Taita Diospa Gobiernopi causaj gentecunaca shujllashnami, tranquilo ali causanajurca.

¿Imamandata Taita Diospa Gobierno mandachun minishtinchi?

Cai mundopi gentecuna tiai callarishcamandapachami shujlla mandaj tiashca. Paica ñucanchita ruraj Jehováa Diosmi can. Paimi ñucanchitaca juyaihuan mandajurca. Chaimi gentecuna causachun shuj juyailla pushtuguta Edén nishca pushtupi rurarca. Chaipica ashtaca micunami tiarca. Shinallata Taita Diosca shuj ali trabajotami paicunamanga curca (Génesis 1:28, 29; 2:8, 15). Taita Dios ñucanchita mandashpa catichun saquijpica tucui gentecunami cushilla, tranquilo causanajunchiman carca.

Eva huarmi Adanman na micuna quirumanda frutata cushcatami ricuchin — Punda jari, punda huarmipash Taita Dios paicunata mandachunga na munarcachu.

Bibliapica shuj nali angelmi, Taita Diosca mandana derechotaca na charinllu nishcata nin. Chai nali angelca Diablomi can. Taita Dios gentecunata na mandajpica gentecunaca ashtahuan cushillami causaita ushan nishpami Diabloca nirca. Shinapash punda taitacuna, Adán y Evapash Taita Diospa mandashcacunata ladoman saquishpami Diablota cazurca (Génesis 3:1-6; Apocalipsis 12:9).

Adán y Eva Jehová Diosta na cazushcamanda, shinallata Jehová Dioslla mandana derechota charishcata na respetashcamandami shuj juyailla paraíso alpagupi, sano, ungüicunapash illaj para siempre causana bendiciondaca chingachirca (Génesis 3:17-19). Chaimi paicunapa miraicunapash llaquicunahuan causana tucurca. Bibliapica Adán runamandami juchaca tiai callarirca ninmi. Chaimi cashna nin: “Juchata ruranaca, shujlla runamandami cai pachapica callarirca. Chai juchamandami, huañuipash callarirca” nishpa (Romanos 5:12). Shinallata juchata rurashcamandami: “Runaca, paipaj llaquipajllata caishuj runata llaquichishpa charina punllami chayan” nin (Eclesiastés 8:9). Shinaca chaimandami problemacunaca siempre tian.

GENTECUNA MANDAI CALLARIN

Nemrod jarica jariyashca cajtami ricuchin. Nemrod jaripa huasha ladopica huasichinajujta ricuchin — Nemrod jarica Jehová Diospa contrami tucurca.

Bibliaca mandajpuracunamandaca Nemrod jarimi gentecunataca pundapi mandai callarirca ninmi. Shinallata Nemrod jarica, Taita Diosca mandana derechotaca na charinllu nishpami nirca. Chaimandami cunanbi ashtaca mandajcunaca paicuna munashcashna mandai callarishca. Chaita ricushpami rey Salomonga casi tres mil huatacuna huashamanga cashna nirca: “Ricuichi, llaquita apajcuna huacanajujpi cushichingapaca, pipash na tianllu. Ushaitapash, paicunata llaquichijcunallami charirca. Paicunata cushichij runaca, na tiarcachu” nishpa (Eclesiastés 4:1).

Cunanbipash nali mandajcuna mandajpimi causanchi. 2009 huatapica Organización de las Naciones Unidasca gentecuna cashna yuyajtami nirca, nali gobiernocuna tiaimandami “ashtaca llaquicuna tian” nishpa.

TAITA DIOSPA GOBIERNO MANDAI CALLARIN

Gentecuna ashtaca huatacunata mandajpipash llaquicunallami tiashca. Chaimandami Taita Dios gentecunata mandachun minishtishcata cuenta japipanchi. Taita Diosca imata pai ruranatami ñucanchimanga villashca.

Cai dibujocunapica ricuchin: 1) Asia llactamanda huarmigumi paipa huahuahuan callepi tiarishca llaquinaita huacanajun; 2) Shuj mayorlla jarimi hospitalpi irquilla cajta ricuchin; 3)Huaquin soldadocunaca shuj guerrapi cajtami ricuchin; 4)Huaquin gentecuna tandanajushca cartelcunata aparishcami ninanda culirashca cashcata ricuchin; 5)Shuj huarmigu paipa ushihuan huasiman chayanajujpi pungupa espejo ña faquirishca cashcata ricuchin; 6)Shuj llactapi huaquin chimeneas industriales nishcacuna shuj cablecunapash tianajun — Ali gobierno nij tucushcacunapashmi cai mundopi tiashca problemacunataca na tucuchi ushashca.

Taita Diosca cai mundopi tiashca tucui gobiernocunata tucuchinatami nishca. Chaimi paipa gobierno ‘causaita causaicaman mandajunga’ (Daniel 2:44). Ashtaca millón gentecunaca Taita Diospa Gobierno mandachun nishpami padrenuestro oracionbica mañanajushca (Mateo 6:9, 10). Shinapash chai Gobiernopica Taita Diosca na mandangachu. Chaipa randica punda tiempopi gentecunashna causashca shuj personatami mandachun churanga. Shinaca ¿pitata Taita Diosca mandachun agllashca?

a Bibliata escribishca shimicunapica, Diospa shuti Jehová cashcatami ricuchin.