¿Taita Dios imata nijtaca rurapanguichu?

¿Na rijsishca gentecunata o chairalla rijsishca gentecunataca ninchimanllu “imata minishtishpapash nihuanguilla” nishpa? Na. Shinapash ¿nachu ñucanchi rijsicunata ayudangapaj munashpa o paicuna imata rurai nishcata rurangapaj munashpaca “imata minishtishpapash nihuanguilla” ninchiman?

Bibliapica ninmi, Taita Diosca gentecuna cushilla cachun munashpami paicuna imaguta minishtijushcata caran nishpa. Rey Davidpa ejemplota ricupashun. Paica Taita Diospa ali rijsimi carca. Paica nircami: ‘Ñucata Mandaj Taita Dioslla, jatun manllarinacunatami rurashcangui. Ñucanchitapash ashtahuanmi yarijungui. Chaicunaca na cuentai ushanallami’ can nishpa (Salmo 40:5). Jehová Diosca paita na rijsijcunapash cushilla sintirichun munashpami paicunamanbash ‘carashpa cushichijun’ (Hechos 14:17).

Jehová Dios ñucanchicunata cushilla sintichingapaj munashcamandami ñucanchicunapash paita cushilla sintichingapaj munana canchi (Proverbios 27:11). Shinapash ¿imashinata Taita Diostaca cushichishun? Bibliapica ninmi: ‘Caishujman chaishujman imagutapash carashpa aliguta ruranataca na cunganachu canguichi. Shina rurajpimi Taita Diosca cushijun’ (Hebreos 13:16). Shinaca Jehová Diosta cushichingapaca ¿shuj gentecunata ayudashpa imagutapash carashpallachu quedana canchi?

Na. Bibliapica ninmi: ‘Crishpallami Taita Diostaca cushichinchi’ nishpa (Hebreos 11:6). Abrahanbash Taita Diospi crimandami ‘paipa cumbagu’ o paipa ali rijsi tucurca (Santiago 2:23). Jesuspash yachachircami, Taita Dios bendiciachun munashpaca paipi crinami canguichi nishpa (Juan 14:1). Shinaca Taita Diospi cringapaca ¿imatata rurana capangui? Pundapica Bibliatami yachajuna capangui. Shinami pai imata mandajushcata yachajushpa paita cushichi ushangui. Taita Diosta ashtahuan ali rijsingapaj esforzarishpa, cazushpaca paipi ashtahuan crishpami paiman ashtahuan quimiri ushangui (Colosenses 1:9, 10).