Taita Diosca ¿quiquin imashina sintirijta intindinllu?

¿IMASHINA RURASHCATA CAPANCHI?

Gemelocunapia pensaripashunchi. Paicunaca alimi intindirin. Gemelocunata estudiaj Nancy Segal shuti directoraca, paipash shuj gemela ñañata charimandami nin, huaquin gemelocunaca na imacunatapash nishpallatami chaishuj gemelo imata sintijtaca ali intindin nishpa. Shuj huarmigupash gemela ñañata charimandami nin: “Ñucanchica alipachami rijsirinchi” nishpa.

¿Imamandata gemelocunaca shina can? Gentecunaca chai llactapillata viñaimanda, o chai taitamamacunatallata charimandami huaquinbica ashata igual canchi. Shinapash huaquin estudiashcacuna nishca shinaca, chaipura ADNtallatab charimandami gemelocunaca alipacha intindirin.

PENSARIPAI: Gentecunaman ADN nishcata churaimandaca ¿nachu Taita Diosca alipacha ñucanchitaca intindi ushan? Ari. Chaimandami rey Davidca nishcanga: ‘Ñuca mamapa vijsapipash, canmi viñachihuashcangui. Pacallapi viñajushpapash, canba ñaupajpica na pacalla cai usharcanichu. Muyushna chaira viñai callarijujpipash, canga ricujushcanguimi. Tucui chaicunataca, canba libropimi escribircangui’ nishpa (Salmo 139:13, 15, 16). Taita Diosllami ñucanchi ADN imashina cajta, imamanda ñucanchicuna imashina cajtapash ali yachan. Taita Dioslla ñucanchita ali intindinataca seguromi caita ushapanchi.

BIBLIAPICA YACHACHINMI TAITA DIOS ÑUCANCHITA ALIMI INTINDIN NISHPA

Rey Davidca cashna nishpami mañarca: ‘Mandaj Dioslla, ñuca imashina cajta ricushpami, tucuita rijsihuashcangui. Ñuca tiarijtapash jatarijtapashmi ricuhuashcangui. Ñuca imatalla yarijujtacarin, carumandallatami yachashcangui. Ricui Mandaj Dioslla, ñuca imatapash nara rimajpillatami, ña tucuita yachangui’ nishpa (Salmo 139:1, 2, 4). Jehová Diosca ñucanchi imashina sintirijujtapash, imacunata munajujtapash alipachami yachan (1 Crónicas 28:9; 1 Samuel 16:6, 7). Shinaca ¿imatata Taita Diosmandaca yachajuita ushapanchi?

Imata pensashcata, imashina sintirishcata na nita ushashpa mañajujpipash, ñucanchita ruraj Taita Diosca ñami tucuita yachan. Paica ñucanchi imata rurajujtaca alimi yachan. Imamanda rurajujtapash intindinmi. Ashtahuangarin, imapash cambiajpi ñucanchicuna imata ruranatapash, alimi yachaita ushan. Shinaca, juyana munaita ñucanchi shungupi churashcamandami, ñucanchicuna imata pensanajujta, imata ruranajujta Jehová Diosca yachangapaj munan (1 Juan 4:7-10).

Bibliapica ninmi:

• “Jatun Diosca, [alita] rurajcunatami ricuriajun. Paicuna mañanajujtapash, aligutapachami uyariajun” nishpa (1 PEDRO 3:12).

• Taita Diosca nishcami: “Ñucami canda yachachishpa, can purina ñandapash ricuchisha. Candami, ñuca ñavihuanga ricuriasha” nishpa (SALMO 32:8).

TAITA DIOSCA NINANDAMI LLAQUIN

Taita Dios ñucanchita intindijta yachanaca ¿llaquicunata aguantachun ayudanllu? Nigeria llactamanda Annaca ninmi: “Ninanda preocuparishpami huañungapaj munarcani. Ñuca cusapash huañurcami, ñuca ushigupash paipa umagupi yacu jundajujpimi hospitalpi carca. Chai jahuami ñucapash cancerta charimanda operarina carcani, quimioterapia, radioterapia nishcatapash rurana carcani. Ñuca ushigundi hospitalpi canaca, shinllipachami carca” nin.

¿Imashinata Annaca chai llaquicunata aguantai usharca? Paica ninmi: “Filipenses 4:6, 7​pipash, shuj textocunapipash pensarinatami gushtan carcani. Filipensespica ninmi: ‘[Taita Dios caramushca pipash na yachai ushanalla,] casilla ali causaimi cangunapaj shungutapash, yuyaicunatapash huacaichijunga’ nishpa. Taita Dios alipacha intindihuajta yarishpami paiman ashtahuan quimirin carcani. Ñuca turiñañacunapash ashtacatami animahuarca.

”Cunangaman ungushca cashpapash, Jehová Dios siempre ayudajushcata intindishpami ali sintiripashcanchi. Santiago 5:11​pica ninmi: ‘Llaquita apajcuna ninanda cushijuichi. Job runagu [aguantashcataca] uyashcanguichimi. Jatun Diosca ninandami llaquishpa, juyan’” nishpa. Llaquicunapi cajpica, Jobtashna Jehová Dios intindinataca seguromi caita ushapanchi.