“Cai nali punllacunapi Taita Dioshuan puripashunchi”

“Enocca Taita Dioshuan purishpami catirca. Paitaca nunca más ñana pipash ricurcachu. Porque paitaca Taita Diosmi apashcarca” (GÉNESIS 5:24).

1. Cunanbica ¿ima llaquicunallata tian?

MANLLANAI llaqui tiempocunapimi causanajunchi. 1914​pi jahua cielopi Jesús mandai callarishcamandapachami, gentecunaca shina llaquinai tiempocunapi causanajushcanchi. Chai huatamandapachami Bibliapi parlashca “último punllacunapi” causanajunchi. Chaimi hambrunacuna, unguicuna, terremotocuna y guerracunapash ashtahuan mirashca (2 Timoteo 3:1; Apocalipsis 6:​1-8). Y chai llaquicunaca Jehovata sirvijcunatapashmi afectashca. Gulpi gentecunallatami culquimanda, politicocunapa culpamanda, shuacunamanda y unguicunamandapash sufrina tucushcanchi.

2. Jehovata sirvijcunaca ¿ima llaquicunatallata chimbapurana tucushca?

² Shinallata Jehovata sirvijcunataca ‘Taita Diospa mandamientocunata cazushcamanda y Jesusmanda villachingapaj cachashcacuna caimandami’, Satanasca ninanda catiriashpa llaquichijushca (Apocalipsis 12:17). Y aunque na tucuicunallata directamente llaquichi tucushca cashpapash, Jehovata sirvijcunaca mayoriami Diablopa y cai mundopa contra shayarina tucushcanchi (Efesios 2:2; 6:​12). Chaimandami trabajopi, escuelapi o maipi cashpapash Jehovata na adorangapaj munaj gentecunashna ama pensangapaj ninanda esforzarina tucunchi.

Jehová Dios munashcashna causapashunchi

3, 4. Jehovata sirvijcunaca ¿imamandata diferente canchi?

³ Primer siglopi cristianocunapashmi cai mundopa contra shayarina tucurca. Chaimi paicunaca Jehovata na sirvijcunamandaca diferente carca. Chaita intindichingapami Apóstol Pabloca cashna nirca: “Chaimi quiquingunataca ñucanchi Señor Jesuspa shutipi nipani y rogapani, ña ama shuj llactamanda gentecunashnaca causashpa catipaichichu nishpa. Porque chai gentecunaca paicunapa yanga yuyaicunata catishpami causan. Paicunapa yuyaicunaca yana tutashnami can. Taita Dios carasha nijuj causaitapash na chasquishpami causanajun. Porque paicunaca Taita Diosta rijsingapaca na munanllu. Shinallata paicunapa shungupash nimata na sintinllu. Juizu illa tucushpami, nalicunata rurashpapash nimata na pinganayachin y tucui clase o tucui laya millanai ruraicunatapashmi ansia ruranajun” (Efesios 4:​17-​19).

⁴ Chai shimicunaca Apóstol Pablo causashca tiempopi gentecuna imashina causanajushcatami clarito intindichin. Y cunanbi gentecunapash shinallatami causanajun. Chaimi cunanbi cristianocunaca, primer siglopi cristianocunashnallata Jehová Dios munashcashna causangapaj esforzarinchi. Huaquin gentecunaca, maitashi juchayu y imapash na sirvij gentecunaca Jehová Dios munashcashna causaitaca usharingayari ninmi. Shinapash Bibliapica, gentecuna shina causai ushashcata y Jehová Diosllata chashna causachun munashcatapashmi ricuchin. Chaimi tauca tauca huatacuna huashamanga, profeta Miqueasca cashna nishpa escribirca: “Huañuna aichayu runalla. Paica, ñami cambaj ima ali canatapash villarca. Mandaj Diosca, caitallami can rurachunga mañan: Imatapash cashcatapacha ruraj cachun, llaquishpa juyaj cachun, cambaj Taita Diospaj ñaupajpi na jariyashpa causachunmi munan” (Miqueas 6:8).

¿Imashina y imamandata Jehová munashcashna causana canchi?

5. Jehová munashcashna causangapaca ¿imatata rurana canchi?

⁵ Tucui ushaita charij Jehová munashcashna causangapaca ¿imatata rurana canchi? Jehová munashcashna causangapaca paipa mandashcacunatami ñucanchi causaipi pactachina capanchi. Shinallata paipa ñaupapi ali ricurij cosascunata rurangapapashmi esforzarina capanchi. Shina causangapaj esforzarimandami cai mundopi gentecunamandaca diferente capanchi. Shina causanatami Bibliapica, Jehová Dioshuan purinaa nishpapash churashca. Jehová Dios munashcashna causanami cristianocunapaca ashtahuan ali can. ¿Imamandata shina nipanchi? Huaquin razongunata ricupashunchi.

6, 7. Jehová munashcashna causanaca ¿ima razongunamandallata ali can?

⁶ Jehovami tucuita rurashca. Paimi ñucanchimanga causaita caran y causashpa catichun imata minishtishcatapash caran (Apocalipsis 4:​11). Chai razonmandami, Jehová Diosca ñucanchicuna imasha causanata nina derechota charin. Pai munashcashna causanaca ñucanchipallatami ali can. Porque shinami pecadomanda perdonai tucuna oportunidadta charinchi y para siempre causana esperanzatapash charita ushapanchi. Shinallata Jehová Diosca pai munashcashna causajcunataca cunanbillata aliguta causachunmi ayudan. Shinami aunque imperfecto cashpapash y Satanaspa mundopi causashpapash cushilla, ali causaita ushanchi (Juan 3:​16; 2 Timoteo 3:​15, 16; 1 Juan 1:8; 2:​25; 5:​19). Shinallata Jehová Dios munashcashna causashpaca, congregacionbash tranquilo y unido cachunmi ayudashun (Colosenses 3:​15, 16).

⁷ Shuj rasondapash ricupashunchi. Jardín de Edenbica Jehová Diostaca mandana derechotaca na charinllu nishpami Diabloca juchachirca. Chaimandami Jehová munashcashna causashpaca, paipa Gobiernotalla apoyajushcata ricuchipashun (Génesis 3:​1-6). Shinallata Jehová Dioslla mandana derechota charishcatapashmi na manllashpa villachishun (Salmo 83:18). Bibliapica, Taita Diospa shuti santificado cachun y paipa munai pactarichun mañana cashcatami yachajupashcanchi. Chaimi Jehová munashcashna causashpaca, chai cosascuna pactarichun munashcata ricuchishun (Mateo 6:​9, 10). Ashtahuanbash Jehová Diosllami tucuita alipacha yachan. Y paica nunca na pandarinllu. Chaimi Jehová munashcashna causanata decidishpaca, alitapacha ruranajunchi (Romanos 16:27).

8. Enocpa y Noepa tiempocunaca ¿imapita ñucanchi tiempocunahuanga igual can?

⁸ Cai difícil tiempocunapica, gentecunaca mayoriami Jehovataca na yarishpa causan. ¿Shina gentecunapurapi causashpapashchu Jehová munashcashna causaita usharin? Chaita yachangapaca Enocpa y Noepa ejemplota ricupashunchi. Paicuna causashca tiempocunaca cunanbishnallatami nali ruraicunahuanlla junda carca. Por ejemplo, Noepa punllacunapi gentecunaca millaicunami carca y huainayashpallami causanajurca. Shina gentecunapurapi causashpapash Enoc y Noeca, Jehová munashcashnami causaita usharca. Pero ¿imashinata shina causaita usharca? Chaita yachangapaca, cai temapica Enocpa ejemplotami ricupashun. Cutin cati temapica Noepa ejemplotami ricupashun.

Nali gentecunapurapipash Enocca Jehová munashcashnami causarca

9. Bibliapica ¿imatallata Enocmandaca parlan?

⁹ Bibliapica Enocmi primerito Jehová munashcashna causashca nijun. Chaimi cashna nin: “Matusalenda charishca jipaca, [...] Enoc runaguca [...] Taita Dioshuanmi purirca” (Génesis 5:​22). Chai tiempopica mayoría gentecunaca más de 800 añostami causan carca. Cutin Enocca 365 huatacunatami causarca. Pero chai tucui huatacunapimi ‘Enocca Taita Dioshuan purishpa catirca. Paitaca nunca más ñana pipash ricurcachu. Porque paitaca Taita Diosmi apashcarca’ (Génesis 5:​24). Enoctaca contracuna ama llaquichichunmi Jehová Diosca causaita quichushca yarin (Hebreos 11:​5, 13). Bibliapica Enocmandaca ashagutallami parlan. Pero chaicunata liishpami Enocca difícil tiempocunapi causashcata ricupanchi.

10, 11. a) Adán y Eva pecashca jipaca ¿paicunapa huahuacunahuanga imata pasarca? b) Enocca ¿ima profeciatata nirca? Y chaita uyajcunaca ¿imatata rurarca?

¹⁰ Adanba pecadomandami gentecunaca ashtahuan ashtahuan huaglishpa catinajurca. Bibliapica Adanba churi Cainmi primer asesino tucurca ninmi. Porque paica paipa propio huauqui Abeltami huañuchishcarca (Génesis 4:​8-​10). Abel huañushca jipaca, Adán y Evaca shuj churitapashmi charirca. Chai churitaca Set nishpami shutichirca. Setmanda parlashpami Bibliapica cashna nin: “Setpashmi shuj churita charirca. Chai churica Enós shutimi carca. Chai tiempopimi gentecunaca Jehová Diospa shutita utilizai callarirca” (Génesis 4:​25, 26). Shinapash ‘Diospa shutita utilizai callarishca’ cashpapash Jehová Diosta adorangapaca na carcachu. Paicunaca Jehová shutitaca gentecunata y santocunata adorangapami utilizanajurca. Tauca huatacuna jipaca, Cainba descendiente Lamecca paita llaquichishca shuj jovendami huañuchishcarca. Chaimandami paipa huarmicunamanga cashna escribirca: “Si pipash Cainda huañuchishpa 7 viajecaman llaquichi tucuna cashpaca, ñucata huañuchidorcarin 77 viajecamanmi llaquichi tucuna can” (Génesis 4:​10, 19, 23, 24).

¹¹ Caicunata ricushpami Satanaspa culpamanda Adanba huahuacuna ashtahuan nalicuna tucunajushcata cuenta japinchi. Shina nali gentecunapurapimi Enocca Jehovapa profeta carca. Y Enocpa shimicunaca cunangamanmi sirvin. Por ejemplo, Judasca Enocpa cai profeciatami escribirca: “Ricuichi, Jehová Diosca paipa ashtaca ashtaca angelcunahuanmi shamurca. Tucuicunata juzgangapaj y paicuna tucui nalicunata rurashpa culpablecuna cashcata ricuchingapami Taita Diosca shamurca. Porque paicunaca nalita ruraj pecadorcunami can. Y paipa contrami nalicunata nishpa parlarca” (Judas 14, 15). Cai profeciaca Armagedonbimi completamente pactaringa (Apocalipsis 16:14, 16). Cai profeciata uyashpaca, “nalita ruraj pecador” gentecunaca ninandami Enochuanga culirashcanga. Chaimandami Jehová Diosca Enocta juyaimandaca, gentecuna ama llaquichichunga paipa causaita quichurca.

Jehová munashcashna causachunga, Enoctaca ¿imata ayudarca?

12. Enocca ¿imamandata diferente carca?

¹² Jardín de Edenbica Evashnallatami Adanbash Satanastara cazurca. Y Jehovapa contrapash tucurca (Génesis 3:​1-6). Cutin paicunapa churi Abelca diferentemi carca. Chaimi paica Jehová Diospa ñaupapica ali ricurirca (Génesis 4:​3, 4). Adanba chaishuj churicunapash Abel cuentaca na carcachu. Shinapash Adanba descendiente Enocca diferentemi carca. Pero Enocca ¿imamandata diferente carca? Enocmanda parlashpami Apóstol Pabloca cashna nirca: “Enocca tucui shunguhuan crimandami huañuita ama rijsingapaj apai tucurca. Taita Dios apashcamandami paitaca nipipash na tarita usharca. Enoc nara apai tucujpillatami, Taita Diosca Enochuan cushijushca cashcata ricuchirca” (Hebreos 11:5). Enocca ‘muyundipi caj shuj jatun fuyushna’ testigo de Jehovacunapurami carca. Paicunaca ñucanchipaca alipacha ejemplomi can (Hebreos 12:1). Enocca shinlli feta charimandami paipa tucui causaipi Jehová munashcashna causaita usharca. Paica más de 300 añostami causarca. Cunanbi ricushpaca ashtaca huatacunatami causarca.

13. Enocca ¿ima clase fetata charirca?

¹³ Femanda parlashpami Apóstol Pabloca cashna nirca: “Feta charijcunaca paicuna imata shuyanajushca pactarinataca seguromi can. Shinallata feta charijcunaca, paicuna imata crishcacuna na ricunalla cajpipash chaicuna cierto cajtaca seguromi can” (Hebreos 11:1). Shina clase fetami Enocpash y Jehovata shuj sirvijcunapash charirca. Pero feta charinaca ¿imata can? Feta charinaca ñucanchi imata shuyashcacuna pactarinata seguropacha canami can. Y chai seguridadmi ñucanchi causaipi ima ashtahuan importante cashcata yaipi cachun ayudan. Shina feta charinami Enoctaca nali gentecunapurapi causashpapash Jehová munashcashna causachun ayudarca.

14. Shinlli feta charichunga ¿imata Enoctaca ayudarca?

¹⁴ La verdadta yachajunami shinlli feta charichun ayudanga. Enocca ¿imatallata yacharca? (Romanos 10:14, 17; 1 Timoteo 2:4). Jardín de Edenbi ima pasashcata, chaipi causai imasha cashcata y chai pushtu tiashpa catishcatapashmi Enocca yachashcanga. Chai pushtuman yaicuna prohibido cashcatapashmi yachashcanga (Génesis 3:​23, 24). Shinallata Adanba huahuacuna cai alpapi mirachun y cai alpata shuj paraisota rurachun Jehová Dios munashcatapashmi yachashcanga (Génesis 1:​28). Satanaspa culpamanda tiashca llaquicunata y Satanastapash tucuchingapaj shuj Miraita apamunatami Jehová Diosca prometishcarca. Chai promesataca Enocca ninandami valichin cashcanga (Génesis 3:​15). Chaimi Enocca, shuj profeciapica Satanás tucuchi tucunata villarca. Chai profeciami Judas libropi escribishca tiajun. Enocca shinlli feta charimandami “tucui shunguhuan sirvingapaj munajcunata” Jehová Dios bendicianataca seguro carca (Hebreos 11:6). Ñucanchihuan ricujpica Bibliamandaca huaquin cosasgucunatallami Enocca yacharca. Shina cashpapashmi shinlli feta charimandaca, nali gentecunapurapi causashpapash Jehová munashcashna causaita usharca.

Enocpa ejemplota catipashunchi

15, 16. ¿Imashinata Enocpa ejemplotaca catita ushapanchi?

¹⁵ Enoc cuentallatami ñucanchicunapash difícil punllacunapi causanajushpapash Jehová munashcashna causangapaj esforzarina canchi. Y chaipaca Enocpa ejemplotami catina capanchi. Shinallata Jehová Diosmanda y paipa voluntadmandapash aligutami yachajuna capanchi. Y chaitaca nunca na cunganachu capanchi. Chaipa randica chaita yaipi charishpami imagutapash decidina canchi (Salmo 119:101; 2 Pedro 1:​19). Shinallata Jehovapa consejocuna ñucanchita dirigichunmi saquina capanchi. Ashtahuanbash ñucanchi pensamientocuna y ruraicunapash Jehová munashcashna cachunmi esforzarina canchi.

¹⁶ Bibliapica Enocpa punllacunapi shujcunapash Jehovata sirvishcataca na ninllu. Talvez Enocca paigullami Jehovataca sirvijushcanga. Cunan tiempocunapipash Jehovata sirvijcunaca ashallagucunami capanchi. Shina cashpapash na desanimarinachu capanchi. Porque Jehová Diosca pi jarcajpipash ñucanchitaca siempremi cuidanga (Romanos 8:​31). Enocca nali gentecuna tucuchi tucunataca na manllashpami villachirca. Shinallatami ñucanchipash, gentecuna burlarijpi, jarcangapaj munajpi o llaquichijpipash na manllashpa ‘Taita Diospa Gobiernomanda ali villaicunataca’ predicanchi (Mateo 24:14). Chai tiempopi gentecunahuan ricujpica, Enocca ashagutallami causarca. Shinapash paica jipa punllacunapi ali causaigu tianataca seguromi carca. Y chai esperanzataca yaipimi causarca (Hebreos 11:10, 35). Ñucanchicunapashmi Jehovapa promesacuna pactarinataca yaipi causana capanchi. Chaimandami cai mundopi cosascunata ruranapa randica, ñucanchi fuerzacunatapash y charishca cosascunatapash Jehovata sirvingapaj utilizana capanchi (1 Corintios 7:​31).

17. ¿Imamandata Bibliamandaca Enocta yalimi yachanchi nipanchi? ¿Imatata ñucanchicunaca rurana capanchi?

¹⁷ Jehová Dios prometishca Mirai shamunatami Enocca seguropacha carca. Y chai Miraica Jesusmi carca. Pai shamushcamandaca ñami más o menos 2 mil huatacuna yalishca. Paimi ñucanchita salvangapaj paipa causaita curca. Shinami Enocpash, Jehovata punda sirvijcunapash y ñucanchicunapash para siempre causana oportunidadta charinchi. Jesusca jahua cielopi Taita Diospa Gobiernopi rey tucushpami Satanastaca cai alpaman shitamurca. Chaimandami cai alpapica sufrimientocuna junda causanchi (Apocalipsis 12:12). Imashinami ricupanchi, cunanbica Enocta yalimi Bibliamandaca yachapashcanchi. Shinaca, Enoc cuentallatami ñucanchicunapash shinlli feta charina capanchi. Shinallata Jehovapa promesacuna pactarinata seguropacha cashpami Jehová Dios munashcashna imatapash rurana capanchi. Y Enoc cuentallatami nali tiempocunapi causashpapash, Jehová Dios munashcashna causangapaj esforzarina capanchi.

[Notas]

¿Imatata nipanguiman?

• Jehová munashcashna causanaca ¿imata can?

• Jehová munashcashna causanaca ¿imamandata ali can?

• Nali tiempocunapi causashpapash ¿imamandata Enocca Jehová munashcashna causaita usharca?

• ¿Imashinata Enocpa ejemplotaca catita ushapanchi?

[Foto]

Feta charimandami, ‘Enocca Taita Dioshuan purishpa catirca’

[Foto]

Jehovapa promesacuna pactarinataca seguropachami capanchi

[Creditos]

Huarmi, derecha ladopi: FAO/Bpa foto. Imevbore; urmajuj edificio: San Hong R-C Picture Company