Jehová Dioshna y Jesushna pensanata yachajupashunchi

1, 2. a)Jehová Diostaca ¿imashinata juyana capanchi? b)Jesusca ¿imashinata Jehová Diostaca tucui yuyaihuan juyashcata ricuchirca?

MOISESMAN Cushca Leypi maijan mandamiento ashtahuan importante cashcata ricuchingapami Jesusca cashna nirca: “Canba Taita Dios Jehovataca canba tucui shunguhuan, canba tucui causaihuan, canba tucui yuyaihuan, canba tucui ushaihuanmi juyana cangui” (Mar. 12:30). Shinaca Jehová Diostaca ñucanchi charishca cosascunahuan, ñucanchi munaicunahuan, ñucanchi sentimientocunahuan, ñucanchi tucui fuerzahuanmi juyana capanchi. Shinallata Jehová Diostaca ñucanchi yuyaihuanbashmi juyana capanchi. Yuyaihuan juyana nishpaca Jehová Dioshna pensana cashcatami nijun. Pero Jehová Dioshna tucuita pensaitaca nunca na ushashunllu. Shinapash Jesús imasha pensashcata yachajushpami Jehová Dios imasha pensashcataca ashagutallapash intindita ushapashun (1 Cor 2:16 y español Biblia de estudiopi “nosotros sí tenemos la mente de Cristo” nishca notata ricupangui).

² Jesusca paipa tucui yuyaihuanmi Jehová Diostaca juyarca. Chaimi Jehová Diospa voluntad maijan cashcata yachashpaca, masqui sufrina cashpapash Jehová Diospa voluntadta pactachingapaca decidido carca. Paipa taitata cushichingapaj munaimandami imapash jarcachunga na saquircachu.

3. a) Apóstol Pedroca ¿imatata Jesusmandaca yachajurca? b) 1 Pedro 4:1​pi nishcashnaca ¿imata rurachunda Pedroca cristianocunataca animarca?

³ Pedro y shuj apostolcunapash Jesushuan ashtaca tiempota pacta yalimandami Jesushna pensanata yachajurca. Chaimi primera cartata Pedro escribishpaca Cristoshna pensangapami listo cana capanchi nishpa cristianocunataca animarca (1 Pedro 4:1​ta liipangui). “Listomi cana capanchi” nishpaca Pedroca soldadocuna utilizanata yachaj palabratami utilizarca. Shinaca Jesushna pensanata yachajushpami, ñucanchi nali pensamientocunata y Diablopa nali ruraicunatapash mishangapaca listo capashun (2 Cor. 10:​3-5; Efes. 6:12).

4. Cai temapica ¿imatata yachajupashun?

⁴ Cai temapica Jesús imashina pensashcata y paipa ejemplota imashina cati ushashcatami ricupashun. Shinami 1) Jehová Dioshna pensanata, 2) humilde canata, 3) aliguta pensarinatami yachajupashun.

JEHOVÁ DIOSHNA PENSANATA YACHAJUPASHUNCHI

5. Pedroca ¿imashinata Jehová Dioshna na pensashcataca ricuchirca?

⁵ Jesusca paipa apostolcunataca, Jerusalenmanmi rina cani, chaipimi judiocunata ñaupaman pushajcunaca preso japishpa macahuanga, huañuchihuanga nircami (Mat. 16:21). Pedroca, Jesús Mesías cashcata y Jehová Diospa llactata Jesús salvanata yachaimandami Jehová Diosca Jesusta shina huañuchichunga na saquingachu yashcanga (Mat. 16:16). Chaimandami Pedroca Jesusta shuj ladoman apashpa cashna nirca: “Señor Jesús, ama shina nichu. Quiquinda shina pasachunga na saquinachu cangui” (Mat 16:22). Pedroca chai ratopica Jehová Dioshna y Jesushna pensajushcataca na ricuchijurcachu.

6. Jesusca ¿imashinata Jehová Dioshna pensashcata ricuchirca?

⁶ Jesusca Jehová Dioshna pensaimandami Pedrotaca “caimanda anchuri Satanás. Canga ñuca ñanbimi estorbajungui. Porque Taita Dios munashcashnaca na pensarijunguichu. Sino gentecuna munashcashnami pensarijungui” nirca (Mat. 16:23). Pedroca ayudana munaihuanmi Jesustaca shina nishpa consejajushcanga. Pero Jesusca Jehová Diospa voluntadta pactachingapaj pai sufrishpa huañuna cashcataca alimi yacharca. Chaimi Pedropa consejotaca na chasquirca. Shinami apóstol Pedroca Jehová Dioshna pensana cashcata yachajurca. Ñucanchicunapashmi Jehová Dioshna pensanataca yachajuna capanchi.

7. ¿Imashinata Pedroca Jehová Dioshna pensangapaj esforzarijushcataca ricuchirca? (dibujota ricupangui).

⁷ Huaquin huatacuna jipaca, Pedroca Jehová Dioshna pensangapaj esforzarijushcatami ricuchirca. Jehová Diosca na judío gentecunatapashmi paipa llactapi chasquingapaj munarca. Chaimi Pedrotaca Cornelioman predicachun cacharca. Corneliomi na judío gentecunamandaca primer cristiano tucurca. Judiocunaca na judío gentecunahuanga na chapurinllu carca. Chaimi Pedropaca Corneliopaman rinaca difícil cashcanga. Pero Jehová Diospa voluntad maijan cashcata intindishpami, Cornelio cayachun cachajpica Pedroca “na imatapash nishpa rircalla” (Hech. 10:​28, 29). Pedro predicajpimi Corneliopash y paipa familiapash bautizarirca (Hech. 10:21-23, 34, 35, 44-48).

8. ¿Imashinata Jehová Dioshna pensashcataca ricuchipanchi? (1 Pedro 3:8).

⁸ Huaquin huatacuna jipami, Pedroca cristianocunataca “tucuicunami shujlla pensamiento cana canguichi” nishpa consejarca (1 Pedro 3:8​ta liipangui). Tucuilla huauquipanicuna shujlla pensamiento cangapaca, Jehová Dioshnami pensana capanchi. Chaipaca Bibliapi nishcatami pactachina capanchi. Por ejemplo, Jesusca paipa catijcunataca Taita Diospa Gobiernota en primer lugar churachunmi consejarca (Mat. 6:33). Shinaca shuj huauqui tiempo completopi sirvingapaj munajujpica Pedroshnaca na jarcajunachu capanchi. Sino felicitashpami paicunataca imagupipash apoyana capanchi.

HUMILDE CAPASHUNCHI

9, 10. Humilde cashcataca ¿imashinata Jesusca ricuchirca?

⁹ Jesusca pai huañungapaj último tutapi cashpami Pedrohuan y chaishuj apostolcunahuanga tandanajurca. Chai tutami paicunamanga humilde canata yachachirca. Jesusca Pedrota y Juandaca tucuilla apostolcunahuan micungapami cosascunata segurachun cacharca. Micungapaj rishcacunapa chaquicunata maillachichunmi Pedro y Juanga shuj lavacarata y toallacunata segurashcanga. Pero ¿pishi apostolcunapa chaquitaca maillagrijushcanga?

¹⁰ Chai tiempopica esclavocunami shujcunapa chaquicunataca maillan carca. Pero chai tutaca Jesusmi apostolcunapa chaquitaca maillarca. Jesús paipa jahualla churajunata llujchishpa, toallata cinturaspi huatarishpa, shuj lavacarapi yacuta churashpa apostolcunapa chaquicunata maillajpica paicunaca manllarishcami cashcanga (Juan 13:​4, 5). Jesusca paita traicionagrijuj Judaspa chaquita y chaishuj 11 apostolcunapa chaquicunatapash maillashpaca parashcangami. Chaita rurashpaca Jesusca humilde cashcatami ricuchirca. Apostolcunapa chaquita maillashca jipami Jesusca nirca: “Imamanda cangunata chaquita maillachishcataca ¿yachanguichichu? Cangunaca, ñucataca Yachachij y Señor nihuanguichimi. Shina nishpaca cabaltami ninajunguichi. Porque ñucaca Yachachij y Señormi cani. Ñucaca Yachachij y Señor cashpapashmi cangunataca chaquita maillachishcani. Shinaca cangunapashmi caishuj chaishuj chaquitaca maillachirina canguichi” nirca (Juan 13: 12-14).

11. Pedroca ¿imashinata humilde cashcataca ricuchirca? (1 Pedro 5:5​ta y dibujotapash ricupangui).

¹¹ Pedroca Jesushna humilde canatami yachajurca. Jesús jahua cieloman rishca jipami Pedroca shuj milagrota rurashpa suchu nacirishca runagutaca jambirca (Hech. 1:​8, 9; 3:​2, 6-8). Chaitaca ashtaca gentecunami manllarishpa ricunajurca (Hech. 3:11). Chaimi chai gentecunaca Pedrota alabangapaj munanajurca. Pero Pedroca humilde caimandami chai milagromandaca Jehová Diosta y Jesusta alabarca. Jesusmanda parlashpaca cashnami nirca “Jesuspa shutimanda y ñucanchicuna paipa shutipi crishcamandami quiquinguna ricunajushca, quiquinguna rijsishca runagupa chaquicunaca ali tucushca” nirca (Hech. 3:​12-16). Apóstol Pedroca Jesús paipa apostolcunata chaquicunata maillachishcata yarishpami cristianocunaman shuj cartata escribishpaca humilde cana importante cashcata yarichirca (1 Pedro 5:5​ta liipangui).

12. ¿Imashinata Pedroshna humilde caita ushapanchi?

¹² Pedro cuendami ñucanchicunapash humilde canata yachajuita ushapanchi. Ciertopacha humilde cashcataca na ñucanchi parlocunahuanllachu ricuchipanchi. 1 Pedro 5: 5​pi humildemi cana canguichi nishpa, apóstol Pedroca ñucanchi shungu ucupi humilde cana cashcatami intindichingapaj munarca. Shujcunata ayudashpaca ñucanchita alabachun munaihuanga na ayudapanchichu. Sino Jehová Diosta y gentecunata juyaimandami ayudapanchi. Shujcuna na ricunajujpipash huauquipanicunata y Jehová Diosta cushilla sirvishpami ciertopacha humilde cashcataca ricuchipanchi (Mat. 6:​1-4).

‘ALIGUTA PENSARIPASHUNCHI’

13. ‘Aliguta pensarijcunaca’ ¿imashinata can?

¹³ ‘Aliguta pensarijcunaca’ ¿imashinata can? (1 Ped. 4:7). ‘Aliguta pensarijcunaca’ Jehová Dios pensashcashnami imagutapash decidin. Paicunapaca Jehová Diospa ñaupapi ali ricurinami ashtahuan importante can. Shinallata, shujcunamanda mejor o peormi cani nishpa o tucuitami ali yachani nishpaca na pensajunllu. Ashtahuanbash Jehová Dios paicunata ayudachunmi siempre mañan.a

14. Paipilla yapata confiarimandaca ¿imatata Pedroca rurarca?

¹⁴ Jesusca pai huañungapaj último tutapi cashpami paipa discipulocunataca “ñucahuan ima pasajta ricushpami, cai tutaca ñucatalla saquishpa rigringuichi” nirca. Shina nijpimi Pedroca paipilla yapata confiarishpa “tucuicuna quiquinda saquijpipash, ñucaca nunca na quiquindaca saquishachu” nirca. Chaimi paipa discipulocunataca ‘rijchariami cana canguichi. Taita Diostami mañashpa catina canguichi’ nishpa Jesusca consejarca (Mat. 26:​31, 33, 41). Jesuspa consejota catishpaca Pedroca Jesuspa discípulo cashcataca na neganmanllu carca. Jesusta negashcamandami Pedroca ninanda llaquirirca (Mat. 26:​69-75).

15. ¿Imamandata Jesusca Jehová Diospa voluntadta pactachi usharca?

¹⁵ Jesusca Jehová Diospimi tucui shungu apoyarirca. Jesusca perfecto cashpapash pai huañungapaj último tutapi cashpami tauca viajeta Jehová Diostaca mañarca. Shinami Jehovapa voluntadta pactachingapaca fuerzata charirca (Mat. 26:​39, 42, 44; Juan 18:​4, 5). Jehová Diosta tauca viajeta Jesús mañajushcataca Pedroca nunca na cungashcangachu.

16. Apóstol Pedroca ¿imashinata aliguta pensarinata yachajushcataca ricuchirca? (1 Pedro 4:7).

¹⁶ Tiempohuanga Pedropashmi Jehová Diosta mañashpa Jehovapi apoyarinata yachajurca. Jesusca causarishca jipami Pedrota y chaishuj apostolcunataca predicangapaj espíritu santota chasquingacamanga Jerusalenbimi cana canguichi nirca (Luc. 24:49; Hech. 1:​4, 5). Espíritu santota chasquingacamanga Pedropash y shuj cristianocunapash ‘cutin cutinmi Taita Diostaca mañanajurca’ (Hech. 1:​13, 14). Shinallata cristianocunata animangapami primera cartata escribishpaca, aliguta pensaringapaj y Jehová Diospi apoyaringapaca Jehová Diostami mañana canguichi nirca (1 Pedro 4:7​ta liipangui). Pedroca Jehová Diospi apoyarinata yachajushpami congregacionba pilarshna tucurca (Gál. 2:9).

17. Facillla cosascunata rurangapapash ¿imatata rurana capanchi? (Fotota ricupangui).

¹⁷ Aliguta pensaringapaca Jehová Diostami cutin cutin mañana capanchi. Facillla cosascunata rurangapapashmi Jehová Diospa ayudataca siempre mañana capanchi. Jehová Diosllami ñucanchipa ima ashtahuan ali cajtaca ali yachan. Chaimandami importante decisiongunata japigrijushpaca Jehová Diosta cutin cutin mañana capanchi.

18. Apóstol Pedroshna ¿imatata yachajuita ushapanchi?

¹⁸ Jehová Diostaca ñucanchicunata paiman parecidota rurashcamandaca ninandami agradicipanchi (Gén. 1:26). Aunque na tucuipi Jehovapa ejemplota cati ushashpapash apóstol Pedroshnami Jehová Dioshna pensanata, humilde canata y aliguta pensarinata yachajuita ushapanchi (Is. 55:9).