Jehová Dios quiquinda juyashcataca seguromi cana capangui

1. ¿Imamandata Jehová Diostallami sirvisha nishpa prometiparcangui? (Fotocunatapash ricupangui).

QUIQUINGA Jehová Diosta rijsishpa juyaimandami, Jehová Diostallami sirvisha nishpa prometipariangui. Chai promesata rurashpaca, Jehová Diostaca quiquinba voluntadtami en primer lugar churasha, quiquindallami tucui shunguhuan, tucui causaihuan, tucui yuyaihuan y tucui ushaihuan juyasha nishpami prometipariangui (Mar. 12:30). Chai promesata rurashca punllamandaca, de seguromi Jehová Diostaca ashtahuan juyapangui. Chaimandami “Jehová Diosta juyanguichu” nishpa pipash tapujpica “ari, Jehová Diostaca tucui shunguhuanmi juyani” nishpa contestapanguiman.

2, 3. a) Jehová Diosca ¿imata quiquin seguro cachunda munan? (Jeremías 31:3). b) Cai temapica ¿imatata yachajupashun?

² Shinapash “Jehová Dios quiquinda juyashcataca segurochu cangui” nishpa pipash tapujpica ¿imatata contestapanguiman? Jehová Diospa juyaitaca na miricinichu yashpa pensaimandami, Jehová Diosca juyahuanmi nishpa contestaitaca talvez na ushapanguiman. Shuj paniguca paita taitamama na juyajpimi viñarca. Paica ninmi: “Ñucaca Jehová Diostaca ninandami juyapani. Pero Jehová Dios ñucata juyajtaca na segura capanichu” ninmi. Jehová Dios quiquinda ciertopacha juyajtaca ¿imashinata yachaita ushapangui?

³ Jehová Diosca pai quiquinda ninanda juyashcata seguro cachunmi munan (Jeremías 31:3​ta, TNM-Sa liipangui). Jehová Diosca paipa amigo cachun munashpami quiquindaca paipaman apamurca. Shinallata, candallami sirvisha nishpa prometijpi y bautizarijpica, Jehová Diosca quiquinda juyashcata o amor lealta charishcatami quiquinmanga ricuchirca. Amor lealta charimandami Jehová Diosca paipa tucuilla sirvijcunata y quiquindapash tucui shunguhuan y para siempre na saquishpa juyan. Quiquinda chashna juyashcamandami Jehová Diospaca ‘valishcapacha’ capangui (Mal. 3:17). Jehová Diosca quiquinda pai juyashcata dudachunga na munanllu. Sino apóstol Pabloshna seguro cachunmi munan. Apóstol Pabloca Jehová Dios paita juyashcata seguro caimandami cashna nishpa escribirca: ‘Ñucaca Taita Dios ñucata juyajtaca seguromi capani. Ni huañui, ni causai, ni angelcuna, ni gobiernocuna, ni cunanbi tiashca cosascuna, ni jipaman tiana cosascuna, ni ima podercuna, ni alipi canapash, ni nalipi canapash, ni Taita Diospa ima shuj rurashcacunapash paipa juyaimandaca na separaita ushangachu’ nircami (Rom. 8:​38, 39). Cai temapica Jehová Dios ñucanchita juyashcata seguro cana imamanda importante cashcatami yachajupashun. Shinallata Jehová Dios ñucanchita juyashcata ashtahuan seguro cangapaj imata rurana cashcatapashmi yachajupashun.

JEHOVÁ ÑUCANCHITA JUYASHCATA SEGURO CANACA ¿IMAMANDATA IMPORTANTE CAN?

4. a) Diabloca ¿imata crichingapata munan? b) Diablopa trampacunapi ama urmangapaca ¿imatata rurana capanchi?

⁴ Jehová Dios ñucanchita juyajta seguro cashpaca ‘Diablopa trampacunapica na urmashunllu’ (Efes. 6:11). Diabloca ñucanchicuna Jehová Diosta sirvinata saquichunmi munan. Chaimandami paica ashtaca trampacunata utilizan. Paica Jehová Dios ñucanchita na juyashcata crichingapami munan. Pero Diabloca llullajunmi. Bibliapica Diablotaca shuj leonhuanmi comparan (1 Ped. 5:​8, 9). Leongunaca difindirinata na ushaj animalcunata ricushpami atacan. Shina cuendallatami Diablopash ñucanchicuna desanimado y fuerza illa cajta ricushpa atacan. Huaquinbica punda rurashcacunamanda, cunanbi problemacunamanda y shamuj punllacunapi ima pasanata na yachaimandami desanimado y fuerza illa sintiripanchi. Shina cajta ricushpami Diabloca ñucanchitaca atacan (Prov. 24:10). Diabloca ñucanchicunata desanimachishpa Jehová Diosta sirvinata saquichunmi munan. Pero Diablopa trampacunapi ama urmangapaca, Diablopa contra shayarishpami Jehová Dios ñucanchita juyashcata seguro cangapaj esforzarina capanchi (Sant. 4:7).

5. Jehová Dios ñucanchita juyashcata o valorashcataca ¿imamandata seguro cana capanchi?

⁵ Jehová Dios ñucanchita juyashcata seguro cashpaca, ashtahuanmi paipaman quimirishun. ¿Imamandata shina nipanchi? Jehová Dios ñucanchicunata rurashpaca shujcunata juyana necesidadhuan y shujcunapash ñucanchita juyachun munaihuanmi rurashca. Shujcuna ñucanchita juyajpica, ñucanchipashmi juyanchi. Shinaca Jehová Dios ñucanchita juyashcata o valorashcata ashtahuan seguro cashpaca, ñucanchipashmi paitaca ashtahuan juyapashun (1 Juan 4:19). Y si ñucanchi paita ashtahuan juyanchica, paipashmi ñucanchitaca ashtahuan juyanga. Chaimandami Bibliapica “Taita Diosmanmi quimirina capanguichi. Chaimi paipash quiquingunapamanga quimiringa” nin (Sant. 4:8). Cunanga, cada unota Jehová Dios juyashcata seguro cangapaj imata rurana cashcatami ricupashun.

JEHOVÁ DIOS QUIQUINDA JUYASHCATA SEGURO CANGAPACA ¿IMATA RURANA CAPANGUI?

6. Jehová Dios quiquinda juyashcata intindingapaca ¿imatata ruraita ushapangui?

⁶ Jehová Diostaca quiquinda imamanda juyashcata intindichichunmi cutin cutin mañana capangui (Luc. 18:1; Rom. 12:12). Jehová Dios quiquinda juyashcata intindingapami, paitaca punllapi tauca viajecunata mañaita ushapangui. Jehová Dios quiquinda juyajta dudajushpaca, Jehová Dios quiquinba shungutapash ashtahuan yali cashcatami yarina capangui (1 Juan 3:​19, 20). Jehová Diosca quiquindaca alimi rijsin. Ali cualidadcunata charishcata quiquinllata na cuenta japijpipash, Jehová Diosca quiquin ali cualidadcunata charijtaca alimi yachan (1 Sam 16:7; 2 Crón. 6:30). Chaimandami quiquin imashina sintirishcata villana capangui y ñucata juyashcata seguro cangapaj ayudahuai nishpa Jehová Diostaca mañana capangui (Sal. 62:8). Y mañashca jipaca, cai cosascunatami rurai ushapangui.

7, 8. Jehová Dios ñucanchita juyashcata seguro cachunga ¿imashinata caipi ricushca Salmocunaca ayudan?

⁷ Jehová Dios Bibliapi imata nijujtami crina capangui. Jehová Diosca pai imashina cashcata Bibliapi escribichunmi, huaquin jaricunamanga paipa espíritu santota curca. Por ejemplo, Salmo 34:18​pica cai juyailla shimicunatami Davidca nirca: ‘Mandaj Diosca, shungupi ninanda llaquirishpa causajcunapa ladopimi can’. Paicunataca ‘quishpichinmi’ ninmi. Shungupi ninanda llaquirijushpaca “pipash na intindihuanllu, pipash na ayudaita ushahuanllu” nishpami pensaita ushanchiman. Pero Jehová Diosca, shina sintirijuj ratocunapica ayudashami nishpami prometin. Salmo 56:8​pipash Davidca ‘ñuca viquitaca, cara muchilapi tandachishpa charipangui’ nishpami Jehová Diostaca mañarca. Punda tiempopi viajerocunaca, cara muchilapi churashca shuj gota yacugutapash ninandami valichin carca. Shina cuendallatami quiquinba viquicunatapash Jehová Diosca ninanda valichin. Quiquin huacashca viquicunataca tucuillatami Jehová Diosca yaipi charin. Davidca Jehová Diostaca Salmo 139:3​pica ‘ñuca imashna causajujtaca tucuitami rijsipangui’ nircami. Shinaca Jehová Diosca quiquin imacunatalla rurajujta ali yachashpapash, quiquinba ali ruraicunapimi ashtahuanga concentrarin (Heb. 6:10). Jehová Diosca paita cushichingapaj munashpa esforzarijujta ricushpami, ñucanchipa ali ruraicunataca valichin.b

⁸ Chai textocunapi ricushcashnaca, Jehová Diosca “candaca juyanimi, canmandaca preocuparinimi” nijunmi. Shinapash imashinami ña ricuparcanchi, Diabloca Jehová Dios quiquinda na juyashcata crichingapami munan. Chaimandami Jehová Dios quiquinda juyajta dudajushpaca, ‘llullapa taita’ Diablotachu crigrini o ‘na llullaj Taita Diostachu’ crigrini nishpa pensarina capangui (Juan 8:44; Sal. 31:5).

9. Paita juyajcunamanga ¿imatata Jehová Diosca prometishca? (Éxodo 20:6).

⁹ Paita juyajcunata Jehová Dios juyajtami pensarina capangui. Por ejemplo, israelitacunaman y Moisesman Jehová Dios imata nishcata pensaripai (Éxodo 20:6​ta liipangui). Jehová Diosca, ñucata juyajcunataca juyashpami catisha nishpami prometishca. Jehová Diosca nunca na jichushpa saquij Taita Diosmi can. Chaimandami paita juyajcunataca siempre juyashpa catinga (Neh. 1:5). Shinaca Jehová Dios quiquinda juyajta dudajushpaca, “¿ñucaca Jehová Diosta juyanichu?” nishpami pensarina capangui. Si quiquin Jehová Diosta cushichingapaj esforzaringui y paita juyanguica, Jehová Dios quiquinda juyajtaca na dudanachu capangui (Dan. 9:4; 1 Cor. 8:3). Quiquin Jehová Diosta juyashcata seguro cashpaca, Jehová Dios quiquinda juyashcata y quiquinda nunca na saquinatapash seguromi cana capangui.

10, 11. Gálatas 2:20​pi nishcashnaca ¿ñucanchicuna imata seguro cachunda Jehová Diosca munan?

¹⁰ Jesús quiquinmanda huañushcapimi pensarina capangui. Jehová Diosca paipa Churipa causaita cushpami, gentecunamanga shuj valishca regalotashna carashca (Juan 3:16). Jehová Diosca quiquinmanbashmi chai regalotaca carashca. Apóstol Pablopa ejemplopi pensaripashunchi. Nara cristiano tucushpaca paica ashtaca nali cosascunatami rurarca. Y jipamanbash paipa nali munaicunata controlangapami apóstol Pabloca esforzarirca (Rom. 7:​24, 25; 1 Tim. 1:​12-14). Shinapash apóstol Pabloca, Jesús paimanda huañushcataca seguromi carca (Gálatas 2:20​ta liipangui). Quiquinbash Jesús quiquinmanda huañushcata seguro cachunmi, Jehová Diosca paipa espíritu santota utilizashpa Pablotaca chai shimicunata escribichirca (Rom. 15:4). Jehová Dios paipa Churipa causaita shuj valishca regalotashna quiquinman cushcata seguro cashpaca, Jehová Dios quiquinda juyashcataca ashtahuan seguromi capangui.

¹¹ Ñucanchimanda huañuchun Jesusta cai alpaman cachamushcamandaca, Jehová Diostaca tucui shunguhuanmi agradicipanchi. Shinapash Jesusca na solo paipa causaita cungapallachu cai alpamanga shamurca. Sino Jehová Diosmanda cabalta yachachingapaj y Jehová Dios ñucanchicunata juyashcata yachachingapami cai alpamanga shamurca (Juan 18:37).

JEHOVÁ DIOS QUIQUINDA JUYASHCATAMI JESUSCA YACHACHIRCA

12. Jehová Diosmanda Jesús cabalta yachachishcataca ¿imamandata seguro caita ushapanchi?

¹² Jesús cai alpapi cashpaca, Jehová Diosmanda yachachinataca ninandami gushtarca (Luc. 10:22). Jehová Diosmanda Jesús cabalta yachachishcataca seguromi caita ushapanchi. ¿Imamandata seguro caita ushapanchi? Jesusca ashtaca millón huatacunatami paipa Taitahuan jahua cielopi causarca (Col. 1:15). Chaimandami Jesusca paipa Taitataca ali ali rijsin. Jehová Dios angelcunata y cai alpapi paipa sirvijcunata tucui shungu juyajtaca Jesusca paipa ñavihuanbachami ricurca. Jehová Dios ñucanchita juyashcata seguro cachunga ¿imashinata Jesusca ayudan?

13. Jesusca Jehová Diosta ¿imashina ricuchunda munan?

¹³ Jesusca ñucanchicunapash Jehová Diosta shuj juyaj Taitatashna ricuchunmi munan. Evangelio librocunapica, más de 160 viajecunatami Jehová Diostaca “Taita” nirca. Jesusca paipa discipulocunahuan parlashpaca, Jehová Diosca ‘cangunapa Taitami’ can y ‘jahua cielopi cangunapa Taitami’ can ninmi carca (Mat. 5:16; 6:26). Español Biblia de estudiopi Mateo 5:16​pica ninmi: ‘Punda tiempopi Jehová Diosta sirvijcunaca, Jehová Diostaca “Tucui Ushaita Charij Taita Dios”, “Jahua Pachapi Causajuj Dios” y “Tucuita Ruraj Dios” nishpami parlan carca. Shinapash Jesusca Jehová Diostaca cutin cutinmi “Taita” nin carca’ nin. Shinallata ‘Jehová Diosca, paipa sirvijcuna paita shuj juyaj taitatashna ricuchun munaimandami paitaca Taita nichun munan carca’ nin. Cunanga ishcai ejemplocunata ricupashun.

14. Cada uno Jehová Diospa valishca cashcataca ¿imashinata Jesusca ricuchirca? (Mateo 10:​29-31; dibujotapash ricupangui).

¹⁴ Primeroca, Mateo 10:​29-31​pi Jesús imata nishcata ricupashun (chai textocunata liipangui). Chai textocunapica, Jehová Diosca uchilla pajarogucuna alpapi tiarijtapashmi ali yachan ninmi. Jehová Diosca paita na adoraj, paita na juyaj uchilla animalgucunamandapashmi preocuparin. Shinaca ¿nachu Jehová Diosca paita juyashpa sirvij gentecunamandacarin cada unomanda ashtahuan preocuparinga? Jesusca verso 30​pipash Jehová Diosca “cangunapa umapi mashna ajcha tiajtapashmi alipacha yachan” nircami. Jehová Diosca ñucanchimandaca hasta uchilla cosasgucunatapashmi yachan. Shinaca Jehová Dios cada unomanda preocuparijtaca seguromi caita ushapanchi. Jesusca, cada uno Jehová Diospa valishcapacha cashcata seguro cachunmi munarca.

15. Juan 6:44​pica ¿imatata Jehová Diosmandaca yachajuita ushapanchi?

¹⁵ Shinallata, Jesusca Juan 6:44​pipashmi Jehová Diostaca “Taita” nirca (chai textota liipangui). Imashinami cai textopi ricupanchi, Jehová Diosmi quiquindaca paita rijsichun y paita juyachun ayudarca. Quiquinba shungu ali cajta ricushpami Jehová Diosca ayudarca (Hech. 13:48). Juan 6:44​pi shimicunata nishpaca, Jesusca Jeremías 31:3​pi shimicunata yuyarishpami nishcanga. Chaipica Jehová Diosca paipa llactataca ‘candaca ñuca juyaihuanmi [o amor lealhuanmi] ñucapaman apamurcani’ nircami (Jer. 31:3; Oseas 11:4​huan comparashpa ricupangui). Pero ¿imamandata Jehová Diospa juyaica lealmi can nin? Ñucanchicuna ali cualidadcunata charishcata na cuenta japijpipash, ñucanchi juyashca Taita Jehová Diosca siempremi ñucanchipica ali cualidadcunata ricushca y ricushpa catijun. Chaimandami Jehová Diospa juyaica lealmi can nin.

16. a) ¿Imatata Jesusca yachachirca? b) ¿Imamandata Jesusta crina capanchi? c) Jehová Dios ñucanchi minishtijuj Taita cashcata seguro cangapaca ¿imatata rurana capanchi? (“Jehovami ñucanchi minishtijuj Taita can” nishca recuadrota ricupangui).

¹⁶ Shinaca Jesusca ¿imatata chai textocunahuanga yachachijurca? Jesusca “Jehová Diosca na ñuca Taitallachu can, sino canba Taitapashmi can” nishpami yachachijurca. Shinallata “Jehová Dios canda juyashcata y canmanda preocuparishcataca seguromi cana cangui” nishpapashmi yachachijurca. Shinaca Jehová Dios quiquinda juyajta dudajushpaca Jesús imata nishcata yuyarishpami paita crina capangui. Jesusca nunca na llullanllu y Jehová Diostapash ali alimi rijsin (1 Ped. 2:22).

CADA PUNLLA ASHTAHUAN SEGURO CANGAPAJ ESFORZARISHPA CATIPAI

17. Jehová Dios ñucanchita juyashcataca ¿imamandata cada punlla ashtahuan seguro cana capanchi?

¹⁷ Imashinami ricupashcanchi, Diabloca vivo tucushcami can. Paica ñucanchicuna Jehová Diosta sirvinata saquichunmi imacunatapash ruran. Chaimi Jehová Dios ñucanchita na juyashcata crichingapaj munan. Shinapash Diablo ñucanchita vincichunga na saquinachu capanchi (Job 27:5). Chaimandami, Jehová Dios ñucanchita juyashcata cada punlla ashtahuan seguro cangapaca esforzarishpa catina capanchi.

18. Jehová Dios ñucanchita juyashcata ashtahuan seguro cangapaca ¿imatata rurana capanchi?

¹⁸ Shinaca, Jehová Dios ñucanchita juyashcata ashtahuan seguro cangapaca ¿imatata rurana capashcanchi? Pai ñucanchipi ricushca ali cualidadcunata ñucanchipash ricungapami Jehová Diostaca ayudahuai nishpa mañana capashcanchi. Shinallata Jehová Dios paipa sirvijcunata juyashcata ricuchij textocunapimi pensarina capashcanchi. Paita juyajcunata Jehová Dios siempre juyajtapashmi yuyarina capashcanchi. Shinallata Jehová Dios paipa Churipa causaita ñucanchiman shuj valishca regalotashna carashcatapashmi yarina capashcanchi. Jesús nishcashnaca, Jehová Dios ñucanchi Taita cashcatapashmi yaipi charina capashcanchi. Shinami “Jehová Dios canda juyajtaca ¿segurochu cangui?” nishpa pipash tapujpica “ari, seguromi cani y ñucapash paita cada punlla juyashcata ricuchingapami esforzarini” nita ushapangui.