Familiacunaca ¿imashinata cushilla causai ushan?

1. ¿Imamandata civilpi cazaranaca minishtirishcapacha can?

Bibliaca cushilla Diosmanda ali villaigucunatami charin (1 Timoteo 1:​11, NM ). Cazaranata Dios churashcamandami familiacuna cushilla causachun munan. Diosta cazungapaj munajcunaca civilpi cazarashparami igual causana can. Cazarashpami cusahuarmi seguro sintirishpa huahuacunatapash juyashpa, aliguta viñachin. Lucas 2:​1, 4, 5, liipangui.

Diosca munanmi cazarashcacuna huañui punllacaman igual causanajuchun. Diosca na munanllu cazarashca jahua shuj huarmita o shuj jarita munashpa ricuchun (Hebreos 13:4). Divorciarichunbash na munanllu (Malaquías 2:​16). Shinapash, cusa o huarmi pihuanbash juchapi urmajpillami divorciarishpa cutin cazaraita ushan. Mateo 19:​3-6, 9, liipangui.

2. Cusahuarmicunaca ¿imashinata causana can?

Cusahuarmicuna ishcandimanda ayudarishpa causachunmi Diosca churarca (Génesis 2:18). Cusami familiata mantinina, Diosmandapash yachachina can. Huarmita juyaimandami cusaca na paipa munaitalla ruran. Cusahuarmicunaca randimanda juyarishpa, respetarishpami causana can. Cushilla causangapaca ishcandillata juchayucuna caimandami perdonarinata yachajuna can. Efesios 4:​31, 32; 5:​22-​25, 33; 1 Pedro 3:7, liipangui.

3. ¿Cusahuarmicuna problemacunata charishpaca partirinallachu can?

Cusahuarmicuna problemacunata charishpaca juyaihuan, ali trataringapami esforzarina can (1 Corintios 13:​4, 5). Problemacunamanda caruyangapaj munashpalla cusahuarmicuna partirichunga Bibliapica na mandanllu. 1 Corintios 7:​10-​13, liipangui.

4. Huahuacuna ¿imashina causachunda Diosca munan?

Jehová Diosca huahuacuna cushilla causachunmi munan. Jovenguna cashpa ali causachunbashmi yachachin. Diosca munanmi huahuacuna taitacunapa consejota, ali ejemplotapash catichun (Colosenses 3:​20). Diosca paitapash Jesustapash sirvishcamanda cushijuchunmi munan. Eclesiastés 11:9–​12:1; Mateo 19:​13-​15; 21:​15, 16, liipangui.

5. Huahuacuna cushilla cachunga, taitacunaca ¿imatata rurana can?

Taitacunaca huahuacuna micunata, ropata, maipi causanatapash charichunmi ricuna can (1 Timoteo 5:8). Ashtahuangarin Diosmandami yachachina can. Taita mamacuna Diosta tucui shunguhuan juyajpica huahuacunapash chaitallatami catinga. Bibliamanda yachajushpami huahuacunaca ali yuyaicunata charinga. Deuteronomio 6:​4-7; Proverbios 22:6, liipangui.

Huahuacuna alita rurajpica, alimi rurashcangui nishpami cushichina can. Nalita rurajpica tacurina o huaquinbica astinami minishtirin. Shinami nalicunata na rurashpa llaquicunapi na urmanga (Proverbios 22:15). Shinapash na yapata astinachu can. Colosenses 3:​21, liipangui.

Testigo de Jehovacunaca taitacunata, huahuacunatapash ayudangapami huaquin librocunata llujchishca. Chai librocunaca Bibliamanda yuyaicunatami charin. Salmo 19:​7, 11, liipangui.