Na tucuita yachashcatami intindina capanchi

1. Jehová Diosca ¿imashinata ñucanchitaca rurashca y imamandata shina rurashca?

JEHOVÁ DIOSCA ñucanchicuna pensarichun, yachajuchun y imata yachajushcata imashina pactachinata intindichunmi rurashca. Jehová Diosca paipa ‘ali yachaita’ yachachun munaimandami chashna rurashca. Shinallata paita sirvingapaj aliguta pensarishpa aliguta decidichun munaimandami, ñucanchitaca chashna rurashca (Prov. 2:​1-5; Rom. 12:1).

2. a) ¿Imatata reconocina capanchi? (Romanos 11:​33, 34; dibujotapash ricupangui). b) Na tucuita yachai ushashcata intindinaca ¿imamandata ñucanchipallata ali can?

² Jehová Diosca ashtaca cosascunata yachajuchunmi ñucanchicunataca rurashca. Shina rurashca cajpipash na tucuita yachai ushashcatami reconocina capanchi (Romanos 11:​33, 34​ta liipangui). Jobpa ejemplopi pensaripashunchi. Jehová Diosca Jobtaca ashtaca tapuicunata rurashpami na tucuita yachashcata intindichirca. Chaimi Jobca humilde cana cashcata y cambiana cashcatapash cuenta japirca (Job 42:​3-6). Jobpa ejemplomi ñucanchipash na tucuita yachai ushashcata cuenta japichun ayudan. Jehová Diosca ali decisiongunata japichunmi ñucanchicuna ciertopacha minishtijushca cosascunata yachachin. Shinaca, na tucuita yachai ushashcata intindinami ñucanchitaca humilde cachun y Jehová Diospa nishcacunapipash confiachun ayudan (Prov. 2:6).

3. Cai temapica ¿imacunatallata yachajupashun?

³ Cai temapica cai tapuicunatami yachajupashun: ¿Imacunatallata na yachapanchi? Chaicunata na yachanaca ¿imashinata ñucanchitaca afectan? ¿Imamandata huaquin cosascunata yachanaca na minishtirishca can? Chaicunata yachajunami ‘ali yachaita charij’ Jehová Diospi confiachun ayudanga (Job 37:16). Jehová Diosmi ñucanchicuna imata minishtijushcataca yachachinga.

FIN IMA HORA CHAYAMUNATACA NA YACHAPANCHICHU

4. Mateo 24:36​pi nishcashnaca ¿imatata na yachapanchi?

⁴ (Mateo 24:36​ta liipangui). Nali gentecuna tucuchi tucuna tiempo ima punlla canataca na yachapanchichu. Jesuspash cai alpapi cashpaca “ima punlla, ima hora chashna pasanataca pipash na yachanllu” nircami.a Jesusca paipa apostolcunamanbash, Jehová Diosllami ima hora chashna pasanata ‘nina derechotaca’ charin nircami (Hech. 1:​6, 7). Fin ima punlla chayamunataca ñami Jehová Diosca agllashcalla charin. Pero ñucanchicunaca ima punllapacha canataca na yachapanchichu.

5. Fin ima hora chayamunata na yachanaca ¿imashinata ñucanchitaca afectaita ushan?

⁵ Jesús nishcashnaca, fin chayamungacaman mashna tiempota shuyana cashcataca na yachapanchichu. Chaimi huaquinbica desesperarinchi o desanimarinchi. Pero especialmenteca Jehová Diosta ashtaca huatacunata sirvijuimandami shina sintirita ushanchiman. Huaquinbicarin familiacuna o shuj gentecunapash burlarijpimi Jehová Diospa punllata shuyanaca ashtahuan difícil caita ushan (2 Ped. 3:​3, 4). Chaimi pensarinchiman “Jehovapa punlla ima hora canata yachashpaca ashtahuan facilmi shuyaiman y ashtahuan facilmi shujcuna burlarijpipash aguantaiman” nishpa.

6. Jehovapa punlla ima hora chayamunata na yachanaca ¿imamandata ali can?

⁶ Fin ima hora chayamunata Jehová Dios na villajpimi, paita juyaimanda y paipi confiaimanda sirvijushcata ricuchina oportunidadta charipanchi. Jehová Diostaca fin chayamungacamanllaca na sirvingapaj munapanchichu. Sino para siempremi sirvingapaj munapanchi. ‘Jehová Diospa punlla’ ima hora chayamunata pensarijunapa randica, Jehová Dios chai punllapi ima ali cosascunata ruranapimi ashtahuanga pensarina capanchi. Shina pensarishpami Jehová Diosman ashtahuan quimiritapash ushapashun y paipa voluntadta rurangapapash esforzaripashun (2 Ped. 3:​11, 12).

7. ¿Imata yachashcapita concentrarina capanchi?

⁷ Imacunatalla yachashcapimi concentrarina capanchi. Shinaca ¿imacunatallata yachapanchi? 1914 huatamanda último punllacunapi causanajushcataca alimi yachapanchi. Bibliapica tauca profeciacunami último punllacunapi causajushcataca ricuchin. Shinallata 1914 huatamanda cai mundopi causai imashina cashcatapashmi Bibliapica ricuchin. Chaicunata ricushpami ‘Mandaj Dios shamuna jatun punlla ña chayamujujtaca’ seguro capanchi (Sof. 1:14). Shinallata ‘Taita Diospa Gobiernomanda ali villaicunata’ ashtaca gentecunaman predicachun Jehová Dios munashcatapashmi yachapanchi (Mat. 24:14). Ali villaigucunataca más o menos 240 llactacunapi y mil yali idiomacunapimi predicanajupanchi. Shinaca, ali villaigucunata cushijushpa villachingapaca “ima punlla, ima hora” Jehová Diospa punlla chayamunata yachanataca na minishtipanchichu.

ÑUCANCHITA AYUDANGAPAJ JEHOVÁ IMACUNATALLA RURANATACA NA YACHAPANCHICHU

8. ¿Jehová Dios ‘imashina rurashcataca’ tucuitachu yachai ushapanchi?(Eclesiastés 11:5).

⁸ Jehová Diosca paipa voluntadta pactachingapami imatapash ruran o imapash pasachun permitin. Pero Bibliapi nishcashnaca Jehová Dios ‘imashina rurashcataca na yachanchichu’ (Eclesiastés 11:5​ta liipangui). Por ejemplo, cientificocunaca cunan punllacunacamanmi shuj llullu huahuagu mamapa vijsa ucupi imashinapacha formarijtaca na alipacha yachan. Shinallata ñucanchicunapash Jehová Dios imamanda imapash pasachun permitijta o ñucanchita ayudangapaj imatapacha Jehová Dios ruranataca na yachapanchichu (Sal. 37:5).

9. Jehová Dios imashina ayudanata na yachaimandaca ¿imatata ruranchiman?

⁹ Jehová Dios imashina ayudanata na yachaimandaca ¿imatata ruranchiman? Huaquinbica imata decidinatami dudai callarinchiman. Por ejemplo, dudajuimandami ashtahuan predicangapaj munashpapash huaquin cosascunata saquinata manllanchiman o publicadorcuna minishtirijuj pushtuman rinatapash manllanchiman. Cutin huaquinbica, shuj metata na pactachi ushashcamanda o ashtahuan predicangapaj esforzarijpipash pipash na uyashcamanda o shuj proyecto de construccionbi problemacuna ricurishcamandami, “Jehová Diosca ñucahuanga na cushijunllu, na ayudajuhuanllu” nishpa pensarinchiman.

10. Jehová Dios imatapacha ruranata na yachaimandaca ¿ima cualidadpita ashtahuan mejoranchiman?

¹⁰ Jehová Dios imatapacha ruranata na yachaimandami humilde canata y shuj importante cualidadcunata charinatapash yachajupanchi. Shinallata Jehová Diospa yuyaicuna, ruraicuna gentecunapa yuyaicunamanda, ruraicunamanda ashtahuan yali cashcatami cuenta japipanchi (Is. 55:​8, 9). Shinallata Jehová Diospi confiashpaca tucui ali llujshinatami yachajupanchi. Predicacionbi o Jehovapa organizacionbi imapash proyectopi ali rijpica, Jehová Diostami agradicinchi (Sal. 127:1; 1 Cor. 3:7). Shinapash ñucanchi munashcashna imapash na llujshijpica, Jehová Dios tucuita ricujushcatami yarina capanchi (Is. 26:12). Ñucanchi rurai ushashcaguta rurashpami, Jehová Dios ayudanata confiapanchi. Punda tiempocunapishna ñana milagrocunata rurashpa ayudajpipash, ñucanchicuna imata ruranata yachachun Jehová Dios ayudanataca seguromi capanchi (Hech. 16:​6-10).

11. Ñucanchica ¿imacunatallata yachapanchi?

¹¹ Ñucanchi yachashca cosascunapimi pensarina capanchi. Por ejemplo, Jehová Diosca juyaj, justo, ali yachaita charij Taita Dios cashcapimi pensarina capanchi. Shinallata paita sirvingapaj y huauquipanicunata ayudangapaj imagutapash rurajpi Jehová Dios valoran cashcata y paipa sirvijcunata siempre bendiciajtapashmi pensarina capanchi (Heb. 11:6).

CAYA PUNLLA IMA TUCUNATACA NA YACHAPANCHICHU

12. Santiago 4:​13, 14​pi nishcashnaca ¿imatata na yachapanchi?

¹² (Santiago 4:​13, 14​ta liipangui). Caya punlla ñucanchi causaihuan ima pasanataca nipi na yachapanchichu. Na yashcapimi ñucanchitaca imapash pasaita ushan (Ecl. 9:12). Chaimandami ñucanchi planeashca cosascuna ali llujshinata o chaicunata pactachingapallapash causashpa catinataca na yachapanchi.

13. Shamuj punllacunapi ima pasanata na yachaimandaca ¿imashinata sintirinchiman?

¹³ Llaquicunaca na yashcapimi ricurita ushan. Na yashcapi imapash pasaimandami ñucanchi causaipi cambiocuna tiashcamandaca llaquillapacha sintiripanchi. Shinallata imapash ñucanchi munashcashna na pasajpimi desanimado sintiripanchi (Prov. 13:12). Chashna llaquicunata charishcamandami imapash pasanga yashpa yapata preocuparita ushanchiman. Chashna preocurishpaca aguantaitapash y cushilla caitapash na ushashunllu.

14. Ciertopacha cushilla causai ushangapaca ¿imatata minishtipanchi? (Fotocunatapash ricupangui).

¹⁴ Ima llaquicuna ricurijpipash Jehová Diosta juyaimanda sirvijushcatami ricuchina capanchi. Bibliapi nishcashnaca Jehová Diosca na tucuilla llaquicunamanda cuidanllu. Shinallata ñucanchi causaipi imacunalla pasanatapash na destinanllu. Jehová Diosca ñucanchicuna na tucuita yachashpapash cushilla causaita ushashcataca alimi yachan. Shinallata, paipa ayudata mascashpalla y paita cazushpalla ciertopacha cushilla causai ushashcatapash Jehová Diosca alimi yachan (Jer. 10:23). Imata decidigrijushpapash Jehovapa ayudata mascashpaca discípulo Santiagoshnami “Jehová Dios munajpica causashunmi. Y caita o chaitami rurashun” nita ushapashun (Sant. 4:15).

15. Shamuj punllacunapi ¿ima pasanatata yachapanchi?

¹⁵ Caya punlla ima pasanataca na yachapanchichu. Shinapash ñucanchicunaman jahua cielopi cashpa o cai alpapi cashpa para siempre causaiguta Jehová Dios caranataca alimi yachapanchi. Jehová Diosca nunca na llullanllu. Pai imata prometishcataca siempremi cumplin (Tito 1:2). Solo Jehová Diosllami “jipa punllacuna ima tucunatapash, ñucami callarimandapacha villani. Nara imapash tiajpillatami, pundamandapacha villarcani” nita ushan. Jehová Diospa promesacunaca siempremi cumplirishca y cumplirishpami catinga (Is. 46:10). Jehová Dios ñucanchita juyashpa catichunga pipash na jarcaita ushangachu (Rom. 8:​35-39). Ima llaquicuna shamujpipash, Jehová Diosmi ñucanchimanga ali yachaita cunga, consolanga y aguantachunbash fuerzata cunga. Jehová Dios ñucanchita ayudanata y bendicianataca seguromi capanchi (Jer. 17:​7, 8).

JEHOVÁ DIOS ÑUCANCHITA ALI RIJSISHCATACA NA INTINDINCHICHU

16. Jehová Diosca ¿imacunatallata ñucanchimandaca yachan? (Salmo 139:​1-6).

¹⁶ (Salmo 139:​1-6​ta liipangui). Ñucanchita Ruraj Jehová Diosca tucuitami ñucanchimandaca yachan. Ñucanchicuna imata pensajta, imashina sintirijtaca alimi yachan. Imata nijujta, imamanda shina nijujta, imata rurajta, imamanda shina rurajtapash alimi Jehová Diosca yachan. Rey Davidca, Jehová Diosca shuj vigilante cuendami ñucanchitaca cuidariajun y ayudangapapash listomi can nirca. Jehová Diosca tucui universota Mandaj cashpapash, cai alpata y jahua cielota Ruraj cashpapash, Tucui Ushaita Charij Taita Dios cashpapash ñucanchimandaca ninandami preocuparin. Rey Davidca ‘chashnapacha canba yachaica, ñucapaca ninanda manllarinami. Ninan jatunbacha cajpimi, na yachai ushapani’ nircami (Sal. 139:6).

17. ¿Imamandata Jehová Dios ñucanchimanda preocuparijta crinaca difícil can?

¹⁷ Ñucanchi familiapi imapash pasashcamanda, ñucanchi culturamanda, ñucanchi punda crishcacunamandami Jehová Dios shuj juyaj taitashna ñucanchimanda preocuparijta crinaca difícil can. Talvez punda nali ruraicunata yarishpami Jehová Diosca ñucataca na rijsingapaj munahuangachu o ñucaman quimiringapapash na munangachu yashpa pensarinchiman. Huaquinbica rey Davidpashmi shina sintirirca (Sal. 38:​18, 21). Taita Diospa voluntadta rurangapaj munaimandami huaquingunaca paicunapa mapa causaita saquingapaj esforzarinajun. Chaimi talvez pensaringa: “Taita Dios ñucata alipacha rijsishpaca ¿imamandata ñuca imashina cashcataca na aceptashpa cambiachunra munajun?” nishpa.

18. Jehová Dios ñucanchita ali ali rijsishcata intindinaca ¿imashinata ayudan? (Fotocunatapash ricupangui).

¹⁸ Jehová Dios ñucanchita ali ali rijsijta y ñucanchipi ali cosascunata ricujujtaca aceptanami capanchi. Jehová Diosca ñucanchi pandarishcacunata ricushpapash ñucanchicuna imashina sintirijta, imamanda imatapash rurajtaca alimi intindin. Jehová Diosca ñucanchicuna cambiai ushashcata yachashpami juyaihuan ayudan (Rom. 7:15). Ñucanchicuna imacunatalla rurai ushashcata Jehová Dios ricujushcataca ali alimi intindina capanchi. Shina intindishpami Jehová Diostaca tucui shunguhuan y cushilla sirvita ushapashun.

19. Jehová Diosmandaca ¿imacunatallata yachapanchi?

¹⁹ Jehová Dios juyaj Taita Dios cashcataca alimi yachapanchi (1 Juan 4:8). Jehová Diospa ali mandamientocunata ricushpami, Jehová Dios ñucanchita juyajta y ñucanchipa lo mejorta munashcatapash ali yachapanchi. Shinallata ñucanchicuna para siempre causachun munaimanda, paipa Churipa causaita cushcatapashmi ali yachapanchi. Jesús paipa causaita cushcamandami, juchayucuna cashpapash Jehová Diospa ñaupapi ali ricuri ushashcataca seguro capanchi (Rom. 7:​24, 25). Jehová Dios ‘ñucanchipa shungutapash yali cashcata, tucuita yachajtapash’ alimi yachapanchi (1 Juan 3:​19, 20). Jehová Diosca ñucanchita ali ali rijsimandami, ñucanchicuna paipa voluntadta rurai ushanataca seguro can.

20. Ama yapata preocuparichunga ¿imata ayudanga?

²⁰ Imashinami yachajupashcanchi, Jehová Diosca ñucanchicuna minishtinajuj informaciondallami yachachun saquishca. Shinaca na yachashca cosascunapi yapata preocuparinapa randica, ashtahuan importante cosascunapimi concentrarina capanchi. Shinami “ima pandatapash na yachachij” Jehová Diospi tucui shunguhuan confiashcata ricuchipanchi (Job 36:4). Cunanbica ashtaca cosascunatami na yachapanchi. Shinapash, shamuj punllacunapi Jehová Diosmanda para siempre yachajushpa catinata yachashpaca ninandami cushijupanchi (Ecl. 3:11).