Jesús ñucanchicunata salvashcamandaca ¿imatata yachajupanchi?

1. ¿Imamandata Jesús huañushca punllataca cada huata yarina capanchi?

JEHOVÁ DIOSCA paipa churita ñucanchimanda huañuchun cachamushpaca shuj valishca regalota carashcatami ricuchin (2 Cor. 9:15). Jesús paipa causaita ñucanchiman cushcamandami Jehová Dioshuan ali amigo caita ushapanchi. Shinallata para siempre causana oportunidadtapashmi charipanchi. Jehová Diosca ñucanchita ninanda juyaimandami paipa churipa causaita cushpa ñucanchitaca salvashca. Chaimandami paitaca ninanda agradicina capanchi (Rom. 5:8). Jesusca cada huata pai huañushca punllata yarichunmi mandarca. Shina rurashpaca paita agradicishcata ricuchinchi (Luc. 22:​19, 20).

2. Cai temapica ¿imatata yachajupashun?

² Cai huataca sábado 12 de abriltami Conmemoraciondaca charipashun. Conmemoración punlla nara chayajpillatami Jehová Dios y Jesús ñucanchicunamanda imatalla rurashcata pensaringapaj tiempota llujchinaa capanchi. Y chai tandanajuiman ringapaca tucuitami segurana capanchi. Cai temapica Jesús ñucanchita salvangapaj huañushcamanda Jehová Diospa y paipa cualidadcunamandami yachajupashun. Shinallata cati temapica Jesús huañushcamanda imashina agradecido cana cashcata y ñucanchi imashina beneficiari ushashcatami yachajupashun.

JESÚS ÑUCANCHITA SALVASHCAMANDACA ¿IMATATA JEHOVÁ DIOSMANDACA YACHAJUPANCHI?

3. ¿Imashinata ashtaca gentecunaca salvarita ushashca? (Dibujocunata ricupangui).

³ Jesús ñucanchita salvangapaj huañushpaca Jehová Dios justo cashcatami ricuchirca (Deut. 32:4). Adán runa Jehovata na cazushcamandami paipa miraicunaca pecadota y huañuitapash heredashca (Rom. 5:12). Chaimi Jehová Diosca huañuimanda y pecadomanda salvangapaca paipa churita cachamurca. Shinapash ¿imashinata Jesusca paipa causaita cushpalla ashtaca gentecunata salvaita ushana carca? Apóstol Pabloca: “Imashinami shujlla runa [o Adán] na cazushcamanda, ashtaca gentecunaca pecadorcuna tucurca, shinallatami shujlla runa [o Jesús] cazushcamandaca, ashtacacuna sin culpa justocuna Taita Diospa ñaupapica ricuringa” nircami (Rom. 5:19; 1 Tim. 2:6). Imashinami ricupanchi Adanmandami tucuicunallata pecadota y huañuitapash heredapashcanchi. Shinapash Jesusmandami pecadomanda y huañuimandapash salvarita ushapashcanchi.

4. ¿Imamandata Jehová Diosca Adanba miraicuna para siempre causashpa catichunga na saquita usharca?

⁴ Huaquingunaca Adanba miraicunataca cai alpapi para siempre causachun saquishpaca Jesús huañuchunga na minishtirinmanllu carca nishpami pensarita ushan. Pero Adán juchata rurashca cajpipash pai y paipa miraicunata cai alpapi causachun saquishpaca Jehová Dios justo Dios cashcataca na ricuchinmanllu carca. Chaimi Jehová Diosca Adanba ruraicunataca na yangapi saquita usharca.

5. Jehová Dios siempre alita ruranataca ¿imamandata seguro capanchi?

⁵ Jehová Adanba miraicunata causachun saquishpa y Jesusta ñucanchita salvangapaj na cachamushca cajpica ¿imata pasanman carca? Jehová Dios justo Dios cashcataca na ricuchinmanllu carca. Y gentecunapash Jehová Diosca paipa promesacunataca na pactachinllu nishpami talvez pensanman carca. Pero Jehovapa na fácil cajpipash paipa juyashca churiguta ñucanchimanda huañuchun cachamushpami justo Dios cashcata ricuchirca. Chaimandami Jehová Dios siempre alita ruraj Dios cashcataca seguro capanchi.

6. Jehová Dios ñucanchita juyashcataca ¿imashinata cuenta japipanchi? (1 Juan 4:​9, 10).

⁶ Jehová Dios paipa churita ñucanchita salvangapaj cachamushpaca ñucanchita ninanda juyashcatami ricuchin (Juan 3:16; 1 Juan 4:​9, 10​ta liipangui). Jehová Diosca para siempre causachun munaimanda y paipa familia cachun munaimandami paipa churita ñucanchimanda huañuchun cachamurca. Adán juchata rurashpaca Jehová Diospa familiamandami llujshirca. Ñucanchicunapash Adanba familiacuna caimandami Jehová Diospa familiamandaca caruyapashcanchi. Pero Jesús salvashcamandami Jehová Diospa familia y huauquipanicunapa amigopash caita ushapanchi. Jehovapa familia cangapaca paipi crina y paita cazunami capanchi. Jehová Dios ñucanchita ninanda juyashcatami cuenta japipanchi (Rom. 5:​10, 11).

7. Jesús huañushcapi pensarinaca ¿imashinata Jehová Dios ñucanchita juyashcata intindichun ayudan?

⁷ Jehová Dios ñucanchita salvangapaj imacunatalla rurashcapi pensarishpaca pai ñucanchita ninanda juyashcata cuenta japichunmi ayudanga. Diabloca Jehovata sirvijcunaca imapash llaquicuna ricurijpica Jehovata sirvinataca saquingallami nishca. Diablopa nishcacuna llulla cashcata ricuchingapami Jehová Diosca Jesús nara huañushpallata sufrichun saquirca (Job 2:​1-5; 1 Ped. 2:21). Jehová Diosca Jesuspa contracuna paimanda burlarijta, paita macajta, paita caspipi huarcushpa saquijtaca tucuitami ricujurca. Shinallata paipa juyashca churi huañujtapashmi ricujurca (Mat. 27:​28-31, 39). Jesuspa contracunaca “Taita Dios paita ayudangapaj munashpaca Taita Diosllata paitaca salvachun” ninajurcami. Shina ninajujpica Jehová Diosca Jesustaca chai ratomi salvaita ushanman carca (Mat. 27:​42, 43). Pero Jehová Dios Jesusta chai rato salvajpica gentecunaca shuj esperanzatallapash na charita ushanchimanllu carca. Chaimandami Jehová Diosca paipa churi sufrishpa huañuchun saquirca.

8. Jehová paipa churimanda ninanda llaquirishcataca ¿imashinata yachapanchi? (Dibujota ricupangui).

⁸ Jehová Dios paipa churita salvangapaj poderta charishpapash Jesús sufrijta ricushpaca ninandami llaquirirca. Jehová Diosca ñucanchicunata paiman rijchata rurashcamandami sentimientocunata charishcata cuenta japipanchi. Bibliapica huaquin gentecuna Jehová Diosta llaquichishcatami parlan (Sal. 78:​40, 41). Por ejemplo, Jehová Diosca Abrahanmanga paipa churi Isaacta shuj sacrificiotashna cuchun mañarca. Chaita rurachun mañajpi Abrahán imashina sintirishcapi pensaripashunchi (Gén. 22:​9-12; Heb. 11:​17-19). De seguromi Abrahanga paipa churita huañuchina horasca llaquilla sintirimanda imata ruranataca na atinashcanga. Y Jehová Diosca paipa churita macashpa huañungacaman huañuchijta ricushpaca imashina Jehová sintirishcataca na yachapanchichu. (jw.org paginapimi Diosta sirvijcunapa ejemplota catipashunchi: Abrahán, parte 2 nishca videota ricui ushapangui).

9. Romanos 8:​32, 38, 39​pi nishcashnaca Jehová Diospa juyaimandaca ¿imatata yachajupanchi?

⁹ Jehová Diosca paipa churita cachamushpami ñucanchi familiacunata, amigocunata yali juyashcata ricuchishca (Romanos 8:​32, 38, 39​ta liipangui). Jehová Diosca ñucanchitaca ninandami juyan. Chaimandami para siempre causachun y ñucanchi pecadocunapash perdonashca cachun munan. Jehová Diosta cazushpa, paipi shinlli feta charishpami Jesús huañushca regalotaca valichinajupanchi. Jehová Dios paipa churita ñucanchimanda huañuchun cachamushpami juyashcata ricuchishca. Paraíso alpagupica Jehová Diospa juyaimandaca ashtahuanmi yachajupashun (Ecl. 3:11).

JESÚS ÑUCANCHITA SALVASHCAMANDACA ¿IMATATA JESUSMANDA YACHAJUPANCHI?

10. a) Jesusca ¿imamandata preocupado carca? b) Jesusca ¿imashinata Jehová Diospa shutitaca jatunyachirca? (“Jesusca tucuipi cazushpami Jehová Diospa shutita jatunyachirca” nishca recuadrotapash ricupangui).

¹⁰ Jesuspaca Jehová Diospa shutita jatunyachinaca importantemi can (Juan 14:31). Jesusca shuj shuatashna caspipi huarcushpa huañuchigrijujta yachashpaca paipa Taitapa shutimanda gentecuna nali parlanga yashpami preocupado carca. Chaimandami Jesusca: “Ñuca Taitalla, cai copata ñucamanda anchuchinalla cajpica, anchuchipayari” nircami (Mat. 26:39). Jesusca huañungacaman cazushpaca Jehová Diospa shutitami jatunyachirca.

11. Jesusca ¿imata rurashpata gentecunata juyashcataca ricuchirca? (Juan 13:1).

¹¹ Jesús gentecunamanda y paipa sirvijcunamanda huañushcata yachashpaca shujcunamanda ninanda preocuparij cashcatami ricupanchi (Prov. 8:31; Juan 13:1​ta liipangui). Jesús cai alpapi cashpaca llaquicunata charinataca alimi yacharca. Jesusca Jehová Diospa voluntadta pactachinamandallaca na pactachircachu. Ashtahuangarin predicashpa, yachachishpa y gentecunata ayudashpaca juyaimandami rurarca. Jesusca paipa huañuna punllapica paipa apostolcunata sirvingapaj, animangapaj, yachachingapami tiempota llujchirca (Juan 13:​12-15). Jesusca paipa ladopi shua runagumanga ñucahuanmi paraisopi cangui nirca. Shinallata Juanmanga paipa mama Mariata cuidachunmi mingarca (Luc. 23:​42, 43; Juan 19:​26, 27). Jesusca tucui gentecunaman villachishpa y paipa causaita cushpaca gentecunata juyashcatami ricuchirca.

12. Jesusca ¿imata rurashpata catijushca?

¹² Jesusca “shuj viajetalla” huañushpapash ashtaca cosascunatami ñucanchimanda rurashpa catijushca (Rom. 6:10). Por ejemplo, cunanbica Jesusca Rey y Sumo Sacerdotemi can. Shinallata congregacionda ñaupaman pushajun (1 Cor. 15:25; Efes. 5:23; Heb. 2:17). Jesusca Ninan Manllanai Llaqui Tiempo nara chayajpillata ungidocunata y na cuentai ushana ashtaca gentecunata tandachina responsabilidadtami charin (Mat. 25:32; Mar. 13:27).b Shinallata cai último punllacunapica paipa sirvijcuna espiritualmente shinlli cachunmi ricuriajun (Mat. 24:45). Jesusca mil huatacunata mandajushpapashmi ñucanchitaca ayudanga. Imashinami ricupashcanchi Jehová Diosca paipa churitaca ñucanchimanda huañuchunllaca na cachamushcachu. Ashtahuangarin ashtaca cosascunata ñucanchimanda rurachunbashmi cachamushca.

YACHAJUSHPA CATIPASHUNCHI

13. Evangeliocunata liishpaca ¿imatata rurana capanchi?

¹³ Cai huatapa Conmemoracionbica, Evangelio librocunatami liita ushapanchi. Chaita ruranami Jehovapa y Jesuspa juyaimanda ashtahuan yachajuchun ayudanga. Evangelio librocunata liijushpaca tucui capitulocunata chai rato liishpa tucuchinapa randica imata liishcapi pensaringapami tiempota llujchina capanchi. Shinami Jehovata y Jesustaca ashtahuan juyapashun. Quiquin yachajushcataca shujcunamanbashmi parlaita ushapangui.

14. Salmo 119:97​pi nishcashnaca, ashtahuan yachajushpa catingapaca ¿imatata rurana capanchi? (Fotota ricupangui).

¹⁴ Ashtaca huatacunata Jehová Diosta sirvijushpapash Jehová Diospa justiciamanda, paipa juyaimanda, Jesús huañushpa salvashcamanda y shuj cosascunamandapashmi yachajushpa catita ushapanchi. Ashtahuan yachajushpa catingapaca ñucanchi publicaciongunapimi ashtahuan informaciongunata mascaita ushapanchi. Bibliapa shuj textota na intindishpaca chai textopa informaciongunatami mascaita ushapanchi. Informacionda mascashca jipaca imata yachajushcapi pensaringapaj, shinallata Jehová y Jesús ñucanchita juyashcapi pensaringapami tiempota llujchina capanchi (Salmo 119:97​ta liipangui).

15. Bibliata liijushpaca ¿imamandata mushuj yuyaicunata yachajungapaj esforzarina capanchi?

¹⁵ Bibliata liijushpa o estudiajushpaca mushuj yuyaicunata yachajungapami esforzarina capanchi. Bibliata estudianaca orota mascanshnami can. Ashtaca gentecunaca oro ninan valishca cajpimi ashtaca horascunata o tauca punllacunata pacienciahuan taringacaman mascashpa yalin. Bibliapa yuyaicunaca orotapash yali ashtahuan valishcami can (Sal. 119:127; Prov. 8:10). Chaimandami Bibliata liinata, estudianataca na saquinachu capanchi (Sal. 1:2).

16. Jehová y Jesuspa ejemplotaca ¿imashinata catita ushapanchi?

¹⁶ Estudiajushpaca quiquinba causaipi yachajushcata imashina pactachi ushashcapi pensaringapami esforzarina capangui. Por ejemplo, shujcunata igual tratashpami Jehová Dioshna cashcata ricuchita ushapangui. Shinallata Jehová Diospa shutita jatunyachishpa, huauquipanicunata ayudashpa y gentecunaman predicashpami Jesuspa ejemplota catijushcata ricuchipanchi.

17. Cati temapica ¿imatata yachajupashun?

¹⁷ Jesús ñucanchita salvangapaj huañushcata ashtahuan intindishpa y valorashpaca Jehovata y Jesustami ashtahuan juyapashun. Paicunata ashtahuan juyajpica paicunapashmi ñucanchita ashtahuan juyanga (Juan 14:21; Sant. 4:8). Chaimandami Jesús huañushcamanda tiashca informaciongunata yachajungapaj aprovechana capanchi. Cati temapica Jesús ñucanchita salvangapaj huañushcamanda imashina beneficiari ushashcata shinallata Jehová Diosta agradicishcata ricuchingapaj imacunatalla rurai ushashcatami yachajupashun.