquicunata aguantachunga ¿imata ayudarca? Paipa ejemplomandaca ¿imatata yachajupanchi?

Enoc runagu nacirichun casi 400 huatacuna faltajpimi, Enós runapa punllacunapi “gentecunaca Jehová Diospa shutita utilizai callarirca” (Génesis 4:26). Gentecunaca callarimandapachami Taita Diospa shutitaca utilizan carca. Shinapash Enós causashca punllacunapica Taita Diosta adorana munaihuanga paipa shutitaca na utilizanajurcachu. Hebreocunapa costumbrecunata, idiomata estudiadorcunaca ninmi que, Génesis 4:26​pica “gentecunaca Taita Diospa shutita na respetashpami utilizai callarirca” nishpami nina can nishpa. Por ejemplo, gentecunaca talvez paicunallatami Jehová shutita churarinajushcanga. Huaquingunacarin, Taita Diostami adoranajunchi nishpami shuj gentecunata Jehová shutita churashpa paicunatara adoranajushcanga. O talvez idolocunatami Jehová nishpa shutichinajushcanga.

“Enocca Taita Dioshuan purishpami catirca”

Enocca nali gentecunapurapi causashpapash “Taita Dioshuan purishpami catirca”. Shinapash Enocpa punda familia Set, Enós, Quenán, Mahalalel y Jaredpash Taita Dios munashcashna causashcataca na nijunllu. Paicuna Taita Diosta sirvishpa causashca cajpipash Enocmi paicunata yali Jehovataca tucui shunguhuan ali adorashpa causashca (Génesis 5:3-27).

Jehová Dioshuan purinaca paihuan amigo cana y pai munashcashna causanami can. Y Enocca Jehová Dios munashcashnami causarca. Chaimi Jehovapa ñaupapica Enocca ali ricurirca. Chaimanda parlashpami Septuaginta griega traduccionbica, ‘Enocca, Taita Diospa favortami charirca’ nin. Y apóstol Pablopash chai yuyaitallatami nirca (Génesis 5:22; Hebreos 11:5).

Enocca shinlli feta charimandami Jehovapa ali amigo caita usharca. Porque Enocca Génesis 3:15 profeciapimi confiashcanga. Adanda personalmente rijsishca cashpaca, Enocca Jardín de Edenbi Jehová Dios paicunahuan rurashca tratocunamandami Adanhuan parlaita ushanman carca. Pero imasha cashca cashpapash, Enocca Jehová Diosmandaca ñami yacharca. Chaimandami Jehovahuan ali amigo canataca tucui shunguhuan mascarca (Génesis 3:15; Hebreos 11:6, 13).

Enoc cuentallatami ñucanchipash Jehovahuan ali amigo cangapaca, Jehovata rijsishca jahuapash pai munashcashna causangapaj esforzarina canchi. Por ejemplo pihuanbash amigo cashpaca chai personashnami pensanchi, parlanchi y imatapash ruranchi. Shinallata paihuan amigo cashpa catingapaj munaimandami, paita llaquichij cosascunata na ninchi y na ruranchi. Y shinallata imapash cambiota ruragrijushpaca, paihuan amigo cashpa catinata afectagrijujta o na afectagrijujtapashmi pensarinchi.

Jehovahuan ali amigo cangapaj munashcataca ñucanchi ruraicunahuanmi ricuchina canchi. Primeroca, Jehová Dios imata rurachun munashcata y ima cosascunata na ricunayachishcatami yachana canchi. Chai jipaca Jehovamanda imata yachajushcata pactachingapami esforzarina canchi. Shinami ñucanchi ruraicuna y pensamientocunapash Jehová Dios munashcashna canga.

Shinaca Jehová Dioshuan puringapaca paipa ñaupapimi ali ricurina canchi. Enocca tauca tauca huatacunatami Jehovapa ñaupapi ali causangapaj esforzarirca. Chaimi hebreo shimipica Enocca Taita Dioshuanmi “purishpa catirca” nin. Shina nishpaca, huañungacaman Jehovata sirvishcatami nijun. Y Noepashmi Enoc cuentallata Jehová munashcashna causarca (Génesis 6:9).

Enocca paipa huarmihuanga hijacunatapash y churicunatapashmi charirca. Shuj churica Matusalén shutimi carca (Génesis 5:21, 22). Enocca paipa familiapash Jehovata sirvichun ayudangapaca ninandami esforzarishcanga. Chai tiempocunapica Jehovata sirvinaca na facilchu cashcanga. Porque nalitalla ruraj gentecunapurapimi causarca. Talvez paipa punda familiamandaca Noepa taita Lamecllami Jehovapi crishpa causashcanga (Génesis 5:28, 29). Shina cajpipash Enocca na manllashpami Jehovataca aliguta adorashpa causarca.

Enoctaca Jehová munashcashna causachunga ¿imata ayudarca? Enocca Jehovapa shutita na respetaj gentecunahuan y nalita rurashpa causaj gentecunahuanga na amiganllu cashcanga. Shinallata paica Jehovapa ayudata mañangapami siempre oran cashcanga. Shina ruranami ama nalicunata rurachun y Jehová munashcashna causachun ayudashcanga.

Nalicunapa contrami shuj profeciata nirca

Nali gentecunapurapimi causanajunchi. Chaimandami Jehová Dios munashcashna causanaca difícil can. Pero Enocca Jehová munashcashna causangapaj esforzarishca jahuapash, Jehovapa ayudahuanga nali gentecunapa contrami cai profeciata nirca: “Ricuichi, Jehová Diosca paipa ashtaca ashtaca angelcunahuanmi shamurca. Tucuicunata juzgangapaj y paicuna tucui nalicunata rurashpa culpablecuna cashcata ricuchingapami Taita Diosca shamurca. Porque paicunaca nalita ruraj pecadorcunami can. Y paipa contrami nalicunata nishpa parlarca” (Judas 14, 15).

Enocpa shimicunata uyashpaca chai nali gentecunaca ¿imatashi rurangapaj munashcanga? Talvez Enoctaca na ricunayachishpami, chai gentecunaca burlarishcanga, asishpa ricushcanga y hasta amenazaitapashmi amenazashcanga. Huaquingunacarin Enoctaca huañuchingapapashmi munashcanga. Shina cajpipash Enocca na manllashpami Jehová munashcashna causashpa catirca. Paica Abelta ima pasashcataca alimi yacharca. Pero Abelshnallatami ima pasana cajpipash Jehovata sirvishpa catingapaj decidido carca.

‘Taita Diosmi aparca’

Enocca huañuna peligropimi carca. Chaimi Taita Diosca paitaca ‘aparca’ (Génesis 5:24). Jehová Diosca paipa profeta Enocta paipa contracuna llaquichichunga na saquigrijurcachu. Chaimi apóstol Pablo nishcashnaca, ‘huañuita ama rijsichun apai tucurca’ (Hebreos 11:5). Tauca gentecunaca ninmi, Enocca na huañushcangachu Taita Diosmi jahua cieloman apashcanga, chaipimi causajungara nishpa. Pero na shinachu can porque Jesusllatami cashna nirca: “Nipipash na jahua cielomanga vichai rishcachu. Solo jahua cielomanda urai shamushca Runapa Churillami jahua cielomanga vichai rishca”. Shinaca Jesusmi jahua cieloman rigrinajujcunamandaca “primero” rishca (Juan 3:13; Hebreos 6:19, 20).

Shinaca Enoctaca ¿imata pasarca? ‘Huañuita ama rijsichun apai’ tucurca nishpaca ama imapash nanaita sintichun Taita Diosllata shuj visionda ricuchishpa Enocpa causaita quichushcatami nijun yarin. Chai jipaca Enoctaca ‘nipipash na tarita usharcachu’. Porque Jehová Diosmi Enocpa cuerpotaca, Moisespa cuerpotashnallata desaparecichishca yarin (Deuteronomio 34:5, 6).

Enocca 365 añostami causarca. Pero chai tiempopi gentecunahuan ricujpica ashala huatacunatallami causarca. Shinapash Enocca huañungacamanmi, Jehovataca tucui shunguhuan sirvirca. Chaimi ‘Enoc nara apai tucujpillata, Taita Diosca paihuan cushijushca cashcata ricuchirca’. Shinapash Enochuan cushijushca cashcata Jehová Dios imasha ricuchishcataca Bibliapica na ninllu. Pero shinapash Enocca nara huañushpallatami Jehovapa aprobacionda charishcataca ali yacharca. Chaimandami Enocta Jehová Dios causachinataca seguro caita ushanchi. Shinaca ñucanchipashmi Enoc cuentallata huañungacaman Jehovataca tucui shunguhuan sirvina canchi.

Enoc cuenta shinlli feta charishunchi

Jehová Diosta sirvij gentecuna caimandami ñucanchipash shinlli feta charina canchi (Hebreos 13:7). Enocca feta charimandami Jehovapa primer ali profeta tucurca. Enocpa punllacunapi gentecunaca cunanbishnallata Taita Diostapash na respetaj, fiero fiero y nalicunatalla rurashpa causaj gentecunami carca. Pero Enocca chai gentecunamandaca diferentemi carca. Paica shinlli fetami charirca y Jehovatapash tucuipimi cazurca. Enoctaca chai nali gentecunapa contra predicachunmi, Jehová Diosca mandarca. Chai advertenciata predicachunbashmi Jehová Diosca fuerzata cushpa ayudarca. Shinami Enocca na manllashpa predicarca. Chaimi paipa contracuna Enocta llaquichingapaj munajpipash Jehová Diosca cuidarca.

Enoc cuentallata shinlli feta charijpica, cai último punllacunapi predicashpa catichunmi Jehová Diosca fuerzata cushpa ayudanga. Chaimi na manllashpa predicaita ushashun y Jehová Diostapash tucuipi cazushun. Shinami nali gentecunamanda diferente cashcata ricuchishun. Shinlli feta charinami Jehová munashcashna causashpa paipa shunguta cushichichun ayudanga (Proverbios 27:11). Shinlli feta charimandami Enocca nali gentecunapurapi causashpapash Jehová Dios munashcashna causaita usharca.

[Recuadro]

¿Enoc libromanda copiashpachu Bibliapica escribishca?

Enoc librota pipacha escribishcataca na yacharinllu. Shinallata Bibliapa librocunapurapash na canllu. Llullashpallami cai librotaca Enocmi escribishca nin. Cai librotaca Jesús nara cai alpaman shamujpillata siglo I y IIpimi escribishca yarin. Enocmanda Genesispi parlashcacunatami, judío rabinocunaca paicuna mirachishpa llullacunata chai libropica escribishca. Chaimandami Jehová Diospa shimi Bibliata juyajcunaca, chashna yanga librocunataca rechazanchi.

Judas libropillami Enoc villashca profeciamandaca parlan. Chaipica cashnami nin: “Ricuichi, Jehová Diosca paipa ashtaca ashtaca angelcunahuanmi shamurca. Tucuicunata juzgangapaj y paicuna tucui nalicunata rurashpa culpablecuna cashcata ricuchingapami Taita Diosca shamurca. Porque paicunaca nalita ruraj pecadorcunami can. Y paipa contrami nalicunata nishpa parlarca” (Judas 14, 15). Huaquin estudiashcacunaca, Judasca Enoc libromanda shimicunatallata copiashpami escribishcanga ninmi. Shinapash Judasca ¿ciertopachachu chai yanga libromanda copiashpa escribishcanga?

Enocpa profeciamanda Judas imashina yachai chayashcataca Bibliapica na ninllu. Shinapash Enocpa profeciaca judiocunapurapica rijsishcami carca. Talvez Judasca chai parlocunata uyaimandami chai profeciataca yachai chayashcanga. Apóstol Pablopash Faraonba brujocunapa shuticunataca shinallatami yachai chayashcanga. Chaimi paicunamanda parlashpaca Janes y Jambres brujucunami Moisespa contra shayarirca nirca. Apóstol Pablo paicunapa shuticunata na nishca cajpica, cunangamanmi paicuna ima shuti cashcataca na yachanchiman. Shinaca Enoc librota escribij jari chai informacionda yachashca cajpica, Judascarin con más razonmi yachashcangaa (Éxodo 7:11, 22; 2 Timoteo 3:8).

Enocpa profeciata Judas imashapacha yachai chayashcataca na yacharinllu. Shinapash Judasca, Jehová Dios paipa espíritu santohuan ayudajpimi chaitaca escribirca. Chaimandami paipa escribishcacunapica tucui shunguhuan confiaita ushapanchi (2 Timoteo 3:16). Jehovapa espíritu santomi Judastaca la verdadta escribichun ayudarca.

[Nota]

[Foto]

Enocca na manllashpami Jehová cushca mensajetaca predicarca