CALLARI TEMA | ¿TAITA DIOSCA QUIQUINDA YARINLLU?
Taita Diosca quiquinda intindinmi
‘Mandaj Dioslla, ñuca imashina cajta ricushpami, tucuita rijsihuashcangui.’ (SALMO 139:1)
Vijsa ucupi ‘muyushna viñai callarijujpica ricujuhuarcanguimi’. (SALMO 139:16)
¿IMATATA GENTECUNACA NIN? Ashtaca gentecunaca yanmi, gentecunaca juchasapami canchi, Taita Diosca na ñucanchita yarinllu nishpa. Estados Unidosmanda Kendra shuti huarmiguca depresión ungüitami charirca. Paica ninmi: “Taita Diospa mandashcata na ali pactachijunichu yashpami Taita Diosta mañanata saquircani” nishpa.
¿IMATATA BIBLIACA YACHACHIN? Jehová Diosca ñucanchicuna juchayu nacirishcata, imashina cajtaca alimi rijsin, ñutu alpa cajtapash alimi yarin. Chaimandami arripintirijpi llaquichinapa randica juyaihuan perdonan (Salmo 103:10, 14).
Rey Davidta cutin yaripashun. Paica Taita Diostaca nircami, mamapa vijsa ucupi ‘muyushna viñai callarijujpica canmi ricujurcangui. Tucui chaicunaca, canba libropimi escribishca carca. Taita Dioslla, ñuca shungu imashina cajta ricushpa rijsihuayari’ nishpa (Salmo 139:16, 23). Rey Davidca alimi yacharca, jatun juchacunata rurajpipash tucui shunguhuan arripintirijpica Taita Dios llaquishpa perdonanata.
Jehová Diosca ñucanchicunataca alimi intindin. Bibliapica ninmi: ‘Runaca paipa ñavipi ricurishcatallami ricun. Ashtahuangarin Mandaj Diosca shungutami ricun’ nishpa (1 Samuel 16:7). Jehová Diosca gentecuna mamapa vijsa ucupi imashina formarishcata, imashina gentecunahuan viñashcata, imashina cajtaca tucuitami ali yachan. Pandarishpapash alita rurangapaj esforzarijujta ricushpaca alicachishpami ricun.
Taita Dios ñucanchita ali rijsishpaca ¿imashinata Taita Diosca cushichin?